Toe manatu tasi... - Manumalo i le Popole (Vaega 1)

By Fa’aliliu e Maiava 16 May 2016, 12:00AM

Toe mafaufau tasi lava…Ua lausilafia: “E sili atu le fa’atiga-ulu o le popole i se aso e tasi i lo galuega o le vaiaso atoa.” A o le fa’a’upuga sa’o lava o le popole, o le “titina” po’o le “tau le-manava.” O le popole, na te motusia le ola ma le malosi mai ia te ‘Oe!

O le popole so’o la, e titinā o tatou lagona ma ‘ave-‘esea mālie lo tatou fiafia ma fa’amoemoega lelei. “A e lē-tanumia la ou popolega, e au ina latou tanumia ‘Oe.” Mo nei ma a-taeao, o le a tatou fa’asoa i ni ‘auala e manumalo ai i le popole. 

Manatua: “O le popole, o le nofoaga pogisa lea e na o mea le-lelei lava ma mea-pogisa e maua ai.” E masani ona o’o manatu ma mafaufauga i mea leaga e ono tutupu. A’o mea ia e te afaina ai ma i’u lava ina leai se fuafuaga e faia iai.

O le popole, e afua ai ona “muta o le fa’amoemoe.” Pei o le tala a se tasi o tina na fai i lana fanau: “O le popole e pei lava o se nofoa-fa’alue: E te fa’alue ai lava i le aso atoa ma leai ai se mea-aoga e faia, ma e nofonofo ai lava i le mea e tasi.” O le mafuaga tonu lava lea, aua o le popole, e matua ma’umau atoa ai lou taimi ma lou malosi.    

E tasi lava le ‘autu; e leai se aoga o le popole talu ai, o lo’o e taumafai e fa’atonutonu le mea e te le-mafai ona fa’atonu – pei o le tau o lenei aso. Talu ai la e le mafai ona e suia, aisea lava la e taumafai ai?

Ae maise fo’i, o le popole i se mea e mafai ona e suia, e le aoga fo’i, aua fo’i o le popole e le mafai ai ona e suia pe faia fo’i o se mea! Pau lava lea, o le fa’atino o le mea e te mafai, ae ‘aua le popole i le isi anoano.

O le popole, e le o se tulaga masani lea i le natura o le soifuaga o le tagata-ola. E pei ‘Oe o se vale pe a fealua’i i le aso atoa ma se fa’amalu, ona o lou popole ne’i timu i se taimi. O le tulaga lava ua masani ai, e te fa’atalitali se’ia timuga, pe a o’o mai fo’i se timu.

Na fausia tatou o tagata-soifua, i le tino, mafaufau ma le agaga ina ia gafatia ona fa’atino fe’au, o galuega ma lu’itau uma mo le aso e tasi, ae le sili atu.  

O se la’asaga aoga e te manumalo ai i le popole, o lou le tu’u-‘aulafo lea ae taumafai e ‘aua ne’i afaina ai. O le tele o mea tatou te popole ai, e afua mai ‘upu ma fa’a’upuga-sese ae maise amioga a isi tagata – a o le fa’alavelave lea, tatou te nonofo lava tatou ma tu’ua’ia tatou, ona o lagona ma fa’atinoga sese a isi tagata.

Moni e taua tele le tausisia o le filemu i le va ma isi, peita’i, e natia lava ma tatanu i lalo mea moni o lo’o tutupu. Afai lava e te talitonu e te le’i faia o se mea sese, lona uiga, ua e le fesoasoani i le isi tagata, ona o lou lavea’ia so’o ma tau-punipuni o ia, ae maise lou tau’ave o ona fa’aletonu uma na fai. 

Manatua, a pulea atoa e Iesu lou tagata, ua e manumalo ae le afaina ona o amioga a isi tagata. Tatalo nei Ia Na fa’amagalo ‘Oe ona o lou ola pea i ou lava ala, ma fesoasoani mai i se olaga fou e te ola ai. Pau lea o le ‘auala e te maua ai Lona filemu moni ma le malosi e te manumalo a’ia’i ai, i le popole. Toe mafaufau tasi lava…                                                                      

 

 

By Fa’aliliu e Maiava 16 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>