O le afea ai e le Fofoga o Samoa o le tinā i a Selema Hall, 53 le matua o le soifua i le aso ananafi, na ia fa’ailoa ai o lo’o fa’amoemoe le tausiga o lona aiga i le sami.

“Ia o le atina’e lava lea o lo’o fa’apea ona ola ai lo matou aiga…o le sami.” Selema Hall.

“E pei ona outou tau mai ai fo’i nei, ia o le tulaga masani lava lea i taeao uma o le la’u mai o ato  tuitui ma nisi o figota o le sami aua le fa’atauina atu i le mamalu o le atunu’u ina ia mafai ona maua mai ai se tupe.

Na ia ta’ua o le usua’i ai i le taeao i aso uma e fagota, e le’o se galuega e faigofie lona fa’atinoina.

“Mo le silafia ai, o se galuega faigata tele lea e fai i aso uma lava, ia ua ala ona ou fai atu e  faigata…aua e ta le lima i le ono ua usu i tai i le sami.

“O le tele o nisi o aso e tiga lava ona matagi e taumafai lava e o i tai e saili mai vaega (figota) nei   aua le tausiga o aiga ma fanau.

“E le gata i lena o mea fa’aleaiga , mea fa’alelotu ma so’o se mea lava…ma e tele fa’alavelave, ae pei lava o le tulaga lava lea o lo’o fesoasoani tele.

“Ia e ta’i $15 le tau (ato tuitui) ia e i ai lava le aso ua lelei , ua vave ona uma , e i ai le aso e fa’ale fa’atau ai fo’i tagata.

“Ia a totoe nisi mea ua fa’aaoga e fai ai mea’ai  a le aiga, aua a ono ato (e fa’atau i le aso) ia e feololo lava sina tupe e maua ae a fa’aletonu le aso ia o lena lava.

O tupe o lo’o mafai ona maua e le tinā ma le aiga o lo’o tau fa’asoasoa.

“Ia e tele lava ina fa’aalu i mea fa’aleaiga , o le paoa, o mea’ai a tamaiti i aoga…ia o le taimi lava ua lava le fa’asoa ia o le taimi fo’i ua leai, ia a le lava le fa’asoa ua inu le ti ma ai le fa’alifu…to’a lelei ai le moa.

“O le taimi lenei e to’alua tamaiti a’o’oga , o la’u fanau e to’alua e faigaluega, a o’o fo’i na poloka galuega ia ua leai fo’i lava ni galuega.

 “E tele lava nai mea e mana’omia ai le fa’aleleia i le aiga ia ae ona o le le lava o le fa’asoa, aemaise lava pe a leai se tupe ia e le mafai ona fa’atino na mea uma.

“O  le tupe lava, aua o le mea’ai o lo’o fai ma maua, ae  a leai fo’i se mea’ai a tamaiti ia pei ua fa’alelei fo’i…ia ae a leai se tupe ia ua leai se mea e  mafai.

 “E fa’apena le olaga  o lo’o tatou i ai , e mafai ona tu’u isi fa’alavelave ma mea na masani mai ai ae fai isi….o si o’u aiga e lima vaivai e tele lava mea mana’omia , ia o le fale ia  e pei e fa’aletonu lava ma e leaga lava le mea o lo’o nonofo ai ona o le utiuti lava o le  faasoa.

 “O le olaga o lo’o si’isi’i lava i luga le tau o le soifuaga.