LAUGA - “A o lona tinā, ua taofi ia mea uma i lona loto”

Tusia Rev. Petaia Setu ,

158 Hits

Rev. Petaia Setu

Rev. Petaia Setu

(Luka 2:51)

 

E iai lava le au faitau lauulu. O upu masani a toeaiina, e ‘ese lē faalele ‘ese lē maitau. Ia a o tatou foi  ua tele lava foi ina tatou popoto e maitau leaga ma faaletonu o isi, ae galo o latou sao taūa ma o latou aogā i aso e tele, a ea?

E le faapea la le vaai faa-tinā a Maria i lana tama. Soo se mătua lava na te tulimatai ma maitau āga ma uiga o le atalii poo le afafine i lona ola tuputupu a’e mai lea laasaga i le isi laasaga.

E le gata e maitau ona uiga ma lana amio a o lona loto foi ma ona foliga. E le faigata ona pu’e e tinā, auā o ia e sili ona mafana le mafutaga male tamaitiiti i taimi uma ma aso uma o lona ola tupu a’e. soo se taga lava la a le tamaitiiti, e le masepu i tinā. Lea foi e alia’e i le lesoni nei i le vaai ma le faalogo a Maria i lana tama. Fai mai Luka, “a o lona tinā, ua taofi ia mea uma i lona loto.”

Atonu ua faigofie ona tatou malamalama i le uiga ma le natura faa-tinā i upu ia a le tusitala ua fai ma a tatou mătua. O lona uiga, e mamafa le avega a tinā. E le gata ina maitau, ae atugalu ma popole i aso o sau (Luka.1:66).

O Maria, ua tumu i upu ma faaaliga eseese o loo ua faailo mai ai ia te ia le lumanai o lana tama. Na afua mai i le amataga ina ua totofi o ia e fai ma tinā o le Faaola i lona taupou (Luka.1:28-33).

O le fai ma tinā, o le fai lea ma amataga fou. E talitalia iai le ola fou. Auā e le tau faamatalaina le natura o tinā, o le ola ia o mea uma.

O mea uma ia o loo ta’ua e Luka Samoa, o mea lelei. O mea lelei, o mea e fiafia iai le Atua. E mālie i le Atua. E ta’uleleia i lana silafaga. O mea ia ua finagalo ia iai. Auā o tatou ua vaai i măsei; ua taofi ai i le loto ma le mau mea e le lelei, ua saga faatupu mai ai ia te oe i le olaga nei.

Ua ia Maria le agaga faa-mătua e āuāu i fanau. Ua le i vaivai ai i le pefu ma le mamao o le ala. e le i fiu i le tolu aso o saili le tama. Ua atili ai ona fou pea le malosi i le tā tā logo mai pea o leo o faamanuiaga ma faailoga ua pupula iai ona mata.

“Amuia oe i fafine!” Aemaise ai, e le o se tagata, a o le agelu na logo mai ia te ia. E le mafai ona te’a ese i le loto o le fafine auā, e tulaga ese lea faamanuiaga ua folafolaina. E le tatau la ona faatalalē i tiute faa-tinā. O mamalu uma ua ta’ua mai o le tama lea, ua o se logo tagitagi i taliga o le fafine i aso uma (Luka.1:31-33). Ua mafaufau ai pea i lona loto (Luka.2:19). 

O le tali a le tama, Aisea lua te saili ai fua ia te au? A fua i le tolu aso o su’e ma le tigaina i le la ma le mamao o le ala, ae faaali mai le poto lea, i ō tatou lava manatu faa Samoa, ua feiloai ma le ulu lapalapa.

E le manaomia nisi faamatalaga. Ua leaga a’e tagata. A o le mau a Luka ia Iosefa ma Maria, ua ofo! E le o se ofo i le gutu oso, ao lona poto (f.47). ua momoo i le fale o le Atua ae faato’ā sefulu lua tausaga le mătua.

O nei mea uma e pei ona faamatalaina e le tusitala ua teu i le loto o le tinā. E le o le lagona lea e ta’atele  i tinā o Samoa, faatali sei oo i le fale. E le o le taofiofi se i faapā mai i se taimi. Leai. Ua i le loto o Maria le faautauta. Na te iloa lona tulaga.

