E i ai sao taua o tamā i aiga

By Sarafina Sanerivi 12 January 2017, 12:00AM

O le talitonuga  lea o le tamā i a Mulivai Misa, 40 le matua o le soifua o Salelesi.

I le  fa’atatalanoaga ai ma le Fofoga o Samoa i le aso ananafi na ia fa’ailoa ai le taua ai tele o matafaioi o tamā e pei ona iloga ai i lo latou fa’alupega tauave – o le tamā lava ia o le ulu o le aiga.

“O a’u e tau le auai tele i le manatu lea e fa’apea o le tele o matafaioi o lo’o fa’atinoina e tinā i totonu o aiga, nu’u ma le ekalesia.

“I a te a’u ia, o lea le tulaga e ta’ua ai o tamā o ulu o aiga, aua fo’i o so’o se galuega lava e i ai lava le tonu mulimuli po o le fa’aiuga o so’o se filifiliga po o tonu o aiga, e sau mai le tamā.

“O lea le tulaga e manuia ai o so’o se taumafaiga o lo’o taumafai ai taimi uma aua fo’i o lo’o i ai lava le fa’amalumaluga a nai tamā.

“E le fa’apea la ua ta’uleagaina le tele o sao taua a le to’atele a tinā i totonu o le atunu’u ae o le tulaga fo’i lea ia aua ne’i ave’ese le itu e pito sili ona taua o tamā o i latou o matai ma ua tofia e pulea aiga.

Na ia toe fa’amanatu nisi o mau ina ia toe silasila ai le tele o aiga ma mafai ai pea ona i ai le galulue so’o fa’atasi a tinā ma tamā i totonu o le atunu’u.

“Ia ua tatou silafia ma iloa uma lava o le ivi o Atamu na aumai fai ai Eva, aua fo’i lae silafia e le Atua o le a ma le a ae o le tamā e ao ona ave ai le fa’amuamua.

“I totonu o si o matou aiga ma le lo’omatua ma le fanau, e pei o lea le tulaga o lo’o ave tele i ai le taimi lenei le molimau tu tu i lea tulaga.

“E mafanafana mea uma, le so’otaga vavalalata lea e pei ona tau fa’amatala atu.

“O le fa’alogo lava lea o le tinā i le tamā, a i ai se fa’aletonu o i la’ua lava e soalaupule vaega uma aua le solo lelei o aiga.

“O le uiga la lea o la’u tala e moni lava e tele matafaioi a nai tinā ae mana’omia lava le so’otaga lea ina ia galulue ai.

“E mana’omia e le tinā le tamā e fa’apena fo’i le tamā i le tinā.

“O lona uiga a atoa vaega nei e manuia lumana’i o aiga, nu’u ekalesia ma le atunu’u.

“O lea le mafua’aga na fau fa’atasi ai Eva ma Atamu e le Atua aua o lo’o silafia e Tamā e ao ina galulue fa’atasi.

By Sarafina Sanerivi 12 January 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>