E fa’aeaina le tagata e tausi aiga

By Vatapuia Maiava ma Sarafina Sanerivi 12 November 2016, 12:00AM

O Mika Isamaeli o se taule’ale’a 19 tausaga mai le afioaga o Lotoso’a i Saleimoa.  O ia o se faima’umaga ma o lo’o faia nei le faiva o le tausi aiga. 

Ina ua fesiligia e le Fofoga o Samoa le taule’ale’a mo sona finagalo i le tulaga o iai le olaga i Samoa i le vaitau lenei, na ia ta’ua ai, e le’o toe faigofie lava nei aso. 

“O le mea lea ua iai le olaga i lenei vaitau, a e le tigaina e le maua se meaai e tausi ai le aiga,” o le fa’aaliga lea a Mika.  “A le gaioi le tagata, e le mafai ona maua se mea lelei mo le aiga. E le’o se galuega faigofie foi le faiga o le ma’umaga. 

“E pei foi ona tou tau mai i lenei taeao, o lo’o tau fai atu se galuega manū e le’i vevela mai le la. O la’u lava lea matāfaioi. O le fai lea o le ma’umaga ma tausi le aiga.”

Na ia ta’ua foi, o le tele lava o aiga o lo’o alala ai i le latou afioaga, o le ma’umaga lava o lo’o fa’alagolago ai le tausiga o aiga. 

 “E pei ona ta’ua i le amataga, e le faigofie le tausi aiga, ae maise foi o le galue ai i le ma’umaga. Auā o aso ua timuga, o aso foi ua la. Ae po’o le a lava le ituaiga tau, e le mafai ona tu’ua ai le mea e tatau ona fai. 

“O le upu lava a nai matua, a le afu le mauaulu e te le ai.  A e le galue foi, e falōlō foi le aiga. O le ala lea, e galue ai lava ma fa’amalosi auā a o’o foi ina selesele, e manaia lava le vaai atu o fiafia le aiga ona o fua o fa’atoaga.

“O le mea lava lea ua masani mai ai lava aiga i Samoa. E te le fa’alogologo tigā pe fa’alogo atu loa ua ma’i nofo loa. O lou alofa moni lava lena i le tou aiga, o lou tula’i ma galue fiafia.”

E le gata i lea, na ta’ua foi e Mika, o le ma’umaga o lo’o fa’alagolago ai si o latou aiga mo le sailiga o seleni auā mea e fai i totonu o nu’u, aiga ma le Ekalesia.

“E tele lava ina ave fua o fa’atoaga i le maketi e fa’atau e maua mai ai se tupe e fesoasoani i mea e fai i totonu o le aiga.”  E le gata i lea, na ta’ua foi e Mika, o lo’o fai lava lana tautua ma lona mautinoa, e fa’amanuiaina le tagata e tausi matua.  “Na ou ola mai lava o o’u fa’alogo lava i le tala lea, o le ala i le pule o le tautua. E manuia foi le olaga o le tagata pe a tausi lelei matua ma tautua le aiga. 

“O le ala foi lena tusa ai lava po’o le a le faigata o le olaga ma lenei faiva o le tautua, e fai lava auā o lo’o auala mai ai fa’amanuiaga mo a’u.”

By Vatapuia Maiava ma Sarafina Sanerivi 12 November 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>