LAUGA - “E taulotoa’iga o tiga o iai le fiafia.”

Tusia Rev. Petaia Setu ,

94 Hits

Rev. Petaia Setu

Rev. Petaia Setu

(Mataio. 20:17-19)

E leai se mea tatou te maua ma se filemu. Ae afai e le o le faitotoa o lona uiga o le gaoi fai mai ai Iesu.

O le olaga lenei a le afu lou muaulu ma tauasa mai i luitau ma faigata tatou te le i’u i se lelei. Na afio mai Iesu i lo tatou lalolagi ma lona silafia lelei o la lea tulaga. E le na ona ia silafia, ae sa ia valoia, ma na uia.

E le taugofie le sailiga o malo. Na faaaunuua ai o tatou tuaa i aso ua mavae. Na masaa ai o latou toto ma maliu fasia i luga o le ala ina ia saoloto o tatou augatupulaga.

E le tioa foi Moretekai ia Eseta, “…e iloa foi e ai po ua fai oe ma masiofo ona o se aso faapenei?” (Eseta. 4:14). O le faalua lea ona fetalai faapea Iesu e faailo ma saga faailoa atili le taunuuga o ona tiga. E tua i lelei.

E a’e i malo. E le po pea malaē. E oso pea le la. E iai pea malama. Aua e ui ina lutia i Puava, ae mapu lava i Fagalele. O le ata manino lea ma le malamalama; o totonugalemu o tiga, o iai le fiafia. 

Ua taunuu valoaga. O le tama a le fafine na te solia le ulu o le gata (Kenese. 3:15). A o la Tavita foi, “…e te le tuu atu lou Tagata Paia ia oo iai le pala” (Salamo. 16:10). Lea foi ua faailoa mai i lenei parakarafa (f. 17-19), le manumalo a’ia’i o le Atalii o le tagata; e le i tele ni aso e va a’i ma le asō. O loo valo’ia e lo tatou Alii i lana Tofa mamao o loo ua manino lelei ai le fuafuaga paia a le Atua e pale i le aso lenei.

O le aso na lupe. O le aso sa tuupoina i le finagalo pule o le Silisili Ese, e a le tu e a le tu lava (Salamo. 33:11). O lona alofa faaola sa faataoto mai i le amataga, e ui mai i tiga ma puapuaga o le olaga.

E afua mai i faresaio ma le au tusiupu, o ona tino ma ona lava tagata, ona inosia o lana mau ma ana galuega mamana. Ua sauāina ma ua tuuina atu i nuu ese, latou te faalumaina ma fasioti i le tagata e le sala.

Na fā’i lava e malo le tuugamau ia te ia. A o lana valoaga, e toe faatuina i le aso tolu. O le taeao lenei, o le aso tolu; na te faatinoina le moni o valoaga. O le aso lenei na faalumaina ai le tuugamau. Auā na fulieseina e le agelu a le Alii le maa i le gutu o le tuugamau. O le tala, e le o iinei o ia, auā ua toe tu mai o ia, e pei ona ia fetalai atu ai.

Samoa, ua le o se Keriso oti pea lo tatou Alii (I Kori. 15:55). Na ui i le ala o le lalolagi uma ina ia molimau le lalolagi uma i lona mamalu, o le mamalu lava lea i luga o le satauro. O mamalu e le i faatauina. Ua le o se fiafia na faatosina. A o le soifua na masaesae ma masofasofa, ina ia maua lou ola ma lou saolotoga.

O ata ia o loo ua valoia e Iesu i le lesoni nei. Ua le o le oti le mutaaga o le tagata talitonu ma faatuatua. E le mafai foi e puapuaga ma tiga o le olaga nei ona taofi le tagata onosai ma tau malo mai lona faaeaina. Ua atufia ona taumafai Iutaia e faaleaga i lo tatou Alii? Ua le mapu ona saili o faresaio ma le au tusiupu i se ala e fasioti ai Iesu.

Ua faufau pea lava le au faitaulaga sili e mailei i le Faaola. Na oo lava na mea uma; peitai ua le o lena le taunuuga. Auā o le valoaga, e toe faatuina i le aso tolu.

