Ono fa’aititia totogi o foma’i

Tusia Ilia L Likou ,

57 Hits

Peresitene o Fomai i le atunu’u i a Lauano Dr. Herbert Peters.

Peresitene o Fomai i le atunu’u i a Lauano Dr. Herbert Peters.

O le tu’ufa’aititia ai o totogi o fomai o se mataupu o lo’o ua fuafua i ai le malo i le mae’a ai o le tu’ufa’atasia o le Matagaluega a le Soifua Maloloina ma le Auaunaga a le Falema’i.

Na mafai ona maua le avanoa e feso’otai atu ai i a’i latou o lo’o ua galulue Fa’afomai i totonu o le atunu’u e fa’atatau i lea fuafuaga e pei ona ua fa’aataata mai nei e le malo.

Ina ua fesiligia le Peresitene o Fomai i le atunu’u i a Lauano Dr. Herbert Peters na ia fa’ailoa o lo’o ua fa’alogo i ai le taimi lenei i lea fuafuaga.

Sa ia fa’ailoa o lo’o ua fuafua la latou fonotaga ma le Minisita o Tuitama Dr. Leao Tuitama e fa’atatau i lea fuafuaga.

“O le itu lea o lo’o ua silasila i ai i le taimi lenei pe fa’amata e fa’amaonia lea tulaga pe leai fo’i.

“Mo le silafia ai, ia e leai lava se isi e manao e fa’aitiitia sona totogi i le taimi lenei.” 

Na fa’afeso’otai le Minisita o le Soifua Maloloina e fa’atatau i lea tulaga ae lei mafai ona maua se tala mai.

Ae na fa’ailoa mai e se tasi o sui sinia o foma’i le atunu’u Motuopua'a Dr. Aisoli Vaai e fa’apea afai o lea le finagalo o lo’o ua va’avai atu ai nei le malo, o se tulaga e le talafeagai tele lea itu.

“O so’o se falemai e i ai lava le auivi mo le fa’atulagaina lelei ai o totogi ma nisi o vaega e mana’omia, ma o se faanoanoaga tele pe afai ae tula’i mai lea fa’afitauli.

Sa ia ta’ua o le isi lea fa’afitauli o lo’o ua to’atele ai foma’i ua solomuli la latou auaunaga i totonu o le matagaluega  ma le auaunaga fa’alesoifua maloloina.

 “E pei o lea lava le tulaga o lo’o ua maitauina i le taimi lenei, o le tele o foma’i  fa’au’u mai, na o le uma lava o fa’auuga agai atu i atunu’u e mamao, ma o lo’o tupu mai lava lea tulaga e o’o mai le taimi lenei.

“I so’o se atunu’u lava, o totogi o foma’i e tatau lava ona maualuluga aua fo’i o lo’o talanoa i le ola ma oti o le tagata soifua, ma o la latou matafaioi lea e ala ai ona taua tele la latou auaunaga.

“E matuai le lelei le tilotilo atu i lea tulaga i le malo i le taimi lenei, e pei e foliga mai e le’o aga’i i luma le malo o lo’o alu solomuli i tua.

O ripoti talu ain a fa’ailoa ai  ele Fa’atonu Sili o le Matagaluega o le  Soifua Maloloina i le fa’atalatalanoaga ma le Leitio Fa’avaomalo i Niu Sila, Leausa Dr Take Naseri, e fa’apea, e i ai le  talitonuga i le telē ai lea o se la’asaga lelei o lo’o ua silasila ai nei le malo pe a toe tu’ufa’atasi le Auaunaga Fa’ale-Soifua Maloloina.

Na ia fa’ailoa e tele nisi o fa’afitauli ua maitauina mai le tu’u ese’eseina ai ma o le mafua’aga lea ua toe fuafua ai nei mo le tu’u fa’atasia ai.

Ina ua fesiligia e le Polokalame ma le 2AP le afioga i le Alii Palemia, Tuilaepa Sa’ilele Malielegaoi po o a ni mataupu i sa latou feiloaga ma le Matagaluega Fa’asoifua Maloloina i le vaiaso ua tuana’i, na ia saunoa ai o se avanoa na momoli ai le agaga fa’afetai i fomai ma e tausi soifua o le atunuu ona o la latou auaunaga fa’aauau pea.

