LAUGA: IV. O le Mana o le toetu. (“Ua tuuina mai ia te a’u le pule uma lava….”)

Tusia Rev. Petaia Setu ,

45 Hits

Rev. Petaia Setu

Rev. Petaia Setu

(Mataio.28:18-20)

O le pa’ū o le uluai tagata i le amataga, na afua ina ua maileia e le tiapolo, i le pule (Ken.3:5), ona oti ai lea o le tagata. O le pule lava lea sa toe osofa’i ai e le tiapolo Iesu a o sauni atu le Alii i lana galuega i le lalolagi (Luk.5:6). Peitai, ua na o se mea faaleiloga, auā ua iai le Pule Silisili (Luk.4:8).

O le pule a le alii, o le lalolagi, na mate lava i le tuugamau. Ua faaumatia e le Atua i le Mana o le Toetu, ma tuuina atu I lē ua manumalo le mamalu ma le pule e aoao i mea uma. Fai mai le Alii o le Toetu, “Ua tuuina mai ia te a’u le pule uma lava i le lagi male lalolagi.” O ai la o i silī?

Ua uma le tolu tausaga sa galue ma taitaiina ai Iesu e le pule mai lugā. Sa pule ai faafaia’oga. Sa pule taitai. O le pule sa fai toatasi. E tautala ma galue toatasi. A o le ausoo sa maitau ma femulimulita’i. O le galuega sa fītā i tuga, ae sa tulimata’i lona taunuuga. La lea ua tini le uto. Ua a’e malō le faatamasoaliiga.

O le manumalō sa mua’i faailo i ana toe upu, “Ua taunuu.” (Ioa.19:30). O le pale, o le Pule. Ua tuuina mai lugā ina ua mălie le Tōfā. Ua tatala le finagalo o le Tamā, auā ua taumailelei e pei o le igoa ipu a le tamaloa Gataivai, le tautua toto a o se tautua mālō sa fai mautinoa e mālō i le lalolagi. O le Tapuaiga, Ua malie toa! Ua malo tau! Mālō le tausala! Le Pule lea. O le pule i mea uma lava i le lagi ma le lalolagi. Na fofoa mai i le Mana o le Toetu.

A silasila lelei ma maitau ma le faautauta Samoa, ua le toe tiu faamatalā’oa, a ua faasăfua le pule faasoa. Ua tatala le pule faaola ua le gata i le au soo o Iesu, a ua oo mai i o tatou augātupulaga. O le pule faamalumalu i le lagi, a o le pule faaola i le lalolagi. O le faatonuga, “ia outou ō atu.” E lē ō faasamasamanoa. E ō mautinoa. O le ō ua atoatoa, E ō i le pule faataga. E molimau ma folafola atu le silisili ese o lona Mana. E papatiso ma faaola le lalolagi uma i lona suafa.

O le Mana lea e tulaga ese ai le pule a lo tatou Alii. O le Mana e tasi ai nuu uma o le lalolagi. E tasi ia Keriso Iesu. E tasi i le fai ma soo. E le toe iai se Eleni poo se Iutaia. E le toe iai se peritomeina poo se le peritomeina. Ia tasi nuu uma ma tagata uma. E papatisoina i le Suafa o le Tama, ma le Atalii, ma le Agaga Paia. Auā o lea le Suafa e faaolaina ai. Ua na o lea le pule e faasaolotoina ai. E le faapito. A o le lalolagi uma.

Le Ekalesia e, e matua oe i le pule faasoa o le Toetu. O lou faiva alofilima lea i le lalolagi. Ia tasi tagata uma ma ia fealofani. Ua tatala mai e le Ao o le Ekalesia le pule ia te oe, e aumai e lana fanau i le faaolataga. O le pule e faavae i le alofa.

E auauna i le faamaoni. E tu i le fai mea tonu. Ona fealofani lea o uso. Ona maopoopo lea o aiga. Ona tasi lea o le nuu ma le ekalesia. E le faigata. A ua faigata, ina ua fia fai foi ni ou soo i le galuega faa-soo a Keriso. Ua faigata auā e positive le folafola ae negative le faatinoga. Ua lelei le papatisoga, ae sesē ou lagona. Ua atili ai ona faigata auā na faataga mai e Iesu le pule tatou te soli ai le tiapolo peitai, ua tatou solipala ai le lafu mamoe a le Alii. E a e sa’o?

Le ekalesia e, o le pule galue o le faaolataga, e fai i tatou ma amataga. Ia fai oe ma a’u ma Ala o lena Mana. O tatou o le Faataimuaga. E maua soo o Keriso, pe afai ua fai oe ma soo totino. Ae faapefea ona tatou laugaina le alofa, ae mea ane ua lailai tagata i a tatou amoga? O le fai o nuu uma ma soo, o lona uiga, ia fai ma nuu ua faaolaina. Nuu ua malamalama i le Keriso Manumalo. Nuu ua talitonu i le Iesu Toetu. Ua taitaiina e le Mana o le Toetu.

O ai e faia? O oe! O oe le Ekalesia. Ia outou o atu e fai nuu uma lava ma soo. E faamoemoe i le Mana o le Toetu. Ia faautauta i le pule. O le pule alofa. E fai ma malologa. E fai ma saolotoga. O le Pule Faaola. Le Ekalesia e, faamolemole o le Pule Faaola. Na te a’oa’o  ala o le manumalo. Na te faatonu le amio. Na te faailoa manuia. Na te faia vavega ma faamalologa. Na te faia oe ma pule faaauau o le galuega faaola.

Samoa, e te le faia toatasi le galuega ua tofia ai oe.Soo se feau soo se faiva o loo e galue ma e tausinio ai, o loo iai le pule faamalumalu a le Atua. Na te le tuuaunoaina oe i ou tiute i lau aoga, i lau fatuaiga tausi. Ia manatua, o le pule a Keriso ua faasoa ia te oe ma a’u.

O le soo e maua i le aiga. E maua i le aoga. E maua i le auala; i le galuega; i taaloga. E maua i le to’ese; e maua foi i le falemai ma soo se nofoaga faitele. E le na o le falesa ma le Aso Sa e su’e ai soo o Keriso. E le na o faifeau ma le au mau tofi o le lotu e faia le galuega. Uso, ua tatala e Iesu lana pule i tagata uma ina ia faaolaina tagata uma.

Uso e, Samoa, o le tagata e sili ona taūa , o oe. Po ua fai oe ma soo o le Alii Toetu? Poo mafai ona e lagonaina le pule faaola a le Atua i lou olaga? E manao le Alii ia te oe. E le afaina po o a ou leaga ma ou faaletonu. Ua tuu tele lana pule ina ia fai oe ma soo. Ia faaolaina oe i le Mana o le Toetu. O le Mana e toe fausia ai se amataga fou o lo oulua aiga. O le mana e fefaamagaloa’i  ma fealofani ai. O le mana e le vaoia ai le alofa i soo se tagata.

E amana’ia ai le tagata ma’i ma le tagata mativa. O le mana e mafaia ai mea uma i le talitonu male faatuatua i le Alii Toetu. Samoa, o le mana lea ua fai ma foeuli o le pule faaola! Fai mai Iesu, “Ua tuuina mai ia te a’u le pule uma lava i le lagi ma le lalolagi. O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tamā, ma le Atalii, ma le Agaga Paia….”

O le feau lea mo tatou uma, ia fai ma soo nuu uma,  ma ia faaolaina le lalolagi uma, i le Pule ma le Mana o le Toetu.

 

Amene

7737063

 

© Samoa Observer 2016

Developed by Samoa Observer in Apia