1. Matauina i Tala Fou se ulutala fai mai ua toe faauiese moliaga e faasaga i se Minisita! O lea la ulutala- e faasino i le Minisita o Leoleo-o Salā Fata Pinati-lea fai mai na savali ese ma le Faamasinoga ananafi-o se tagata ua sa’oloto!

O lea la faamasinoga- e faasino i se faaiuga-ina ia faauiese ma faaleaogaina moliaga tau faiga-palota e 17 -e faasaga ia te ia. Fai mai e 12 moliaga o le tau faasese-a’o le’i faia le faaiuga ananafi.Fai mai o lea mataupu sa fofogaina i totonu o le Faamasinoga Faa-Itumalo i luma o le Alii Faamasino-o Fepulea’i Ameperosa Roma-ae peitai- o le Alii Loia o Leulua’ialii Tasi Malifa-o le Loia lea a le Itu Tagi-o Salā Iose McCarthy-lea na talosagaina ina ia faamuta lea mataupu.

Sa faailoa atu e Leulua’ialii i le Faamasinoga-e faapea o lea mataupu ua mae’a ona toe teuteu i le va o le itu talosaga ma le itu tete’e-ma o lea ua latou manana’o ai e faamuta loa lea mataupu. O le faaaliga foi a Ruby Drake-o le Loia lea a le itu tete’e-e lē teena foi e lana paaga le talosaga.

O lea na talia ai loa e le Faamasino o Fepulea’i lea talosaga. Ina ua mae’a lea faamasinoga-sa faaalia e Sala Iose-e tatau ona ia fausia le fautuaga mai Tamalii o le nuu o loo i Savaii…! Ia- o se tala fou lenei e umi tele-ae afai ua mafua uma nei vevesi ona faiga sese na fai i le taimi o le faiga-palota-sa tatau lava ona faaauau e le Faamasinoga ina ia mafai ai ona mautinoa le mea moni-ma ia ‘aua ai nei toe faia ni mea leaga faapenei i taimi o faiga-palota.

I se tasi foi itu-afai e manuia se taumafaiga a se tasi ona o ni faiga pi’opi’o-ia manatua la-ua na faaseseina le itumalo-ma afai la o loo pagatia le itumalo i le mativa ma le le tagolima-e mafua ona o le fai o le mea sese -ae tu’u le mea moni e manuia ai le itumalo ma le atunuu atoa!

Afai la o le mea lea sa fai e Sui Tauva uma i le faiga-palota talu ai nei-o le upu moni la-o lea ua amata ona faagasolo mai le taui-o le le faia o le amiotonu- e tusa ai ma le finagalo o le Atua-o loo faavae ai le Malo Tuto’atasi o Samoa! .

O lea ua amata i le siitia o le Tau o le Soifuaga-ae le ona pau ai lena! E i ai le isi anoano lea o le a mulimuli mai-talu ai le le mafai e le atunuu ona fai le amiotonu ma le faamasinoga-ina ia manuia ai! O le a sou taofi?

2. Matauina foi i Tala Fou se isi ulutala fai mai-“Ou te le’i pepelo”-ma o lea ulutala- e faasino i se saunoaga a le Afioga i le Pāpā-o Le Tagaloa Pita. O le faaaliga la a Mata’utia Iefata fai mai-“E le mafai e lo matou nuu ona talosagaina le Pāpā e fai sana monotaga. Matou te tautua ia te Ia. Ae poo le a lava-e le mafai ona taofia ai o ia mai le tuuina mai o se fesoasoani e ala i lona finagalo malie. Ae afai la na te tuuina mai sona sao-o se meaalofa lea.”

Ia –afai la ua amata ona masofasofa faavae popo o nuu ma afioaga-e mafua ona o polokiki leaga! Ae o le mea e ofo ai-e peiseai ua talia e le tele o afioaga ma alalafaga o le atunuu lea tulaga! O lona uiga-ua pule le polokiki-ma o le polokiki leaga lava lea- ua na pulea le tele o nuu i aso nei!

Ma e le o se mea foi e tatau ona tatou sua matamuli ai-ae ua matua tatau ona faasa’o-a’o maua le avanoa! Afai e leai se faiga lelei ma le mautu e togafiti ai faiga tau polokiki leaga-ona taunuu ai lea o le manatu o isi-e uma ane-ua nonofo Samoa i luga o le sami-ae pulea atoa e le faigamalo ma ana polokikii leaga le atunuu atoa! O le a sou taofi? 

Matauina foi i le Ulutala-Talanoaga i le Ala-o loo fesiligia ai pe i ai se matafaioi a Ekalesia e tatau ona fai pe leai-e tusa ai ma le mativa ma le le tagolima o le atunuu ua i ai nei? O le matau la i finagalo faaalia e tusa ai ma lea Talanoaga i le Ala-o finagalo o le ‘au-matutua fai mai-“e tatau ona fesoasoani ekalesia i tagata matitiva-ma fafaga i latou o loo fia’a’ai. E manatu foi isi o i latou ia-‘e le o se matafaioi lea a le Ekalesia-fai mai e leai se fe’au a ekalesia i faafitauli o loo tulai mai nei-ae tatau ona fesoasoani e saili ni galuega mo tagata o le atunuu.

O le manatu la o loo tu-matilatila mai lea Talanoaga i le Ala-fai mai-‘e le o se galuega lea a le Ekalesia a’o le galuega a le Malo. Fai mai le manatu o le isi-‘ua tele le taimi ua alu i le tusitusi-lima- ae leai se mea o faia mo le manuia o le atunuu.

Ia-pule lava oe ma lou finagalo-ae o le finagalo o se tina matua e pei ona faaalia ai-‘fai mai -ua faigata i nei aso ona faatulaga e ekalesia le latou matafaioi e tatau ona fai-e fesoasoani ai i tagata matitiva-ae le o le ao atu o tupe a le ‘au-matitiva! Ia-e pule lava le tagata ia i lona finagalo faaalia-ae ia manatua foi-o ekalesia e mo le soifua faale-agaga o le atunuu-ae o le faigamalo-o ia tonu lava lena- e gafa ma faafitauli uma nei ua tatou feagai ai e pei o le mativa ua i ai nei le atunuu- ma le anoano o isi lava faafitauli e pei ona tulai mai nei-o le gaoi-talepe fale-toso teine-fasioti tagata-faiga faa-Sotoma-aemaise ai o le mata-i-fale ua sasao faa-afi i nei ona po! O le a sou taofi?