Faigata o loo feagai ma le tina
E tasi le fale ae toasefulu tagata o loo nonofo ai.
O le tulaga lea ua mafatia tele ai le tina ia Tuluina Tavita mai le afioaga o Vaitele.
Ae sa ia taua foi o lea faafitauli e mafua mai ona o le leai o se isi e faigaluega ma le isi itu o le le lava o le faasoa.
E 23 tausaga o Tuluina ma e toatasi si ona alo ae o loo gafa foi o ia ma le tausiga o lona tina matina faapea ai ma ona tuagane.
Sa ia taua o latou sa nonofo I Savaii ae peitai na latou omai I Upolu e saili ai se latou manuia ina ua fai I lagi le soifua o lona tama i le tausaga e 2014.
Sa taua e lea tina o lona popolega tele lava o si ana fanau ma lo latou lumanai aemaise lava o le latou nonofo ai I se tamai fale ma le toatele o latou o loo iai.
E pau lava lenei o le fale e mafai ona matou gafatia,” o lana tala lea I le Fofoga o Samoa.
“O le fanua lea sa faatau e se tasi o tuagane ma fausia ai lenei fale ina ia mafai ona matou nonofo ai.
“Ua ova ma le tausaga talu ona matou nofoia lenei nofoaga ae o le manaoga tele o le fia maua lea o se fale lelei ona e fai lava si toatele o matou.
“O le umukuka e tu tafatafa o le mea matou te momoe ai ona o le fale o le fale samoa ma e taumafai lava ina ia matou ofi uma I totonu o le fale.
“e fai o lou tina, o ou tuagane, o au ma si o’u ia tamai aiga.
“E tele lava faafitauli e mafai ona tupu mai i le ituaiga olaga lea e matou te feola ai, e fai o le pepesi ai o faamai aemaise lava pe afai o loo iai se pepe faatoa fanau mai.
Sa taua foi e Tavita o ia sa faigaluega muamua ae ona ua nofo ona o lana pepe.
“O le manaoga lava o le fia fesoasoani I le aiga ae peitai e le mafai ona o le le lava o le seleni.
Ana leai si au tama semanu ou te alu lava I le galuega e tausi ai si ou tina ma le matou aiga atoa.
Afai e te fia fesoasoani ia Tavita faafesootai le numera o le 7283811.