Pe e tele i fea ni mea e te maua, po’o lea foi se lelei o se olaga ae a misia le vai, e fa’aleaogaina uma na mea.

O le manatu fa’alia lea a Setefano Tagitagi mai Fasito’o tai i lana fa’atalatalanoaga ma le Fofoga o Samoa.

“E pau a le mea ou te mana’omia o sa’u a ia tane vai aua o lo’u fale e mamao mai le aai, ma o le mafuaaga lena o lo’o ou mana’omia ai se tane vai.

“Ua atoa nei le sefulu tausaga o faapea lava lenei faafitauli aua  e le o’o mai le vai i tua le matou fale; e fiagata foi la ona maua se vai i a matou aua e mamao. 

“Ia ua outou silafia o le ofe lea e ta’atia iinei, ao lou fale e mamao i uta ma o le mea na o lo’o ou mana’omia ai se fesoasoani, o se tane vai.

“E amo a matou vai mai le mea o lo’o iai le paipa i luma, ae a na fai ona e iai tamaiti ia maua foi se fesoasoani mo latou.”

E to’alima le fanau a Setefano ma e a’o’oga le to’afa ae to’atasi o lo’o faigaluega.

“A leai se vai e faigata foi ona ola le tagata. 

“O lea la e feololo mai ituaiaga aso ia aua o lea e fai ma timu ae a la, ia e fiu e tau vaai se vai.

“E iu a ona soso’o ona aumai se vai ma le matou fale lae e i tai.

“O a’u o lo’u fale e tai le aai, ae o le itu ua ou manaomia ai se vai ona o lou fale i ga’uta, e leai se tane e ono sefe ai le vai.

“Tilotilo la i le tulaga o fale le ta’ua aua a  leai la se vai, o vaitaimi la nei ma le soifuaga nei, ia e leai sesi o tatou a mea ua toe agai mai i mea anamua pei o fale eli ma mea faapena ma o le tulaga la le na, ta te tilotilo a ita i le mea o lo’o iai nei, e fa’afaigata ai ia matou le nonofo i ga’uta aua o matou sa matou nonofo i o ae ua ala ona matou o i tai ona o le leai o se vai. 

“O le tulaga la lena ta te tau aapa ai i isi fesoasoani aua e mana’omia lava se fesoasoani mo se tane vai.” 

A e fia foa’i se tane vai mo Setefano Tagitagi, fa’amolemole fa’afeso’otai o ia i le numera 7780895.