O la’u tala fo’i

18 February 2016, 12:00AM

1. Matauina i Tala Fou se ulutala fai mai o lea “ua faaaliali atu lole mo le faiga-palota a le Tautua.

E aliali mai la o nisi o ia lole fai mai a manumalo le Tautua i le Faiga-Palota Tele o loo loma nei-o le a mafai e soo se tagatanuu pe o se sitiseni o Samoa o nofo i fafo-ona palota, O lea fuafuaga faatasi ai na nisi o le tele o folafolaga o loo tusia i totonu o le Manifeso aloa’ia a le Tautua Samoa Party- lea na tatala aloa’ia i le EFKS Hall ananafi!.

Afai la ua toe lagā e le Tautua Samoa Party le faatagaina o sitiseni uma o Samoa ona palota i faiga-palota a le atunuu- o le fesili-o ai na faasaina lea tulaga ae sa faataga muamua? Ia atonu foi o se vaega o lea taumafaiga e faasa sitiseni o Samoa mai fafo ona palota i Samoa nei-na mafua ai ona fai le aiaiga ina ia tautua muamua i le nuu poo le itumalo ona faatoa mafai ai lea ona palota! O fea la le fai mai- o le Pati e puipuia aia tatau a tagata?

Afai o le aia tatau lea a soo se tagata Samoa na fanau i Samoa nei ae o loo nofo i atunuu mamao, o le faigamalo la a ai na faasaina? O le a le fe’au ma le pisinisi a le faigamalo i aia tatau a tagata Samoa na soifua mai ma i latou?  O le a la le tautua lea e tau mita’i mai e le faigamalo?

O le tautua tuavae poo le tautua matalilo? Faapefea tupe ma mea uma o loo lafo mai e ia tagata e tausi ai o latou aiga, faalavelave ma mea e fai- faaulufalega o malumalu tapua’i o latou nuu ma afioaga, falea’oga ma falema’i ma isi lava mea? E le o se tautua la lena mea? O le a la le uiga o le tautua lea e mita’i mai pe a o’o i le taimi o le palota? O nei mea uma-o faailoga vaaia ia o polokiki leaga ma le soli pala o aia tatau a tagata o le atunuu e palota ai! O le a sou taofi? 

2. Matauina foi i Tala Fou se ulutala fai mai –E le noatia le Malo i ni faiga faa-tamaiti ma le faavalevalea- ma o le faaaliga lea a le Palemia. E matau atu la i nei tala ma faaupuga fela’ua’i-e peiseai e faasino i le Tautua Samoa Party! O le matau la a le atunuu i nei upu felafoa’i-ua avea lava nei mea o polokiki ma le fiapule aoao ma mea ua matua leai ai se va fefaaaloaloa’i o matai Samoa!

O le uiga o le faamatalaga-ua avea lava nei mea o tofi faa-polokiki ma isi mea ua leai ai se ava fatafata faa-Samoa i le va o matai! Ia manatua la-o Samoa ua uma ona tofi ma e leai se fiapoto e toe faia i ai. O le Palemene ma mea uma lava tau le malo o Samoa- e faamuamua lava lana aganuu! Poo ai lava la e avea ma faipule poo le Minisita- e le avea lena ma ala e sui ai lona tulaga mai le mea masani. O le uiga la o se manatu-tafefe i se manaia i le silasila ma le faafofoga a Samoa pe ana faamuamua e sui o le Palemene o latou tulaga faale-aganuu-ona leai lava lea o se tulaga fete’ena’i ma le felaua’i e pei o ni misa a ni fafine! O le a sou taofi? 

3. Matauina foi i Tala Fou fai mai ua lu’i e le Palemia le tulaga agavaa o lona fili-ma o lea fili e faasino i le Sui Faatu lea o le a la tauva i le Palota Lautele. E aliali mai la o lea tagi a le Palemia i le faamasinoga-o le fia faamaonia lea o le tulaga agavaa o le sui faatu lea o le a la tauva i le Faiga Palota Lautele i le masina fou. O lea la lu’itau a le Palemia-e faasino lea i le faatinoina o le monotaga mo le 3 tausaga-ona faatoa agavaa ai lea!

O le fesili la-o ai na faia lenei tulafono faavalevalea? O le a la le faamaninoga poo le definition o le monotaga lea e ta’ua? O le tautua tuāvae poo le tautua matalilo? O fea na tautua lenei anoano ua fai ma sui o le Palemene? O aofia i le upu “tautua” tupe faamomoli mai fafo mo faalavelave o le aiga ma le nuu ma le ekalesia? Ae o le fesili taua lava-“O talafeagai lenei Tulafono o le tautua-ma le aia tatau a le tagata pe a tu’u i le Faavae o Samoa poo le Tulafono Sili lea a Samoa?

O le faiga-malo la a ai na fai ai lenei tulafono e uiga i le tautua? O le HRPP poo se isi lava faigamalo?  Ia manatua la- o le tautua- e le faapitoa i le tautua tuavae i le matai-e aofia ai ma faalavelave fai o le aiga, nuu, ekalesia ma le itumalo!

Afai la o se tagata e le o tautua tuavae ae malosi lana tautua i le Ekalesia, lona aiga ma lona nuu-o le a la le igoa o lena mea? Afai la e le mafai ona aveeseina lenei aiaiga faavalevalea ina ia tautua muamua ona faatoa mafai ai lea ona tauva mo le sui o le itumalo-o le itu lenei e tatau ona ave i ai le faamuamua ma ia aveese loa lava-leaga o lea ua fai faa-Komunisi Samoa-talu ai fuafuaga leaga a vaega faa-upufai-talu ai le fiapule toatasi ma le fiapule aoao! O le a sou taofi?

18 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>