Fa’amavae atu i Ali’i Seila o le a galulue i atunu’u mamao

By Ilia L Likou 17 April 2018, 12:00AM

O le aso ananafi na fa’amavae atu ai le 59 seila ua maua le avanoa e malaga atu ai e feoa’i i va’a i atunu’u i fafo.

O le afioga i le Minisita, Papali’i Niko Lee Hang na saunoa e apoapoa’i mo i latou uma.

“Ua ifo nei i vanu le lupe a le Tuimanu’a ae lele i le vateatea le lupe a le Malietoa; ma ua logo ai itu e fia o Samoa, ina ua a’e i Tuasivi le faatamasoali’i o tamali’i.

“Lele ua fatisisina le galu ā’au ae māunu le i’a a le tautai o le gataifale, ma ua lupepe ai nei le taumanu’ula ina ua tofu le gogo ma si ana i’a i le alofa ma le agalelei faasoa o le Atua i lo outou soifua ma so matou ola, ua mafua ai ona tatou fesilafa’i i lenei taeao.

“Ua fa’afofoga le Atua i lagona o le olioli i lenei aso e pei ona si’itia ai le vi’iga ma le fa’afetai e le Ta’ita’i o le Sauniga Pastor Fa’afetai Fata, aua o le fa’amoemoe o le asō, o nisi ia o tino va’aia o fa’amanuiaga a le Atua i o tatou tagata e ala mai i fanau.

“Afio le Minisita Lagolago, Afio le Ta’ita’ifono ma Sui o le Komiti Fa’atonu a le Kamuapni o Auaunaga o Va’a, Afifio le mamalu o matua, uo ma e masani, aemaise alii seila o ‘auga o aute’ o lenei sauniga.  O outou sā ma faigā o le a le o’o iai se tautalaga; aua o Samoa ua uma ona tofi.

“Ua tatou potopoto mai i lenei taeao tatou te molimauina nisi o alo ma fanau a le atunuu ua maua o latou avanoa faigaluega i luga o va’a faavaomalo i Europa e galulue ai; ma o nisi oi latou nei, ose taimi muamua lenei ua maua ai avanoa.  

“Ua manatu ai le Malō, ua alagatatau lenei aso ma ona fuafuaga, se’i avatu ni a matou upu faamanuia ma ni tima’iga, e faufau ai lo outou sā a’o sauni atu ai mo galuega i atunuu mamao.

“Ua fa’amaonia mai e le Kamupani a le MSC i Italia (Mediterranean Shipping Company) le sainia ai o konekarate fa’avaomalo mo ali’i seila e to’a 59 e galulue i luga o va’a meli ma va’a la’u oloa, e amata malaga atu ia Aperila ma Me 2018.

O le 25 o ia avanoa seila ua faamanuiaina ai seila Samoa e galulue i luga o le vaa meli fou o le MSC SEAVIEW lea o le a faapaiaina mo lana malaga muamua i le masina o Iuni ma o le toa 16 o i latou nei, o le taimi muamua lenei o le a malaga ese atu ai mo galuega faapenei.

“I le taimi nei, e silia i le 400 le aofa’i o seila Samoa o loo galulue nei i luga o vaa meli, vaa la’u oloa ma va’a fagota. 

“O galuega a i latou nei o loo aumaia ai i totonu o si o tatou atunuu o Samoa vaega tupe e tusa ma le 10 i le 12 miliona tala Samoa i le tausaga. 

“O se fesoasaoni tele ia vaega tupe e le gata i le atina’e o o tatou aiga, nuu ma ekalesia, ae faapea foi le fesoasoani i le siitia o le tamaoaiga o si o tatou atunuu o Samoa. 

“O le naunautaiga o le tatou Malo, ia faaauau pea ona siitia maualuga lea fuainumera ina ia tele avanoa faigaluega mo tatou seila Samoa aemaise le maua ai o seleni mo o tatou aiga, nuu ma ekalesia, faapea si o tatou atunuu lautele.

“O le ‘ava malosi’ ua fa’amauina pea o le mafua’aga autu lea o le tutuli mai o seila e ui oloo maitauina le fa’aitiitia o lea fa’afitauli, pe a fa’atusatusa i tausaga ua tuanai. 

