Taugata le soifuaga, faigata le olaga

Tusia Aruna Lolani ma Fetalai Tuilulu’u ,

56 Hits

Lorrane Tovio ma se tasi o ona alo mai Leauva’a.

Lorrane Tovio ma se tasi o ona alo mai Leauva’a.

Sa ta’ua e se tina i le Fofoga o Samoa, 35 le matua o lona soifua e suafa ia Lorrane Tovio mai Leauva’a, lona mafatia i le taugata o le soifuaga ua iai nei.

O Lorrane e to’afitu lana fanau ma o le taimi nei o lo’o feagai o ia ma le va’aiga o le fanau aua o le tama o le aiga o lo’o faigaluega i le su’eina o se seleni mai tauga apu i Niu Sila.

“E pei e tele na ou fa’alogo i tagata ua faitio i le alu i luga o le soifuaga.

“I lo’u a ia manatu e mo’i a e faigata uma i tagata ae pei a e faigata tele atu i tagata ia e to’atele aiga ae le tele se latou tupe maua.

“O le mafua’aga fo’i lena sa alu ai le tama o le aiga e piki apu aua se lelei o le matou aiga.

“E lelei a le galuega ae sa faimai lo’u to’alua o le taimi nei, e feololo a totogi aua tele a o vaiaso na o le ta’itolu aso faigaluega, e fuafua a i le lelei o le tau.

“O le mafua’aga fo’i lena o lo’o vave omai ai ma o lo’u to’alua e taunu’u mai i le Aso Faraile nei.

Sa ta’ua fo’i e Lorrane o ia fo’i e fai lana toga pinati e fa’atau atu i isi taimi e su’e ai se tupe pe a o’o i taimi e tuai ona maua se tupe mai le tama o le aiga.

 “A lelei a se tupe maua, ua fa’atau fo’i se vaemoa aua le faiga o se mea’ai e tau sui ai se mea e ai i le fale ae o le tele a o le taimi, e lava a matou i le ipu ti ma le fa’alifu talo e ola ai.

 “O lesi itu o lo’o matou mafatia ai o le mamao o mea matou te savali ai aua e fai o le mamao ole a’oga ae toe mamao fo’i le lotu.

“Ma o le mea lena o lo’o taumafai ai le tama o le aiga e faigaluega ma sefe se tupe mo se ta’avale mo le feavea’iga o le fanau i le a’oga ma le lotu.

“Ua taugata tele le soifuaga ma o se tulaga lea ua mafatia tele ai tagata Samoa ma o lo’u a ia maitau ua to’atele tagata e mana’omia se fesoasoani i mea’ai ma meainu talu ai lea tulaga.”

© Samoa Observer 2016

Developed by Samoa Observer in Apia