Saunoa le Tama ia Fautua Fautua mai le alalafaga o Vaitele Fou, o le ki o le olaga nei o le faia lea o filifiliga lelei ma le sa’o.

Na saunoa foi le Tama ia Fautua 40 le matua o lona soifua I le taua o le filifiliga ma le aoga I fesili o faigata ai le olaga I Samoa nei.

O le Tama ia Fautua o lo’o faigaluega nei o ia I le kamupani Sikulati o le KL Security.

Na ia saunoa foi I le maualuga ai o le tau o le soifuaga ua iaia nei le tatou atunu’u ua pau le aua e fa’afaigofie ai mea uma o le fuafua tatau lea o le fa’aaogaina o le seleni ma le malamalama lelei I mea e tatau ona fa’amuamua.

“Talitonu o le olaga lea ua iai Samoa nei ua matua taugata lava le soifuaga.

“O le tau o oloa I faleoloa ua fa’apena ona matua taugata ma ua leiloa le mea a fai iai. O le isi itu e talitonu foi le manatu o le isi itu e faigofie ai mea uma o le olaga o le iloa lea ona fuafua o le seleni.

“Ou te talitonu foi o le ki lava lea I le olaga lelei o le fuafuaina tatau lea o seleni fa’aalu I mea fai a aiga.

“O le silafia foi o le mea e taua o le isi lea mea sili ona faigofie aua le olaga ua tatou iai.

“E iai taimi e te’i lava le tago atu ua leai se tupe, ae fa’atoa maua mai se seleni.”

Na ia saunoa foi ua tatau I tagata Samoa ona fa’aaoga lelei le seleni I mea e matua mana’omia ae le’o le mea e mana’o iai.

“A e vaai atu o lo’o le gafatia ona e tausia lou aiga, ona tu’u lea o le fa’atauina o le fagu pia aemaise le sikareti.

“O le mea sa’o lava lena e tatau ona fai, afai e te le mana’omia ina, ia aua le fa’ataua, o le uiga tonu lena o le malamalama I le mea taua ma le mea e le taua.

“O le isi mea lena o lo’o tele ina tupu I totonu o aiga, o le fa’ama’imauina lea o le seleni e tupu ai le mafatia.”

Na fesiligia foi le Tama ia Fautua I sana fautuaga mo tagata Samoa o lo’o saili manuia pea, na ia taua ai le taua tele o le ola a’oa’oina.

“O le ki o le olaga lenei o le ola a’oa’oina.

“Ou te matua talitonu lava o le a’oa’oina o le fanau laiti aua a tupu a’e, o le a manuia olaga ma maua galuega e tausi ai aiga.

“O le a’oa’oina o le fanau I maota ma laoa e ala lea I fa’aiuga lelei ma le sa’o, o le a mama ai foi le galuega pe a matutua ma fai o latou aiga.

“O sa’u lea motu ga’afa I le olaga lea ua iaia nei si o tatou atunu’u o Samoa.”