O le ala i le pule o le Tautua

By Sarafina Sanerivi ma Ilia Likou 14 October 2016, 12:00AM

O a fa’atinoga e faia mo le lelei alualu i luma o Ekalesia ma so’o se afio’aga e le’o lea le fa’apogai o le mativa i Samoa nei.

O lea le talitonuga o le tamā i a Togoi’u Misiki o le afio’aga o Sasina i le fa’atalatalanoaga ma le Fofoga o Samoa i le aso ananafi.

O Togoi’u ua 88 le matua o lona soifua.

Na ia fa’ailoa i le Fofoga o Samoa lona te’ena ai o le tele o manatu o le to’atele e fa’apea o le tele o mea fai o le lotu ua mafua ai le matitiva o tagata.

 “E pei ona silafia ai ia o le olaga lava ia o le Samoa o le ‘au’auna po o le tautua.

“E le pepelo lea tala, ma o le ala i le pule o so’o se Samoa ina ua iloa ona ola e tautua ma ‘au’auna mo isi tagata.

 “O lea le olaga ma le soifuaga o so’o se tagata i totonu o so’o se afio’aga ma le ekalesia.

 “O totonu lava ia o Samoa e pei o le aiga e amata ai le tele o vaega uma, a lelei lava nu’u ma afio’aga ta’itasi o le lelei fo’i lea o so’o se vaega.

 “Ae a fa’aletonu le tele o vaega ia o le a le taumate fo’i le tulaga e o’o ai i le lumana’i.

 “O le  galulue fa’atasi o so’o se itutino ia o le manuia e o’o i ai taumafaiga i so’o se vaega.

 “O le isi tulaga o lo’u talitonuga e ao lava ona a’oa’oina lelei tamaiti mai lo latou laiti se’ia o’o ina matutua.

 “O lea le fa’amoemoega tele o le atunu’u ma so’o se vaipanoa o le aganu’u lenei, ma e ao ona silafia lelei ona sologa lelei lava lea o aso uma.

 “E ao lava fo’i ona fai i tatou tagata matutua ma fa’ata’ita’iga lelei o a tatou fanau i le lumana’i.

“O lea le galuega e ao ona fai fa’atasi ma felagolagoma’i ai. E le mafai ona iloa pe fa’afefea ona fa’atino e fanau vaega nei pe afai e tatou te nonofo ae le fa’ailoa atu i a’i latou.

O lona finagalo o le tele o tu ma aga le talafeagai e afua mai i le lelei o tupulaga talavou.

 “E pei ona fa’asoa muamua atu e amata mai lava i aiga, ma o a amioga o lo’o ua tatou maitauina i fanau e pei o aiga o lo’o amata mai ai lava.

 “A fa’aletonu lava matua i la  latou galuega i fanau ia o lena lava, o le tele o le mau fono o lo’o tatou faia nei, ia e matua’i leai lava se fesoasoani i le fanau.

 “Ia o le galuega fai fa’atasi, e i ai le pito a matua, ekalesia, minisita, matai, faiaoga ma le malo e fesoasoani ai mo nei vaega e pei ona ua tula’i mai.

By Sarafina Sanerivi ma Ilia Likou 14 October 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>