Manumalo To’omalatai i le tauvaga ailaoafi
O le alii o Ieti To’omalatai ua manumalo nei i le tauvaga ua ta’ua o le Faletalimalo Siva Afi Challenge 2018.
O lenei alii e 17 tausaga le matua mai afioaga o Asau, Savaii ma Matautu, ma sa ia mauaina le faailoga tupe e $1,000 ma se nifo oti mai le pule o le Siva Afi Leota Lene Leota.
Sa fa’apea ona tauva lenei alii mai le faletalimalo ale Sheraton ma sa ia tauva ma le alii o Walter Leota mai le faletalimalo a le Manamea lea sa ia mauaina le tinoitupu e $600.
E tusa ai ma le fa’atalatalanoaga ale Samoa Observer ma lenei alii sa ia tau’a ai o lana taleni lava lea a’o laititi o ia.
“Sa faateia au ina ua lauina mai lo’u igoa ou te manumalo i le po o le Aso Lua,” o lana saunoaga lea.
“Ou te lei mafaufauina foi, o le upu moni lava ia ou te lei mafaufauina o le a ou au i luga i le taamilosaga mulimuli.
“Ona sa iai nisi ua lauiloa i le siva ailaoafi e pei o Vaelaa Iloa, Alema Alema, Walter Leota ma Lene Leota o latou nei ua lauiloa i lea taleni.
“Ua tele ina latou auai atu i taamilosaga faavaomalo.
Sa tau’a e lenei alii o le ono o ona tausaga sa amata ai ona siva.
“O lo’u tama o Miti Toomalatai o se tasi iloga foi i le siva ailao afi,” o le saunoaga lea a Ieti.
“O ia lea sa a’oina au mai lava i le ono o o’u tausaga, o le valu o o’u tausaga sa faapea ona amata ai loa ona ou alu ou te tauva ma amata mai ai lava ona avea lea taleni ma se itu e ese le pele ia te a’u.
“Sa ou manao e faaauau pea le taleni a lo’u tama ma sa ou manao ina ia sili atu nai lo o ia ma o le ala lea e ese le pele ai o lea taleni ia te au.”
O lenei alii o loo faafaigaluegaina e le faletalimalo o le Sheraton i le taulaga i Apia.
O le tausaga na te’a nei sa tauva ai foi i le tauvaga lava lea ae peitai e lei ausia e ia le taamilosaga mulimuli.
Sa fesiligia foi pe aisea ua le toe aoga ai.
“Sa ou aoga i le kolisi maualuga o Maluafou,” o lana tala lea.
“Ae peitai, ua mai si ou tama ua maua I le mai suka ma ua oo i le tulaga leaga ua aveese uma ai ona vae ona o le ma’i.
“O lea sa ou manatu ai loa e sili ai loa lou nofo ma le aoga ina ia ou tausi ia te ia.
“O le isi itu e na o le toalua maua o le fanau a o ma matua o au e ulumatua ma si ou tuafafine e laititi.
“E iai isi itu e le mafai ai e ia ona tausia lo maua tama, ona e le laititi ma le isi itu e le mafai e ia ona sii lo maua tama e pei o le mafuaaga lea ua ala ai loa ona ou nofo ma le aoga.
“O le taimi nei o lea ua ou faigaluega i le Sheraton ma tausi lou aiga faapea ai lou tuafafine laititi o loo aoga, ua ou faamuamua lou aiga.
“O se faaiuga faigata ae sa fai lava ona e leai se tasi e na te mafai ona tausia le matou aiga.
“O le seleni lea na maua mai i la’u manumalo sa ou ave uma lava i lou tama ma ua faafiafiaina lava o ia ona o lenei taleni.”
Sa tau’a e le pule o le Siva Afi Leota Lene Leota e faapea o le alii lenei o Ieti sa mataina lava lana taumafaiga mai lava i le amataga o lea taamilosaga.
“O le tausaga lea na tea e lei mafai e ia ona ausia le taamilosaga mulimuli ao le tausaga lenei ua foi mai Ieti ma ua malosi o le ala lea o lona manumalo.
“Sa mataina uma lava le au tauva mai i faletalimalo e valu ma ua faifia ai lava ona ua mafai ai e nei talavou ona faailoa latou taleni e ala i le ailao afi.
“O lea e faafetai ai i faletalimalo uma lava sa mafai ona lagolagoina lenei faamoemoe.”