Aua le fa’afaigataina le olaga - Iosefa
O le lumana’i o so’o se tagata soifua, e fa’alagolago tele i le filifiliga tatau o le tagata lava ia.
O lea le talitonuga o le tamā i a Iosefa Toni o Savaia Lefaga i le fa’atalatalatalanoaga ma le Fofoga o Samoa.
“I a te a’u lava ia, e mau ese’ese lava tagata i so’o se vaega o le olaga o lo’o ua tatou i ai nei, ma o lea lava le tulaga o lo’o ua matua’i taumafai atu ai lava.
“Mo le silafia ai, o a’u mai lo’u laititi na ou filifili lava a’u ia ina ia matua ma fai se ma’umaga aua le tausiga o le aiga, aemaise o le fanau e pei la ina ua i ai le taimi lenei.
Na ia fa’ailoa o le tele lava o tagata ua o latou fa’asea i le tele o nisi o vaega o lo’o ua i ai nei le atunu’u.
“Ia o nisi ua fa’apea mai, ua leaga lava, ae o lo’u ia manatu, afai lava e te fai mai e leaga, o lona uiga o le a leaga lava, ae a o tatou iloa ona o ese mai le fa’apalapala ma le paie, ia o le a le taumateina lava se tulaga lelei o le a o’o i ai a tatou taumafaiga i le lumana’i.
“O le itu mautinoa lava i si o tatou aunu’u, ia o lo’o ua mana’omia uma lava e tagata le fesoasoani i le itu tau suavai, mea’ai ma le tele lava o vaega aua le tausiga o le soifuaga i aso fai so’o.
“Ae o si o tatou olaga i nei i Samoa. E faigofie lava pe a e tago e fa’afaigofie o lea lava le tulaga e ao ona o tatou fa’amanatu i a te’i tatou i aso uma.
“Afai lava o le a le tulaga e o’o i ai, ia o lea lava, o le taumafai lava a o le tagata ia o le a le ola falolo ai le lumana’i.
“O le itu taua e ao ona tatou iloa, ia manatua, e aua le fa’afaigataina mea faigofie ma le tele o le pologa ma le mativa.
“O le a lava le mea ua o tatou lima i lenei vaitau ia fa’aaoga tatau, aua le aga’i atu ai le lumana’i aemaise o le fa’atinoina o vaega tatau o le aga’i atu ai le lumana’i.