E le’o le malosi!

By Sarafina Sanerivi 17 October 2016, 12:00AM

O le fa’alagolago ai i le Atua ae le’o o le malosi o le tagata, o nisi nei o fuaitau i Afioga Pa’ia a le Atua e tele ina lu’itauina ai le ola ma le soifu’aga o lo’o i ai nei.

E i le faitalia lava la o le tagata pe savali, talitonu ma talia ia pe leai fo’i.

Na fa’ailoa e le tamā i a Ialaoa Poela o Sale’aula i le Fofoga o Samoa, e ui ina tele o fa’afitauli o lo’o ua i ai nei ae pei  o le malosiaga tele lea – pe a iloa ona ola e fa’alagolago i le Atua aua o ia o le tali o so’o se fa’afitauli.

O lona finagalo fa’aalia lea ina ua fesiligia e le Fofoga o Samoa i suiga o lo’o ua i ai nei le atunu’u pe ā fua atu i aso ua alu.

“Ua le toe tutusa aso nei ma aso ua alu, ua tele lava le ‘ese’esega o lo’o ua i ai nei.

 “Ia ua tele fa’alavelave ua tutupu mai i le  ola o tupulaga talavou aemaise o fa’afitauli ma ua tauau ina solomuli atu ai ma le to’atele.

 “O lo’o o tatou molimauina vaega nei i luga o televise ma ata tifaga, o sauaga i tinā ma fanau ua matua’i maualuga ai le numera o feusua’iga fai fa’amalosi ma le fasioti tagata.

 “O Samoa o le atunu’u e fa’avae i le Atua, ia ma o lo’o i ai uma nei vaega uma i le sosaiete o lo’o tatou ola ma soifua ai.

“E sa’o e le fou fa’alavelave o lo’o tutupu mai ae pei o aso la , e  seā seā, ae o nei aso ia ua le asa ma se isi ua fa’amalosia se teineititi, fasioti tagata ma isi soligatulafono mataga i vaiaso uma. “E le o se tulaga lelei lea i se atunu’u e fa’avae i le Atua.

Na ia ta’ua o le pule o le ola ua si’itia mai lea aso i lea taimi i latou ua maliliu ai.

“Ia e pei o le to’atele o lo latou manatu o le pule o le ola o le tali lea i o latou fa’afitauli. “O lo’u iloa i ai , o le tali lava o fa’afitauli o lo’o i le Atua, ma o le tele o vaega nei ua lolofi mai ma ‘a’afia ai lo tatou ona ua vaivai lo tatou ola fa’afitauli.

“Ia ua fa’amoemoe lava le tagata i lona malosi ae galo ai le Atua o le aumaia  mafaufauga lelei ma manatu poto e fa’atonutonu lelei ai le savaliga o lo’o i ai nei.

“Ia ua leai ni lotu a aiga o toe faia i afiafi, ae pei o le taimi lena e fa’asoa atu ai matua i fanua ma ave i ai upu lelei e ola ai.

“O le amataga o mea lelei uma e afua mai le Atua, a nonofo fa’atasi matua ma fanau , ma tatalo fa’atasi o le a le taumate le manuia o lumana’i o aiga.

“O mafutaga lelei e amata mai aiga.

By Sarafina Sanerivi 17 October 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>