“ O se lu’itau ogaoga; aua e ono faaitiitia ai avanoa faigaluega mo seila Samoa aemaise fanau o taumafai ni avanoa i le taimi nei, ma isi o loo faasolo fa’au’u mai le aoga faaseila i le lala o le Iunivesite i Mulinuu.  

“O le pito laau tausoa lea a le Malo ma matua o le fagufagu pea i fanau ina ia tautuana le auaunaga ia faamaoni ona fai, ma ia faaali aga tausilia ma pulea lelei. Ia manatua o outou, o nisi ia o ave fu’a a lo tatou Malo i atunuu i fafo. 

“A faaletonu le faatinoga o a outou galuega ma faali amio le taupulea, e le gata ina tauvalea o outou matua ma aiga, ae sili ona tauvalea atu ai ma le igoa pele o Samoa. Ia mautinoa e tatou uma, o soo se seila lava e toe faafoi mai ona o le faaletonu o le faatinoga o galuega ma le amio le pulea, e matua’i leai se avanoa e toe maua e lea seila i le lumanai mo galuega faapenei.

“Mo seila fou o le a tuua aiga ma le atunuu mo le taimi muamua, e malu lou faasinomaga ia te oe.  Ae faamoemoe foi le atinae o lou aiga, nuu, ekalesia ma le atunuu ia te oe.  

“Ae silisili ona faalagolago avanoa sasaa mai ile lumanai mo tupulaga fai mai a Samoa i lenei matata ona o oe.  

“Ia galue faamaoni ma filiga ma usitai ma faalogo i tino matutua ua leva ona galulue i luga o vaa, ma ua iai le fa’atuatuaga latou te vaaia outou.  

“Ia mafuta i le tatalo ma ia tumau le faatuatua ini luitau e feagai ma outou.  O le a tu’i atu le mulipapaga ma taputapuai atu.

“E le faaitiitia le agaga faafetai I matua, aiga, uo ma e masani o alii seila uma; ona o la outou tapuaiga leoleoa i le ao ma le po a’o alofaiva fanau mo sailiga manuia; aemaise o le lava papale pea a’o talia ni avanoa ole fanau.  

“O le tu’ualalo; aua nei mapu le taulogologo i fanau, aemaise o taimi e toesea ai mo galuega.  

“O la outou avega tausoa lea ma le Malo ina ia i’u manuia mai konekarate ma maua nisi avanoa faigaluega e faaauau ai pea galuega i le lumanai.

“Ua mae’a faatino le pitolaau a le Malo, saga’i ane laia ‘ai ole tai e faatino lo outou valaauina. 

“O outou māmā na.

O i latou ua fa’amanuiaina; Ratu Afamasaga, Miliona Faasalafa, Malaefono Malaefono, Ropati Konelio, Kuatemane Vaovasa Tone,  Lafo Togia, Afa Taufao, Tuuga Moe, Alafati Fa’anunu Naisali, Junior Matagi, Talolua Pouvalu, Talavou Viliamu, Patrick Senio, Aukusitino Fa’alua, Tanema Muliaga, William Keneti, Victor Toetu Ale, Lolani Fa’asaulala, Viliamu Laupati, Ioane Lisala, Fesilifai Maulalo, Salvation Liuliu, Viliamu Taiai, Atonio Malolo, Kennedy Samaeli, Pania Aurelio, Ierome Mose, Puavao Kohei, Fealofani Saunoaga, Juniour Lesoa, Samuelu Saufoi, Nauma Fiva, Faaua Afoa Gale, Senetenari Siaosi, Sooupu Hicks, Ron Amerika, Tim Lan Yen, Solomona Matagi, Uatea Muna, Rod Paniani, Uele Mupopo, Ele Auvele, Ulkime Mafutaga, Eijivice Une, Faauli Iese, Loligi Maugatai, Sega Solomua, Michael Scanlan, Ricky Peato Ale, Vaaotoaoletalalelei, Ronald Airbase, Iosefa Poalaga, Peniamina Sakaio, Evile Alipia, Bush Tipasa, Faatasimaalii Faaofo, Vaimoli Sasita, Vaelupetali Fuiomno and Falaula Leitupopese.

By Ilia L Likou 17 April 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>