Lelava le fa’asoa

Tusia Ioana Tupa'i ,

27 Hits

Luafaleali’i Vili.

Luafaleali’i Vili.

O se tinā e toafitu ona alo mai le afioaga o Manono sa ia faailoa lona atugaluga e tusa ai ma le leai o se galuega a lana tama teine laititi.

Sa ta’ua Luafaleali’i Vili o se tinā 62 tausaga le matua, nao lona toalua lava o loo faigaluega i lo latou aiga ma o lona totogi e maua mai i lana galuega lē lava mo le tausiga o le latou aiga.

“Sa tuuina atu tusi apalai a la’u tama teine i Kamupani pei o Eveni ma le McDonald’s  ae peitai e o’o mai lava i le taimi nei e lei maua mai lava se tali. 

“O si a’u tama e 19 tausaga le matua ma e tasi lava lana mataupu e lei pasi ile tausaga faavae a le Iunivesite i le Papaigalagala, ae o loo iai le fuafuaga e toe agai e faauma i le tausaga nei.

“E vaaia pea e si au tama le tulaga faigata ua o’o iai le tamā o le aiga ona ua matua le soifua ma o le ala lea ua naunau ai lava o ia e saili se galuega.

O le tamā o le aiga e galue lea i le fale talimalo o le Tanoa Tusitala ma sa ta’ua e le tinā e utiuti lava le fa’asoa i le taimi nei e ono faatino ai le lesitala a si ana tama i le Iunivesite Aoao o Samoa ina ia mafai ona faamaea ana pepa o loo totoe ma faau’u mai ai ma agai atu loa e saili se galuega lelei.

“O loo naunau lava si a’u tama e toe fa’auma lana aoga ae peitai a tu’u mai i le faasoa e lelava le seleni maua e faatupe ai lana aoga i lenei tausaga.

“E resitara lava i kuata uma ma e sili atu lava ma le $100 tala le seleni e faaaluina ai ae le aofia ai lona pili aoga, ou te leiloa poo fea o le a maua mai ai le seleni.”

I le taimi nei o loo aumau ai le tinā ma lana fanau toalua ae o le isi to’alima o le fanau ua aumau lava i latou i aiga o latou ta’ito’alua.

“E faigata ona ou tagi isi au fanau matutua ona o lea foi ou te iloa le tulaga ua o’o ai i latou i le tausiga o latou aiga faapea ai ma matua o latou lava taitoalua. 

© Samoa Observer 2016

Developed by Samoa Observer in Apia