“Manatua o le amataga  lenei o le tausaga e pei ona laugaina i le pulelaa o le isi auala foi lea e masani ona ave ai e le ‘au faigaluega Paia ale Atua i tagata o le tala lelei i tagata lotu, o le taimi lenei e fai ai upu na.

“O le foi o makoi e ese le auala na foi ai ua le toe foi le ala lea na omai ai , aua ua lapatia e agelu a le Alii le auala na omai ai ona o le tele lava le faaletonu o i ai.

“O lae e i ai Herota aua o lo’o fia  alu e asiasi le pepe o le kirisimasi ae leiloa e alu e fasioti le pepe o le Kirisimasi.

“Lea e fai ai le feau e sui le tausaga sui auala, o le auala lena o le ala lena na ala ai la matou feiloga ma alii ma tamaitai tausi mai, ia ma toe matimati galuega o lenei tausaga afai na i ai ni faaletonu le la tausaga ia tuu ese i lenei tausaga.

“O le fa’amalosiau lena ale malo ma a’u le ta’itai le malo male kapeneta e fa’afetai ai aua e seasea maua ni upu faafetai i lo tatou falemai, aua o le a le lelei o le falemai ae faitio faitio lava tagata.

“Ia e le mafai ona fa’amalieina tagata uma, ae aofai ai ma tatou uma , o tagata o le malo, e le ese ai Samoa.

 “E faapena i atunuu uma temokalasi e fulusia e tagata toatele le fa’afoeina o le malo e saoloto ai lava tagata e faitio, o uiga ia o faigamalo temokalasi o le saolotoga i o latou lava finaglao o le uiga la lena o si a’u fa’amalosiau.

“E tele le mau fuafuaga a lo tatou malo o fuafua i lenei tausaga aemaise o le tausaga nei.

I le saunoaga ai a le Ali’i Palemia i le atoaga o le 100 tausaga o le Auaunaga fa’atausi Soifua i le atunu’u na ia saunoa ai e fa’apea;

“E le uma pea le agaga faafetai, pe a manatu i lenei aso ma le faamoemoe, ua tatou potopoto mai ai, o le faamanatu lea o le 100 tausaga o le tautua ma le auaunaga faa-Tausi Soifau i totonu o si o tatou atunuu,” O lana saunoaga lea.

“Tatou te manatua ai lava ma le loto faafetai tele i le Atua, ona o i latou o e sa mua’i asa le gāsū o le taeao. O faletua ma tausi, o tina ma tama’ita’i o augafaapae faapelepele a aiga, afioaga ma alalafaga, i latou to’agaogao, loto tetele sa mua-i-malae i le faatinoina o lenei auaunaga. 

“I latou sa gasea ma le le faalogologotiga, le fefefe ma le solomuli i le faatinoina o o latou tiute ma faiva faa-Tausi Soifua. Amata mai lava anamua, i taimi tonu a o vevesi le lalolagi, i taua tetele i tausaga ua mavae, lea na aafia tele ai ma Samoa. Le taimi a o puleesea si o tatou atunuu e malo mai fafo.

“E manatua foi ma le alofa i latou ia ma Tausi Soifua uma i le faagasolo mai o lenei 100 tausaga ua atoa. I latou ua saga mai i a pouli le folauga, ua tofafa mai tiasa, faapea foi nisi o e ua malolo manumalo, ina ua afu la latou tautua.

“E tautala aso pea lo latou taua, la latou tautua sa tuuina mai mo Samoa ma ona tagata. E ui ina sa to’agaogao le aufaigaluega, sa utiuti foi ma laiti o latou totogi. 

“Sa le lava mea faigaluega e faatino ai la latou auaunaga, ma le lelei auala o femalagaina ma feesootaiga. Sa vaapiapi lo latou silafia o le galuega ma le oo oo lo latou tomai ma le malamalama i le maualuga moomia ona sa le tele ni avanoa e saga tapu’e ma faafailele lo latou silafia i le faatinoina i le lelei aupito silisili, o tiute ma faiva alofilima faa-Tausi Soifua.

“I le faagasolo mai o le soifua ma le tula’i mai o le Malo Tuto’atasi o le atunuu, sa le ‘ela le silasila a Ta’ita’i le ave pea o le faamuamua i vaega ia aua lava se Samoa soifua maloloina.

