E tauia pe ā galue
O le faaupuga faigofie lava e faamatala ai le soifuaga i Samoa nei , a e le faigaluega e te tigaina.
O le talitonuga lea o le tamā ia LJ Leota, 29 tausaga mai le afioaga o Lepuia’ii Manono – Uta.
E talitonu lava Leota a lē faigaluega le tagata i Samoa nei e tele lava faafitauli e feagai ma ia.
“I Samoa nei ua siitia le tau o le soifuaga ma a e tatau ona faigaluega le tagata ina ia mafai ona tali atu i nei faafitauli.”
“O le toatele o i tatou e faigaluega e fesoasoani i le tausiga o aiga ae e galueina foi le laueleele e ala i faatoaga aua le itu tau le taumafa.”
“O a’u o loo faamoemoe iai le tausiga o si au fanau e toalua faatasi ai ma le matou aiga potopoto.
Sa maua atu e le Fofoga o Samoa, le tama ia Leota ua agai atu i le fale i le maea ai o galuega i lana faatoaga.
Sa ta’ua e le tamā o le aso Toanai o lona aso e malolo mai ai ana galuega ma o le ala lea ua agai ai le ma’umaga mo le tapenaga o se meaai mo lona aiga.
I le taimi nei sa faailoa ai e Leota pau le tulaga o loo manaomia ai le fesoasoani o ni mea faigaluega e faatino ai ana galuega i lana faatoaga.
“O loo lelei mea uma lava i totonu o lo matou aiga pau lava lena o le vaega o loo manaomia ai le fesoasoani o ni mea faigaluega e faaaoga mo lau faatoaga.
“O lau ma’umaga o loo fesoasoani tele lea i le itu tau le seleni maua a lou aiga ae o le faafitauli lava lena o loo feagai ma au ona o le leai o ni mea faigaluega e faaleleia ai lau faatoaga.
“O le tulaga i le auala o loo agai atu ai i lau faatoaga e le’o lelei o le ala foi lea o loo manaomia ai se uilipaelo e faafaigofie ai ona aumai au meamata mai lau faatoaga.
“I lou lava manatu aua le faavaivai ma le fiu gofie i le tulaga o loo ua iai nei le siitia ai o le tamaoaiga.
“E ao ona galulue faatasi ina ia mautinoa o loo mafai ona tausia o tatou aiga e ala I galuega ua o tatou maua.
“E leai se isi faamanuiaga pitosili ona taua I lo tatou galulue punouai I le tausiga o tatou aiga I lenei vaitau faigata.