Leai se galuega, maumaga lava le tali

Tusia Fetalai Tuilulu’u ,

95 Hits

Neta Tuala mai le afioaga o Safa’ato’a Lefaga.

Neta Tuala mai le afioaga o Safa’ato’a Lefaga.

O le fa’alagolago i galuega a o tatou lava lima o se tasi lea o auala e pito sili ona taua i le soifuaga e te’enaia ai le tele o fa’afitauli o lo’o fetaia’i ma tatou. 

O le maua ai o le fa’atalatalanoaga a le Fofoga o Samoa ma le tinā ia Neta Tuala mai le afioaga o Safa’ato’a Lefaga sa ia taua ai lona lē lagolagoina o manatu o nisi o tagata e uiga lava i le fa’alagolago i galuega mo alagatupe. 

O tinā e 28 tausaga le matua le soifua mai le afioaga o Saleimoa ae o lo’o nonofo nei i le aiga si ona to’alua i Safa’ato’a Lefaga.

“O lo’u iloa iai, o le soifuaga nei ua faigata ma taugata le soifuaga peitai a tatou fa’amoemoe ma fa’atu’utu’u iai leai lava se mea lelei tau te maua. 

“O le to’atele o tagata ua fa’amoemoe lava e su’e galuega e maua ai le seleni, ae fa’afefea le seleni maua fua mai i tatou fanua. 

“O le uiga o la’u tala, a leai se galuega, o lo’o iai fanua e galulue ai ma tõtõ ai talo ma meamaka e fa’atau maua ai le tupe. 

“O i foi o lo’o fa’amoemoe ai si mā aiga, o le galuega malosi lava le maumaga ma faia atina’e ina ia maua ai le seleni. 

E leai se tasi o Neta ma lona to’alua e faigaluega ae o lo’o fa’amoemoe lava i fua o la fa’atoaga e maua ai tupe e tausi ai aiga ae le gata i lea o le fanau aoga. 

“Mo le silafia foi, e 10 ma tautalo sa fa’atau annei le taeao ia taimi nei toe tasi lea totoe, o le ala foi lea o lo’u taofi o tupe maua fua tupe e maua i le fa’atoaga. 

“O la’u fautuaga le atunu’u ina ia iloa ma mautinoa lelei e le’o na’o se galuega e fa’alagolago iai e maua ai se tupe, ae taga’i i õ tatou fanua ma eleele ina ia galuegina.  

“O le itu lelei o galuega i le fa’atoaga o le tupe vave ma e pule lava oe i ou taimi galuega ma taimi manava. 

Sa fa’aali foi e le tinā ia Neta e tele se fesoasoani o le maumaga ma si ona aiga o le ala foi lea o le fa’amoemoe ma toaga lava iai, aua e le gata i mea fai a’o si ana fanau foi le aoga. 

“O le fa’amoemoe o si õ maua aiga o le maumaga lava.

© Samoa Observer 2016

Developed by Samoa Observer in Apia