Taua o le fa’atoaga

By Ulimasao Fata 12 December 2017, 12:00AM

O le ma’umaga o le auala sili lea mo tupe maua I le taimi nei I Samoa, a’o maualuga ai pea le tau o le soifuaga.

O le talitonuga lea o le faifa’atoaga Sa Lauese 42 le matua o lona soifua mai le afioaga o Tuana’i. Na maua le avanoa e fa’atalatalanoa ai le taule’ale’a o Lauese a’o taliu ane I le latou fale fa’atoa mae’a lana galuega mai lana ma’umaga.

Saunoa Lauese o le olaga ua faigata, ae o le a sili atu ona faigata pe a na’o le nofo loa ma le faitio.

“O le olaga a ia lea ua iai Samoa nei ua matua faigata lava ae talitonu mai o le a sili atu ona faigata I le nofonofo ma faitio.

“Ou te talitonu foi o le auala sili lava ona lelei mo le sailiga o le seleni o le toe galueina lea o fa’atoaga aemaise ma’umaga a aiga.

Na saunoa foi Lauese e leai se isi o le latou aiga o faigaluega ae ua na’o le ma’umaga ma le galue o lo’o maua ai seleni aua le tausiga o le latou aiga I lea aso ma lea aso.

“O a’u e leai se to’atula leai foi se fanau, ua na’o o’u uso o lo’o matou nonofo ai I le matou fale ma e leai ni latou galuega o iai.

“E leai ma seisi o le matou aiga e iai se galuega na’o le matou fa’atoaga fa’i lava o lo’o iai nei o lo’o maua ai le seleni ona e matou te sapalai’a fa’i I se aiga o lo’o fai le latou pisinisi chips.

“O le isi auala o lo’o maua ai le seleni o galuega e fai I isi aiga ona maua ai lea o sina seleni aua lava le tausiga o aiga.”

Na ia saunoa foi e vaaia ma le fa’anoanoa le fesua’i uiga o le tau o lo’o iaia nei I Samoa, o se tulaga lelei ma e iai foi le tulaga leaga I mea toto.

“O timuga e lelei e maua ai le suavai mo le mea toto, ae a matagai loa, ua tele le fa’aletonu, ma talosia o le a leai se afa I lenei tausaga.

By Ulimasao Fata 12 December 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>