E to’a ia te ia le āu. O ia o le puluvaga, o le ola o mea uma lava. Ua pupula ona mata. Ua iloa i valoaga. E le tala tama, pe faaviivii lana tama. Ae ua teu i lona lava loto, foliga ma amio na fanau mai i lona manava. 

O uiga tausaafia ia o lenei tamaitai. E le tiōa  filifili e le Atua e fai ma ona auala mai le lalolagi. E filemū, e le gaioiā. E talitonu i valoaga; e faatuatua foi i le Atua o ona tupu’aga. Sa taumulimuli ma tu’i  pea le mulipapaga, oono ma tagi tu’i i tiga o lana tama. O le alofa moni faa tinā, e le i fefe ile ma. Sa moomoo e tauave faatsi tiga.

Samoa e, ua tele tinā ua faakerisianoina; ae le toatele ni tinā e faatuatuaina. O tinā uma foi e lolotu, ae le o tinā uma e talitonu. E le o le aso ’e taūa, a o oe tinā.

O le loto o Maria, o le loto ua uma ona tapena, ua lava saunia. O le loto e teu ai le faamoemoe fou. E taofi ai le moni male faamaoni o taeao. E  teu iai mālo o le onosai ma le faapalepale. O loo taoto ai le ola ma le manuia o le lalolagi uma.

Ioe, faato’a matala lava le loto lea ina ua toe tu Iesu. Ua gagana ai le tinā sa seu i fale văai. Ua alia’e mea uma sa teu i le loto. Ua tini valoaga. O lana nofoaiga e faavavau; o lona malo e leai sona gataaga.

O le seu faatali lea a lenei tinā. Sa taofi ma le faatuatua i lona loto, e tautala mai aso e pei o le igoa ipu a le tamaloa Satupaitea. O le tala a Luka, Sa iai male tinā nei i le taimi na afio a’e ai Iesu ile lagi. Sa lotolotoi ai i mafutaga tatalo ma le loto gatasitasi (Galuega.1:14). Sa faatali male loto ua saunia le o’o mai o le Agaga Paia, e taitai ma pulea lona soifuaga faa-tinā. E sa’o lava le agelu, Amuia oe i fafine!

O le fesili, E maua i Samoa ni suli o le fafine lea? E ofi i lou loto ni lelei mo lou aiga ma nisi tagata? E iloa i fea ua tauleleia oe e le Atua i lou tulaga faa-tinā.

Tinā e, na tofi e le Atua Maria ona e mata’u i le Atua. E afua mai i lona taupou seia faaiuina le galuega a le tama na fanau mai i lona manava, sa ia taofi i’u maea. Aisea? Telē le loto. Sa onosai ma tulimata’i auā e telē le loto. E le o se loto fai taua, a o le loto su’e mālo. E mata’u i le Atua. O le tinā lelei, e mata’u i le Atua. E le o le ofoofo tetele i mea fai a faalapotopotoga ma nuu ma le lotu e iloa ai sou lelei, Leai.

E le o le leotele i le ola ma le malosi o fafine nofo tane ma fafine tautua lotu e iloa ai sou lelei, e misi atoa. E le o lou faamăite ae pologa uma ai ma isi.  Vaai i le tinā nei, sa aiaiuli i faiva o tama tane. Na oo lava i le tuugamau le alofa faa-tinā e le i mate. Auā sa taofi i le loto mea uma ma le faatuatua, e pale. La lea ua a’e! Ua toe tu! Ua afio a’e! Ua pale! Ioe, o le ata a le Atua, ma le oloolo pitovaa a tinā.

Samoa e, e le o se pologa tinā. O le fesoasoani i le vaivai ma le lē atoatoa o tamā. O le malu o fanau. O le atoaga o aiga. O le ola o mea uma. Ua sili i soo se computer e teu ai manatu ma mafaufauga, o uiga ma amioga, o foliga ma le ola o tagata uma o le aiga. Fai mai Luka, “a o lona tinā, ua taofi ia mea uma i lona loto.”

 

Alofaaga mo tinā uma o Samoa,

Ia manuia le Aso Sa o Tinā

 

Amene

7737063/7783782

© Samoa Observer 2016

Developed by Samoa Observer in Apia