“... a ua ou momoli atu lo’u loto ia Ieova.”

Tusia Rev. Petaia Setu ,

275 Hits

Rev. Petaia Setu

Rev. Petaia Setu

Ua fai ma ‘alofaga o le toatele o nisi, ona faaaogaina o le ‘ava poo se uaina, e faamatalaina ai sona le malie poo sona loto tiga. E manatu o se malosi lea poo se auala foi e mafai ai ona faasasao atu, ma faamasua uma ai ni ona le malie i se isi tagata. Ae le o le ala lea na tatala ai le loto mafatia o Hana e pei ona maitauina ai e Eli. ‘A ua faapei o upu a failauga o le atunuu – Ua ta’utino le solo a le tamaloa, ‘o a’u o le fafine ua tiga le loto, ou te lei inu i se uaina poo se ‘ava, a ua ou momoli atu lo’u loto ia Ieova.”

 

MANATU AUTU:  “IA FAAMAONI I LAU TATALO”

O le tatalo, o le ala sili lea ona faigofie ma taua e te talanoa ai i le Atua. E faamatalaina lou fiafia, lou faanoanoa, o ou moomooga, ma lou faamoemoe, e ui lava ina ua loa ona silafia mai e le Atua, a o lou loto o loo tulimata’i e lona faamaoni.

O se mea tiga tele le ma. Ua oo lava foi ina ogaoga o nisi faalavelave ua alia’e mai ai. E faapea foi la i lagona faa – tina. E māmā le tautua nofotane, nai lo le mafatia o le fafine ua le fanau. Sisina o le afu i le tautua i le ao ma le po, ae le mātū loimata (i le loto) i le lē vaai i se taui (suli) o le ola tautua. Pagā lea, o moomooga le taulau, e faanoanoa ai le loto.

O Hana, o le fafine o loo nofolua ma Penina ia Elekana. Ua iā Penina o ana fanau tama ma fanau teine. A o Hana, o le nofotane ua faasinosinomia, ma ua ulagia. O le uiga o le igoa o Hana – o le tausaafia. Talofa e, e tausaafia Hana i mea uma i luma o le Atua. Peitai, e le i mafai e lona tausaafia ona punitia lona māasiasi. E le i lilo i lalo lona tiga. A o le mau a le tusitala, o le pule a le Atua na lē fanau ai o ia. Ua tagi le fafine; ua le ‘ai. Ua faamafanafanaina e lana tane. A o le fafine ua tiga lona loto, ua matamuli ia Penina ma fafine uma, ua ole atu ia Ieova, ma ua tagi tele (f.10).

O lona faamaoni, o loo ua tino mai i lana tagi. E iai le maasiasi; e iai le loto tiga. Peitai o le tagi a Hana, o le faamaoni lea na te faamatalaina le faatuatua o lenei fafine, o loo i totonu o lana tatalo poo lona mana’o. O le faamaoni, o le elemeni lea o le faatuatua. A leai se faamaoni, e le mafai ona ta’utonuina lou faatuatua. Ana le faamaoni le loto o Aperaamo i le mana’o o le Atua, po ua le ta’utonuina lona faatuatua.

O le memu o Hana, na sesē ona faauiga e le faifeau (Eli). O le tali a le fafine, ou te le onā; ou te le i inu i se uaina poo se ‘ava. A’o lana tagi, na faailo atu ai ia Eli le faamaoni o lona loto i lona Atua. “….. a ua ou momoli atu lo’u loto ia Ieova”.

Samoa, e loloto le tatalo a Hana! O le faanaunauga ua tuu tasi i le Atua, i le faamoemoe e tasi, a maua – e toe foi i le Atua (f.11) O le faamaoni lea o le tautoga, o loo ua fai nei lava ma lagisoifua o le tatalo a Hana, i lea tupulaga ma lea tupulaga. O lana tatalo, o lona ola lea. O le ola ua tuu i lona lima, e auauna ma tali mălie ai le pule faasoa a le Atua, ma toe ofo alofa ma fai taulaga atu ai i le Atua, o lē e pule aoao i le lagi ma le lalolagi; o lē na te faamasinoina lau tatalo; na te faasoa i le itū aso e finagalo ai; e faamaoni i Lona lava finagalo; o le Atua e tausi mavaega i lau tautoga.

