Fa’aliliu e Maiava

O lo’o fa’aauau pea ona fa’asese e Latafale ‘Auva’a le mau tala tau-faifai ma faitioga mai lona lava atunu’u, a’o si’isi’i pea ma manuia ana taumafaiga i le Sa’iliga o se Tausala a le Lalolagi, lea ua latalata ina mae’a, i le atunu’u o Saina.

Ua mae’a atu le tauvaga-taleni sa faia talu ai nei, lea na tulaga-lima ai le Tausala Samoa.

Ua mae’a isi vaega o le tauvaga, pei o ta’aloga, lea fo’i na tulaga-lima ai le tatou teine.

O tala fiafia ma tala fa’amalieina o lona taumafai, ua matua vevesi ai tusitusiga ma fe’au fa’amalosi’Au i luga o upega-tafa’iLagi mo Latafale.

“Oka oka se finau ina mata’ina! E mau-tulaga lava Latafale i le tele o vaega o le tauvaga. Malo lava le fa’amalosi Miss World-Samoa. Ua matou matua mimita lava ia ‘Oe ma lou taumafai,” o le fa’amalosi lea ma le lagolago a se tasi o tama-fanau ao-uliuli a Samoa. 

 “’Ou te matua talitonu atoatoa, o lo’o fa’atasi Le Atua, Lou Atua ma ‘Oe i taimi uma. Fa’amolemole Le Ali’i e! Ia malutia e ou a’ao alofa ma le Mana o Lou Agaga Pa’ia lona taumafai, ina ia i’u manuia le finauga mo le Tausala a le Lalolagi 2015. E maligi loimata ma tusia lenei fe’au mo ‘Oe Latafale. Ia lototele Latafale. Se lagona manaia ma fa’amalieina, le va’aia o lou suafa ma le igoa pele o Samoa, o lotolotoi maualuga i le tele o vaega o le tauvaga... o lo’o matou tatalo atu mo ‘Oe Latafale. Mai se tasi o Samoa mitamita i Kalefonia,” o le isi lea fa’amalosi’Au.

 “Fa’amalo lava Miss World Samoa...e mautinoa lava o ‘Oe le Miss World mo le 2015. ‘Ese le mata’ina – ‘aulelei ma mata’utia le va’ai atu ia ‘Oe, o ‘Oe lava e sili fa’a-afe i isi tausala, e ‘aulelei ma matagofie ou fofoga pe a e ‘ata. Finau mo le Pale aua lou atunu’u o Samoa, lea matou te palota uma atu mo ‘Oe, ae maise Samoa umai so’o se itu o le kelope. Ia manuia ‘Oe ma fa’aauau pea fa’aali foliga ‘aulelei ma ‘ata’ata,” o le lona tolu lea o lagolago mo Latafale.  

A’o le’i tu’ua le atunu’u mo Sanya i Saina, na matua mamafa ‘upu na saunoa ai le Palemia o Samoa, Tuila’epa Sa’ilele Malielegaoi,  ona ua tonu ia Latafale e tauva i le sailiga o se Tausala o le Lalolagi, ae le o le Tauvaga mo se Tausala a Motu o le  Pasefika.

O le Aso 19 o le masina nei, e fa’ai’uina ai le tauvaga lenei ma fa’apaleina ai loa le Tausala ..... o le a manumalo, e avea ma Tausala a le Lalolagi.