Le Lava Totogi
Na maua le avanoa o le Fofoga o Samoa e talanoa atu ai i le tamā ia Savelio Masoe 64 le matua o lona soifua mai le afioaga o Falelauniu, a’o agai atu i lana galuega i le aso ananafi.
Na fa’aalia e Savelio Masoe le le paleni o le tau o le soifuaga ua iai nei Samoa ma le aofaiga o tupe maua o tagata faigaluega i totonu o le atunu’u.
“Ou te iloa o le tau o le soifuaga lava ia i totnu o Samoa nei ua matuai maualuga lava faatusa atu i tupe o lo’o maua mai i galuega o galulue ai i Samoa nei”.
“Ua matua maualuga naua le tau o le Soifuaga ma ua oo atu lava i le maualuga ua matua le gafatia lava e le tele o aiga Samoa pei o a’u nei”.
Na fa’aalia foi e Masoe o le tau o le soifuaga lava ia i Samoa e fetaui lava mo aiga e lelei lo latou tupe maua.
“Ou te iloa le vaega lea pei o fai pisinisi aemaise le Palemia o lo’o fai mai e le’o taugata le soifuaga i totonu o Samoa”.
“Ou fa’alogo foi i le siitaga fou i totogi o tagata maualuluga o le malo ma fa’aulu’uluga o Matagaluega ese’ese i Samoa ma o le isi lea le paleni ona o le siitaga ua na’o latou ae galo ai le toatele o le atunu’u”.
Na fa’asoa mai foi Masoe i le totogiina o lafoga a faifeau.
“Ua matua’i le talafeagai lea tulaga”, taua e Masoe.
“O lo’o taumafai malosi le malo e su’e tupe mai soo se vaega lava o le atunuu ae ua matua le maua ai lava ni tupe mo tagata o lo’o galulue malosi mo galuega fai o le atunu’u”.
Na taua foi e Masoe e le na’o atunu’u i fafo o lo’o iai tagata sulufa’i, ona o lona taofi o lo’o maua foi i Samoa nei.
“O tagata uma lava ua manuia i le quota mo Niu Sila o tagata sulufa’i nei mai Samoa o lo’o taumafai e o ese atu ma Samoa e tausi mai aiga mai Niu Sila”.
“Ua le toe foi nofo iinei ona o le taugata ma le leaga o totogi o tagata faatusa atu I le tau o lo’o iai nei le soifuaga o Samoa”.