Manumalo mata’ina a le Manu i Pale - Aualofa ai mo Samoa

By Tusitala a le Samoa Observer 17 May 2016, 12:00AM

Ua momoli aloa’ia mai e le Faia’oga o le Manu Samoa Ta’ito’afitu, o Damian McGrath, fa’amanuiaga ma mo’omo’oga fiafia o le manumalo a lana ‘Au i Pale i Farani i le taeao ananafi, mo tagata-nu’u uma o Samoa. 

“O le manumalo lea mo Samoa ma le tapua’iga o lo’o tu’i mai le mulipapaga ma po le fala aua le alofaiva o tama-fanau,” o le sagisagi fiafia lea a Damian ina ua mae’a le ta’aloga mata’ina, lea sa toe fa’amalolosi ai lava tama-ta’a’alo i nai toe taimi mulimuli o le ta’aloga ma manumalo ai loa ia Fiti e 29 – 26 i le sa’iliga siamupini. 

“O se taumafaiga uiga-‘ese, e maka’ukia!” o le alaga fiafia lea a le Faia’oga. 

“Na matou tapena mai lava i le fa’ai’uga o Aokuso, e matua leai lava se manatu e o’o i se tulaga fa’apea e pei ona iai le asō, ae fa’afetai tele i Le Atua ae maise le tapua’iga, ua maualuga ma manuia ai lenei taunu’uga ua iai,” 

“O le matou fuafuaga lava lea, ia matua lava le mānava ma malolosi a’o ta’a’alo. Na taunu’u lea fuafuaga ma o le tali lea ua ‘aumai, ua fiafia tele ai ona ua mafai ona tapena ma sauni lelei iai.” 

E leai se ‘ai o Samoa i le amataga, sa 21- 0, fa’asolo ai ina ua ‘afa le ta’aloga, ua 26 Fiti i le 7 a Samoa, ae na toe maua lava le malosi e taofia ai le ‘Au pito i luga o le ta’amilosaga ma suia ai loa le ta’aloga.

Fa’atoa sui atu lava i totonu tama-sasa’o a Fiti o Samisoni Viriviri ma Amenoni Nasilasila i le amataga o le ‘afa mulimuli, ae soso’o loa sikoa e lua a Tila Mealoi i totonu o le tolu minute, ui e le’i manuia a’a i le pou. Toe fa minute na totoe, o sili pea Fiti i ‘ai e iva. 

Na osofa’i malosi le Manu ma sikoa ai Siaosi Asofolau, manuia fo’i le a’a ma fa’aitiitia ai i le lua ‘ai na va ai ma Fiti. A’o toe minute o le ta’aloga, na finau atu ai le kapeteni a le Manu o Falemiga Selesele ma sikoa ai mo Samoa. Na sikoa fo’i le isi toa o le Manu, le tama o Belgium Tuatagaloa. 

 “Na tou fa’apea ua leai se matou i le ‘afa muamua,” o le tala-‘ata’ata lea a Damian. “Na iai lava le agaga finau ae maise na talitonu uma tama latou te mafaia…Na atoa loa ma maua le agaga lea, maua loa ma le avanoa ma ma va’aia loa ua vaivai Fiti, matou finau loa i le mea e gata ai.” 

Na fesiligia po’o le a le fe’au na ‘ave i tama i le malologa, ae tali le faia’oga, o le iai lea o le talitonu maua’i e mafai ona latou fa’ato’ilaloina le ‘Au a Fiti.

“Na matou manana’o e sikoa muamua. Na ‘ou fai iai, ia finau maua’i ma iai le talitonuga maumaututu ia latou uma. Ua malo ia Aferika i Saute ma manumalo fo’i ia Argentina.” 

O le tasi o mea na mata’ina o le ta’a’alo a tama ananafi, o le latou puipuia lea o le ‘Au a Fiti, lea na va’aia ai le pu’ega manaia e le tama o Belgium o le tasi o tama Fiti na le-o’o ai i le laina-sikoa ma uma ai loa le taimi.

 “O le pu’e lava sa fa’aletonu i le tele o taimi a’o na matua sa’o-lelei ma manuia ina ua mo’omia i lenei fa’ai’uga o le vaiaso.”

Na faia’ina lea lava Samoa ia Fiti, e 42 – 5 i ta’aloga fa’asolo a pool ae na ‘ausia lava le su’ega-siamupini ina ua faia’ina ai Aferika i Saute e 21 – 10 i quarter-final, fa’apea Argentina e 12 i le 14 a le Manu.

Na fa’amatala e Belgium Tuatagaloa, o le manumalo i Pale, o se taimi fiafia lea ma tagata Samoa uma.

“Sa iai lava lo matou talitonuga i le ‘au atoa ma sa fa’amoemoe lava le tagata i tomai ma agava’a masani ua iai,” o lana fa’amatalaga lea.

“A o le fa’amoemoe lava lea, ia o’o i le su’ega-siamupini, ia le gata mo le atunu’u ae mo matou lava fo’i o tama o le ‘Au. Sa matua galulue malosi ma koleni fa’amaoni iai ma iai fo’i nai sasi-sasi, a’o nei la, ua tu’ufa’atasi mea uma ma naunau ai lava ina ia alualu ai pea fa’apea.” 

O le ali’i kapeteni o Falemiga Selesele, na maua le fa’ailoga o le Tama Ta’alo o le Su’ega Siamupini. 

Moni ua malolo nai tama-Fiti, ae o lo’o tumau pea i le tulaga muamua – e 14 ‘ai e maualuga ai ia Aferika i Saute i le fa’atulagana o le ta’amilosaga i le taimi nei, a’o le’i o’o i le ta’amilosaga mulimuli e faia i Lonetona i le fa’ai’uga o le vaiaso. 

Fa’atoa toe talimalo lea o Farani i Ta’amilosaga Ta’ito’afitu nei, talu mai le 10 tausaga talu ai ma sa mata’ina fo’i lo latou fa’afaia’ina o Argentina e 26 – 17 ma maua ai le tulaga tolu, lea fo’i ua ‘ausia ai le lona 10 o fa’atulagana o ‘au i le ta’amilosaga. 

Na malo Aferika i Saute ia Ausetalia (17 – 7) ma sosola ai ma le Ipu Mafolafola. 

O Sikotilani na malo i le Ipu Fa’a’ofu’ofu ina ua faia’ina ai Egelanei e 28 – 10 a’o Potukale na malo ia Uelese i le sa’iliga o le Talita.

O le Aso 5 – 21 o Aokuso e amata ai le Ta’amilosaga Lakapi Ta’ito’afitu i Ta’aloga o le Olimepeka i Rio de Janeiro, i le atunu’u o Brazil.

By Tusitala a le Samoa Observer 17 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>