Tusi i le Fa’atonu

17 January 2016, 12:00AM

Fete’ena’i le Mediation ma le Tulafono 

(Soalaupule)

Taua i le saunoaga a le Afioga i le Faamasino Sili e uiga i le autu o faatalatalanoaga o mataupu a ni tagata, aiga ma se nu’u ona o ni fe’ese’eseaiga. E faia ai ia fe’ese’eseaiga e aunoa ma le tuuina i luma o le Faamasinoga e suesueina ai. 

Ae a tu’u mai la i soliga tulafono, e le talia e le Faamasinoga ni faaleleiga a ni tagata, aiga ma se nu’u e faia i tua, ina ia foia ai ni mataupu matuia e tula’i mai i le va o ni tagata, aiga ma ni nuu. Aemaise ni soliga tulafono mataga e aofia ai ni tagata o se aiga e tasi. 

Pea uma ona teuteu e matua poo matai o aiga i tua ni mataupu faapea, ina ia faia ai le oo mai i le Faamasinoga. Ina ua autasi uma finagalo o i latou poo e o lo’o aafia i sea maliega, ma fai le sala i le nu’u a le aiga atoa. 

Ae a’apa atu lava le a’ao malosi ma le saua o le Faamasinoga e aumai sea mataupu e su’esu’eina i luma o le Faamasinoga. Ae ua le amanaia le aia tatau a aiga ma i latou uma na faia se teuteuga faaleaganu’u ma le fa’aleagaga e foia ai sea soliga tulafono. E pei ona sau ai le atunu’u i aso ua mavae. 

Aua poo a lava ni soliga tulafono matuia e tutupu i totou o aiga ma nu’u i aso ua mavae. E pei o le soli tofaga, faamaligi toto, fasioti tagata (tulou), gaoi pe sopo tuaoi ma so’o se soliga tulafono lava. 

O le mea lava lea sa faia e le atunuu i aso ua mavae. A’o le’i iai nei mau tulafono. 

O le soalaupule lelei i le va fealoaloa’i faatamali’i ma faafaleupolu i le vao o aiga. E faapea i le pule mamalu a Ali’i ma Faipule i le fono a nu’u. E saili ai le filemu i le faaleaganu’u ma le fa’akerisiano e foia ai so’o se mataupu matuia e tula’i mai. Ona fai lea o faasalaga a le pule mamalu a Ali’i ma Faipule e fua i le mamafa o soliga tulafono i aso nei. 

Ma le isi tu maualuga a le atunu’u i aso ua mavae o le fai o le ifoga a le aiga, po’o le nu’u o le tagata na agasala i le aiga po’o le nu’u o tagata na a’afia, faatino ma le sala ona uma a lea. Ae ua le o toe talia e le Faamasinoga lea tu & aganu’u mamalu a Samoa i aso nei. 

O le soalaupule o le tu lea ma le aganuu a Samoa mai anamua, sa ta’ita’iina ai aiga ma nu’u i le nofo filemu ma le fealofani. 

 

Soifua 


17 January 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>