Ta’imua le alofa

By Ilia L Likou 14 October 2017, 12:00AM

O Lio Leipa o se tamā mai le afio’aga o Le’auvaa.

Na maua le fa’atalatalanoaga ma le Fofoga o Samoa i le aso ananafi o aga’i i faigaluega i le faia lea o  lo latou togāla’au aina.

Na ia fa’ailoa e ui o lona matua, ae le mafai ai lava le fiafia e ola e galueaina le lauele’ele aua o lea lava le tulaga na ola ma soifua mai ai.

“Ia e mo a’u lava ia ia o lea lava le soifuaga na masani ai, ua matutua fo’i si a’u fanau ae le fa’apea la ua ou sau ou te faigaluega ona o se isi tulaga.

“E leai, o le maua lava o le malosi ma le soifua maloloina lelei aemaise ai le fesoasoani i aiga i lenei vaitau o le taugata o le tau o le soifuaga.

“O le itu sili lava lea ona taua i a te a’u lava ia.

Na ia fa’ailoa o le alofa lelei i aiga o se itu taua lava lea.

“I a te a’u lava ia o se tamā i totonu o aiga e pei o lea lava le itu taua i a te a’u lava ia ina ia mafai ona maua mai le agaga fiafia mo a’u ma le fanau.

“A e alofa i lou aiga, ia o le faia o galuega e fesoaosani ai le fanau, aua e pei ona fa’ailoa atu ua le toe faigofie nei aso.

“Ae o le galulue fa’atasi o se itu e pito sili lea ona taua i lo’u lava ia iloa i ai, e ao ai lava ona galulue fa’atasi ma o le itu taua lava lea i a te a’u lava ia.

Na ia fa’ailoa fo’i o so’o se aiga lava e leai se alofa o i ai e le i’u manuia.

“Aepeita’i o le nonofo fa’atasi ma fiafia fa’atasi ia o le lelei fo’i lea o le gasologa ai o le soifuaga o lo’o tatou soifua ma o tatou ola ai nei lenei lalolagi le tumau.

“Ia ma a ola ane fanau, ia o le alofa fo’i lava e ta’imua i a latou taumafaiga uma.

By Ilia L Likou 14 October 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>