“Taimi nei, e le o laaloa le silasila a le Malo i le lotoifale o le tafafa ina ia saga faaleleia pea ma siitia maualuga itu tau soifua maloloina ma tulaga tau aoaoga.

“ O le manulauti tauave pea lava pea a lo tatou Malo ia tumau ai pea ona avea Samoa ma ona tagata o se atunuu manuia.

“Silasila foi, o lea ua fou a tatou falema’i. Ua faaleleia le tele o auaunaga faasoifua maloloina, ma ua siitia maualuga foi totogi o le aufaigaluega a le Malo, e aofia ai ma outou o Tausi Soifua.

“ Silasila i fuafuaga tuutuumamao a le Malo, lea ua aoaoina ai ana lava tama fanau, o foma’i ma tausi soifua i totonu lava o tatou lotoifale i le Iunivesite Aoao o Samoa i le Papaigalagala. 

“Tele foi isi avanoa faavaitaimi i Samoa nei ma atunuu mamao, o le faamoemoe autu lava ia saga tapena ai o tatou lava tagata foma’i ma tausi soifua ina ia faatino le galuega lea i le lelei aupito silisili

“Le asō, ua tatou faamanatuina le atoaga o le 100 tausaga o le tautua faa-Tausi Soifua i Samoa nei. O le fesili: O le a sau silasila oe le Tausi Soifua Samoa? 

“O le atoa ai o le 100 tausaga o le auaunaga; ua 100 pasene ai ea le atoatoa o lau tautua ma le faatinoga o ou tiute faa-Tausi Soifua mo lou atunuu?

“Ou te talitonu o le tali o ia fesili ma le faamasinoga amiotonu, e maua mai lea i le mamalu lautele o le atunuu. 

“O tamā ma tinā matutua, o ulugalii, o failele ma pepe, o fanau iti ma soo se Samoa e sulufa’i atu i ou aao ua faapea ane “a! – ua ou ola” – Oe le Tausi Soifua Samoa, mo sau fesoasoani. Pau lava lea, e fia soifua malolo ma o le taimi e vaaia ai le tausi soifua e totogo a’e ai foi ma lagona o le fiafia

“E mausali le faamoemoe o le Malo ua lava tapena le vasega o Tausi Soifua o Samoa mo le faatinoina o tiute ma faiva ma le auaunaga faa-Tausi Soifua e pei ona faatulafonoina ai i totonu o lo tatou atunuu.

“A ua matauina foi ma le popole nisi o vaivaiga ua tau alia’e mai e ono avea ma lape, e afaina ma vaemanua ai le galuega faa-Tausi Soifua, e tuuina atu mo le mamalu o si o tatou atunuu.

“O le fautuaga: Soia ia le aumaia uiga faaletagata e nunu ai le to’au aua galuega e tatau ona fai ma aua lava nei outou faoa le anava a le i’a lea o le apoa, e toe fetuia’i lava latou, aua e leai sa tatou mea lelei e maua mai ai. 

“Na o le atili tigaina ai o gasegase ma saga mama’i ai le atunuu o loo sulufa’i atu i o outou aao lavea’i, foliga ma le leo malu e faalototele, faamafanafana ma faamalosi’au e mulia’i asiasi le foma’i, a o le tausi soifua i taimi uma lava o le toomaga ma le mapusaga i tigā.

“O upu faai’u o lenei taeao:

“Le Sosaiete Tausi Soifua e, ia lava papale i se aso, se taimi o le a faataunuu ai lou tou faamoemoe, ua asoa o outou lavasi i ai. 

“O se maa faamanatu o le 100 tausaga o lau tou tautua. .

“O se maa faamanatu e mautu ma aoga mo Tausi Soifua ma tagata lautele, e tu matila i le silamaimoa e aoga mo fuafuaga mamao uma lava eseese a le tou Sosaiete a Tama’ita’i Tausima’i o le asō ma ēluā. 

“O le a lea faamanatu sili? 

“O se Hall tele fou lea aua ua pumoomoo ma ua pala foliga o le Hall o iai nei. Lau Afioga i le Minisita, fai ma au faamuamua le folafolaga lenei a le Malo ia faatino i totonu o le isi tausaga faaletupe o le a sosoo nei. Tautuana i lau afioga i le Minisita ia ‘aua ‘aua lava nei tuua’ia le Malo i le lafo o upu ae le tuā.

© Samoa Observer 2016

Developed by Samoa Observer in Apia