O lona uiga, ua valoia e le Alii lona manumalo. Ua faailo le palealii e faaeaina ai le tagata onosai. Le tagata ua na mafaia ona faatoilaloina luitau ma faigata o le olaga nei.

O faailoga matamata tetele na o le toetu. E le maua ma se filemu. Fai mai Iesu, “e maua foi outou e puapuaga i le lalolagi, …a ua ou manumalo i le lalolagi.” (Ioane. 16:33). Ioe, o le manumalo na asa mai i fita ma tugā o lo tatou lalolagi.

O le faaeaina na maua mai le onosai ma le loto faamagalo (Luka. 23:34). Samoa, o foliga na o le toe tu. O foliga o le fiafia. O ai a le fiafia ua mălolo le tuugamau sa fai ma taufaamata’u! Ua ge le oti auā ua leai sona malosi! Ua toe tu Iesu! Ua toe tu Iesu! Aleluia! O fea pulega faa Ositaulaga ma le malosi faa fitafita?

O fea foi leo matamata ita o Iutaia ma le faatauemu o nuu ese? A o fea lou ma’ema’eā ma lou finauvale i le Atua? E fafano Pilato ae taamilo oe ma ‘alo ‘alo! Pe le o oe le isi fai fai upu i valoaga o le toe tu? Uso, poo e lagonaina lenei aso? Poo mafai e lou faasausili ma lou faamaualuga ona faalelei lou lotoifale ma faamaulalo i le mana o le toe tu? Poo e iloa o le manumalo o Keriso na saili i lona lava soifua? Le soifua na suia oe i luga o le satauro ina ia maua le taeao lenei. Taeao o le Talalelei! Taeao fiafia!

O le taeao o le manumalo! Manumalo mai leaga uma o lenei olaga. Manumalo mai ma’i ma faafitauli o le soifuaga. Manumalo mai le lalolagi ma ana ‘au. Manumalo mai le oti ma le tuugamau.

Samoa, o le valoaga a Iesu ma le tautinoga a Tavita o moni ia o le manumalo. A o le i fanau mai o tatou augatupulaga, e mătua le valoaga. E toe tu Iesu i le aso tolu. O ai na te liliuina? Poo ai se malosi na te suia pe toloia le polokalame a le Atua Silisili? Manatua mai Samoa, a fetalai mai loa le Atua ia te oe i se mea, ona e mautinoa lea, ua iai le manumalo i lena mea. Pe faigofie pe faigata, ua iai le manumalo. Aisea? O le toe tu o Iesu, o le manumalo a’ia’i lena i mea uma ua finagalo ai o ia ia i tatou. 

Uso e, o faamanatu o le vaiaso ua mavae ma le manumalo o le taeao lenei, o ata tonu ia e taialaina ai lou soifua ma lo tatou ola o a taeao ma le lumanai. Auā e moni, e le ’alofia pe tuuaunoaina i tatou e faafitauli ma puapuaga o le olaga nei. O ō tatou aiga ma o tatou siomaga. O uō foi ma nai o tatou pā’aga.

O le ’a avane ai la tatou, ma Iesu Keriso o le Alo ia o le Atua Soifua, na matuā taugā le ta a le lalolagi i lona soifua! E le i ’alo le Alii. Na inu i tiga ogaoga ma le matuitui na e faatupu, ae sa tali gūgu e leai se upu. ’Aua le palaai. ’Aua le fefe vale. Oso i totonu o puapuaga. Vivii i le Atua i o tatou faafitauli se’ia e iloa le suamalie o malo mai le tele o faigata.

Samoa e, o tala’aga na o le aso lenei. O le toe tu o Iesu e faamatalaina le maasiasi ma le toilalo popo o le lalolagi. Ae na te ‘alagaina le manumalo o le onosai ma le faapalepale, le agamalu ma le loto maulalo; ma le faaeaina o le loto alofa ma le ola faamagalo.

Pe afai e le o lea, e iloa la i fea ua toe tu Iesu i lou olaga?

 

Amene.

 

7737063/7783782

© Samoa Observer 2016

Developed by Samoa Observer in Apia