Ua iloa lelei e Hana e pule aoao le Atua. Manatua, o mea uma e pule ai le Atua, e tautalatala i le silisili ese o le Atua; e molimau i Lona mamalu (Salamo.145:3-7).

A o le tagata, o le tagata galue, finau, tauivi; auā e faaosoosoina, e luitauina, e tofotofoina i aso uma. O le ata lena o le tatalo a Hana – e finau, tauivi, e pei foi o le tatalo a le perofeta o Elisaia, e galue (2 Tupu.4:34).

O lona uiga, e mai le Atua ona lē fanau – ae mai le fafine ona ola finau (tatalo). ‘A faapea uma o tatou fafine – oka se manaia o Samoa! E le toe faitala i ni mea leaga, ae tautalatala i le faaolataga.

Samoa, na o le tatalo tatou te fesilafai ai ma le Atua. Ae ou te tautino atu ma le faamaoni, e le o tatalo uma e faafofogaina e le Atua (Iakopo.4:3; Faata.28:9; Iakopo.1:5-7; Lk.18:11,12,14).

O le isi lea vaaiga i Aso Sa. Ua faatuatuai tagata i le lotu seia uma le tatalo. Afai ua ila le faalogo a tagata, fiu i punou, gase e tootuli, lelavā nofo i le umi o lau tatalo – se a lona uiga? Fai mai Iesu – “Aua le tautū i upu o le tatalo; e le o le tele o upu e talia ai (Mat.6:5-8). Fai mai le isi loomatua – short and sweet, ‘ia itiiti au upu’ (Failauga.5:2). O le tautū o loo ta’ua e Iesu – o le faamamapo, teu lumāfale; o fausaga na o tatalo a le au faresaio. ‘Aua le taamilomilo, auā ua silafia e le Atua, e susua au upu, ae maa’a lau amio; e suamalie lou leo, ae e te le faaola tagata. Fai mai Solomona, afai e te le faalogo i le Atua ma tausi ana poloaiga, e inosia e ia lau tatalo (Faa.28:9). O manatua le tatalo a le telona (Lk.18:13)? Manatua le tatalo a Iopu? Manatua le tatalo a le pagota i luga o le satauro? O ‘e maitau maia le tatalo a Hana? Ta’u sa’o i le Atua. ‘Aua le faainuinu le tatalo e le o se tulafale o loo e tatalo iai. Tatalo ma le loto faatuatua; ‘aua le masalosalo, auā e le aumaia ai e le Atua se mea e tasi i lau manao. (Iak.1:7).

E taūa le ola tatalo; ae sili ona taūa lou faamaoni i lau tatalo. E le o le faavasegaina o vaega o le tatalo, poo le tau faapaleniina o vaega o le tatalo – LEAI. E le o oe poo a’u o loo tatalo iai tagata – a o le Atua, o lē na te silafia loto o tagata uma.

Tinā, a prayerful mother is a powerful mother in the Lord. O lau tatalo e manuia ai aiga; e maopoopo ai nuu; e fealofani ai tagata uma, e tupu ai le ola faaleagaga. Ta’u I le Atua mea uma ua e mafatia ai. Faailoa I le Atua lou loto ua iai le talitonu ma le faatuatua. E le na o Hana e faafofoga iai le Atua. O loo silasila mai o ia I lou loto. Tatalo Samoa, tatalo. Auā e mafaia mea uma ile tatalo ua iai le faatuatua. Le loto ua faamaoni. Ua uma ona momoli mai e le Atua lona faamaoni mo tatou Samoa  -  ua uma! O luga o le satauro!

O le a faapefea nei a’u ma le Atua? Ae faapefea ona momoli atu lou loto ia Ieova?

 

Amene. 

© Samoa Observer 2016

Developed by Samoa Observer in Apia