Fa’ato’ato’a e le Fa’atonu Aoao o le Soifua Maloloina, popolega o le atunu’u

By Deidre Fanene 12 July 2016, 12:00AM

O ananafi na saunoa ai le Fa’atonu Aoao o le Matagaluega o le Soifua Maloloina, o Leausa Dr. Take Naseri, e tau fa’ato’ato’a ma taofiofia popolega o le atunu’u ona o le le-lava o tui ma vaila’au mo togafitiga o gasegase ma’i-suka.

Na fa’amaonia e le Fa’atonu Aoao, le le-lava o ia vaega i le falema’i i le taimi nei, ae leai se tulaga e ono popole ai ona o lea ua taunu’u mai se ‘oka fou mai fafo mo falema’i uma i le atunu’u.

 “To’atele le atunu’u na telefoni mai i le matou ofisa, pe moni ua le toe maua ni tui mo tagata ma’i-suka, i le falema’i, “ o le saunoaga lea na ‘auala mai i se tusi-fa’aImeli.

“E moni sa le-lava tui ma vaila’au mo gasegase o le ma’i-suka sa iai.” 

Na ta’ua, o se fa’afitauli na a’afia ai le lalolagi atoa.

“E mafua ona ua le-lava vaega ia i le lalolagi aoao ma sa a’afia ai vaega o lo’o ‘aumai ai a tatou tui ma vaila’au mai Niu Sila ma ‘Ausetalia,” o lana saunoaga lea. 

O le Aso Faraile, le Aso 01 o Iulai, na taunu’u mai ai le oka fou a le Vaega o ‘Au’aunaga fa’aSoifua Maloloina e aofia ai vaega ua ta’ua ma o lea ua toe fa’aoloaina ai le Vaega mo Fale Talavai i le falema’i talu mai le Aso To’ona’i, le Aso  02 o Iulai.” 

O tui nei ma vaila’au e mo’omia tele mo le togafitiga o gasegase e ma’i-suka ma isi fa’ama’i e afua mai le ma’i-suka.

Ae le’i fa’amalamalama mai e Leausa, sa fa’ailoa mai e nisi o le atunu’u i le Samoa Observer, e fa’ao’o mai a latou fa’asea ae maise fo’i le popole ona o lea tulaga. 

 “Sa ‘ou i le falema’i ae fai mai, ua leai ni tui ma vaila’au mo lo’u ma’i-suka,” o le fa’aaliga lea a Patolo Lemusu.

“O le tulaga masani lava lea, o le popole ona ua ‘ou matua mo’omia se tui. Pau le tala na ‘aumai ia a’u, ua mae’a ma leai ni tui ma ni vaila’au ma e le-iloa fo’i po’o afea e maua mai ai se isi oka fou mai fafo.” 

Na ta’ua fo’i e se isi tagata ma’i-suka, o le le-lava so’o o ia vaega i le falema’i, ua avea ma popolega tele ia te ia.

“Ua fai so’o lava le leai o ni tui ma vaila’au mo tagata ma’i-suka, ma o tulaga e matua popole ai lava,” o le fa’aaliga lea a se tasi e suafa ia Tofu.

“Ioe, lea tatou te talanoa i le soifua o le atunu’u a’o lea ua leai ni tui ma ni fuala’au, pe o le a fa’apefea nei la matou e ma’i-suka. Sa le tatau lava ona tupu o lenei fa’aletonu.” 

 “’Ou te iloa lava sa tatau ona ‘ave le fa’amuamua i vaega ia, ia mautinoa o lava tui ma fuala’au, ia mafai ai fo’i ona fa’atino galuega a foma’i ma tausima’i.”

By Deidre Fanene 12 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>