Galue malosi o le ala o fa’amanuiaga

Tusia Fetalai Tuilulu’u ma Aruna Lolani ,

53 Hits

Galue malosi mo le aiga: Fa’alelei Sio.

Galue malosi mo le aiga: Fa’alelei Sio.

“Ia e leai se isi o faigaluega e tausi ai lo’u aiga ae o le maumaga e ala mai i fua o fuala’auaina lava ma nai fala i tua o le fale o lo’o aumai ma fa’atau atu i luma nei lea o lo’o tau maua mai ai tupe.” Le tamā i a Fa’alelei Sio, 65 le matua o le soifua o Leauva’a. 

I le fa’atalatalanoaga ma le Fofoga o Samoa i le aso ananafi na ia fa’ailoa ai le tulaga o lo’o ua i ai nei le aiga ona o le taugatā o le tau o le soifuaga o lo’o ua soifua ai le tele o nai o tatou tagata.

“Ia fa’afetai aua o mea fa’apenei e pei lava o mea tau tupe ma le alolofa mai fo’i o nai aiga i fafo o lo’o fa’alagolago ai ae silasila mai lava le Ali’i i le aiga vaivai ma e na te le tu’ulafoa’i mai fo’i.

“O mea uma nei e foa’i mai le Ali’i ia lea e tau aumai e fa’atau e maua ai sina seleni aua e leai se isi o faigaluega o si o matou aiga e pei ona ta’ua muamua.

“O le fa’amoemoe foi i le fanau mai fafo, ae o lona lua o le fa’amoemoe o le maumaga.

“Ia o lo’u iloa i ai ua faigata lava le olaga , aua e pei lava a leai se tupe i le aiga ia e leiloa le mea o le a fai, ia pau lava le tulaga e a ona fai ia o le saka ma tunu le ti ia uma fo’i le aso.

 “E pei e popole lava o tamaiti, e pei o fanau lava e taua ia maua lava se mea’ai, e mo le silafia ai a  aumai tupe maua mai le fa’atauina o vaega nei ia ona maua mai ai lea o sina mea’ai.

“ Aua a leai se tupe ia ua leai se fa’amoemoe , ae a maua se tupe mai esi nei ma fala ia ua manaia fo’i lena aso.

 “E tusa o lo matou aiga o lo’o i ai nei e to’alima ae le’o lava le fa’asoa...e to’atasi lava le tamaititi aoga.

“Ia e ‘ese’ese lava, e i ai lava aiga o lo’o matitiva ae pei lava o le lē gaioi, ae lae e maua mea e aumai e fa’atau.

“Ia ae lagona le fa’afetai aua o lo’o  aumai e le Ali’i mafaufauga lelei i le tagata.

“ E i ai lava aso e alualu tupe uma le malosi ae o le fa’alagolago lava ma toaga e tatalo.

“Talu ai o le vaiaso na te’a nei sa timuaga ai foi o lea foi le itu ua leai ai ni fuala’auaina e fa’atau. 

“Talosia ia ae aua nei toe leaga le tau, aua o le maumaga o lo’o fa’amoemoe ai le aiga nei. 

© Samoa Observer 2016

Developed by Samoa Observer in Apia