$12,6072 mo aiga mafatia i le afā
Ua foa’aina e le Koluse Mūmū a Saina se tinoitupe e $50, 000 Amerika e tusa lea ma le (T$12, 6072) i le Koluse Mūmū a Samoa i le vaiaso nei.
O lea foa’i sa mafai ona taua’aoina atu e le Amapasa o Saina i Samoa, Wang Xuefeng i le Peresetene o le Koluse Mūmū a Samoa nei, Leiataua Jerry Brunt, i le ofisa autū i Tuana’imato.
Sa fa’aalia e Wang o le autū o lea seleni ina ia mafai ona fesoasoani atu ai i nai aiga sa a’afia ona o le afā o Gita i le vaiaso na se’i mavae atu nei.
“E ui ina sau Gita ma toe vave alu ese atu, ae peita’i sa mafai lava ona mafatia ai le atunu’u i se taunu’uga leaga e ala i matagi malolosi ma lologa.
“E pei ona tatou molimauina i le mae’a ai o le afā, tele o la’au sa mafai ona pa’uū, o matāfaga sa fa’apea ona maumau uma ai la’au sa fa’aleagaina.
“Tele ma anoanoa’i fale sa fa’apea ona fa’aleagaina uma ona o lologa, ma le motusia ai o le eletise ma le suavai, aemaise lava i le itu tau meatotō sa fa’aleagaina uma.
“Ua tuia le fatu ina ua va’ava’ai atu i le tulaga sa i ai le atunu’u i le mae’a ai o le afā ma le va’ava’ai atu fo’i i ripoti mai luga o nusipepa fa’apea ai televise.
“E momoli atu ai fa’amaisega i ai latou uma na a’afia i faiga le alofa a Gita.”
Sa fa’afetaia fo’i e Wang le tali mai o le malo o Samoa e ala i matagaluega eseese sa mafai ona galulue fa’atasi i le taimi o mafatiaga.
“Fa’amalo atu i le pulega o le eletise fa’apea ai ma le ofisa o le suavai ona o le toe vave fa’aleleia o nei auaunaga i se taimi pu’upu’u lava.
“O lea ua maitau atu ua amata ona toe galulue tagata i le toe fa’aleleia o latou nofoaga ma toe fo’i i galuega e pei ona masani ai.
“O nisi o vaega o lo’o galulue fa’atasi ina ia toe fo’i Samoa i se tulaga matagofie.”
Sa ia fa’aalia e ui i le mamao o le atunu’u o Saina ae o lo’o popole lava tagata o le atunu’u o Saina ona o le tulaga ua sa o’o i ai Samoa.
Sa ia fa’ailoa fo’i o lenei fo’ai o se itu e iloa ai le tualaga o lo’o iai le mafutaga a nei atunu’u e lua.
“O lenei afā ua mafai ona tase’iina i luga la’au, ae o le faiga pa’aga a saina ma Samoa ua maua’a ma malosi aemaise lava i taimi o mafatiaga.
“Ou te talitonu o le a avea le galulue malosi o le atunuu ma auala o le a tatou toe va’ava’ai ai i se Samoa matagofie e pei ona i ai muamua.”
Sa fa’afetaia e le Peresetene o le Koluse Mūmū a Samoa Leiataua le fesoaosani mai ale malo o Saina.