O le pule i le ola o se tasi lea o  mataupu o lo’o taumafai pea le to’atele o fa’alapotopotoga o lo’o galulue aga’i i ai mo se vaifofo ina ia tu’u fa’aititia ai le si’itia o i latou o lo’o maimau lo latou ola ona o lea tulaga.

“I a te a’u ia e pei o lea lava le fa’anoanoaga ai ona o le maitauina o i latou o lo’o pule i le ola i si o tatou atunu’u.” Tolusenetenari Siaitolo Taulagi o Vaitele-Fou.

‘O se tulaga ua molimauina le fa’atupula’ia pea e o’o mai lava le taimi lenei, ma o lea lava o lo’o tatou tau fai silafia le tulaga ogaoga e ono ai pe a le mafai ona galulue fa’atasi o tatou tagata.

“E le fa’apea o le a avatu lo’u ia manatu ona fa’apea ai lea o le a tutusa ma isi, leai, e ese’ese uma lava manatu i lo’u ia iloa i ai.

“Ae o a’u ia e pei e ave la’u titilo  i le amataga mai o le olaga o le tagata, ia o totonu lava o lona aiga e pei o i e fa’avae mai aim ea uma.

“A lelei mai lava la le fausia mai o le tagata ma lona olaga i le mafutaga ma matua ma  tagata o le aiga, ia o lea lava le tulaga e o’o i ai. “Ae a i ai lava fa’aletonu i le le lelei o feso’ota’iga i totonu o aiga, ia o lea fo’i lava e o’o i ai.

“E pei ua maitauina ia o le ita o nisi, o le lagona fo’i le le e le mafai ona fa’asoa i nisi o tagata o mafatiaga ona o le popolega fa’aletagata lava ia.

“O fanau e fasi atu i matua ae fa’alili’i, e pei o isi ia o mafua’aga ta’atele, e pei o lea le uiga o la’u tala, afai e mafanafana le so’otaga i aiga, e le taumate e le o’o ni fa’aletonu. Na ia fa’ailoa o le  galulue fa’atasi o aiga, nu’u aemaise o le ekalesia ma le malo e ono fa’aititia ai lea tulaga.

“Ia e pei o lo’u ia iloa i ai, e le gata la i vaega nei, ae o le tatalo leoleoa lava a le tagata i le Tamā ina ia fesoasoani mai, aua tatou te vaivai uma lava.

“E leai lava se isi e malosi ai pea, ae pei o lea le tulaga i a te a’u, e ao lava ona fofoa ma atia’e lelei le olaga o so’o se tamaititi mai lona aiga aemaise o le Atua.

“Aua a matua e le toe te’a ese ai, ma le o’o atu ai se tulaga e pei ona ua tatou molimauina ai lea si’itia pea o le pule o le ola i Samoa. 

“Ia ae le gata i lea o le fa’alapotopotoga o le Fa’ataua o le Ola, ia masalo o le isi lea vaega e mafai ona fa’atalanoa ai fa’afitauli mo se fesoasoani ia po’o matua fa’aleaga fo’i ma nisi e silafia lava e ono talitonuina mo fa’afitauli.