E i ai le sao taua o taulele’a

Tusia Sarafina Sanerivi ma Ilia L. Likou ,

54 Hits

Faleata Wong, 28 le matua o le soifua i Salani Falealili.

Faleata Wong, 28 le matua o le soifua i Salani Falealili.

O le galuega fa’ataulele’a i totonu o nu’u ma afio’aga ta’itasi e le faigofie aua e pei o tiute uma i totonu o aiga, nu’u ma ekalesia latou te fa’atinoina.

Na maua le avanoa o le Fofoga o Samoa ma Faleata Wong, 28 le matua o le soifua i Salani Falealili.

“Ia o a’u ou te lavea ile fa’ataulele’a po o le malosi o le nu’u  i totonu o si o matou nu’u nei, ma e tele lava galuega e matou te fa’atinoina i le tele o aso.

“O nei matafaioi ia o itu masani lava, aua o lea lava le olaga o le tama Samoa moni po oi matou fo’i ua ta’ua o taulele’a o le tautua ai lea i totonu o aiga.

“O se agaga fa’afetai ona o le malu o pulega a ali’i ma matai aua e pei o lea o lo’o tele mai lava le lesona e mafai ona a’oa’oina mai ai,

“E matua’i vava mamao lava o le olaga o le taule’ale’a i nu’u le mavae ma tua nei.

“O le uiga o la’u tala e mamalu, e fai mea uma ona o fa’atonuga, e ala ona fa’atino e le’o mo se lelei o se tagata to’atasi ae o le lelei lautele o le nu’u.

Na ia ta’ua o le taimi lenei o lo’o ua i ai lava ana galuega o lo’o fa’atinoina i totonu o le afio’aga.

“Ia e fa’alagolago lava le tele o vaega i fa’atonuga, ma o lo’o fai fo’i ma fai a matou ma’umaga e pei ona masani ai lava.

“Ia o le isi galuega tele ou te feagai ai ma a’u o le va’aia lea o le fa’atanoa vai ia ma fa’amama ae le gata i lea o le fesoasoani lea i totonu o aiga.

“O lona uiga e le gata e matou te galulue mo le nu’u ma le ekalesia ae o le tautuaina fo’i totonu o aiga.

“E tele lava le aoga o le amata ai o le olaga i totonu o afio’aga aua fo’i a matutua o lo’o i ai lava le itu fo’i lea e malamalama lelei i itu e alu i ai.

“E malamalama lelei i le fa’atinoina o so’o se galuega , e o’o lava i le la’a , savali ma le tautala ma so’o se ituaiga gaioiga ia o fa’atasi ma le aganu’u.

“Ia o lea fo’i la le fa’ataulele’a , ia o le so’oso’otau’au lava mo le lelei o aiga, nu’u ma ekalesia.

© Samoa Observer 2016

Developed by Samoa Observer in Apia