Ripotia e PaiMulitalo Ale

Fa’aliliu e Seagaitumua Tupuola

O le alii lea ua na lu’i le Palemia o Tuilaepa Sailele Malielegaoi i Lepa ua i ai se lu’itau e faasaga ia te ia i le Faamasinoga e tatau ona fo’ia pe afai e fia tauva i le Faiga Palota Lautele ia Mati. Ua faaulu e le Palemia o Tuilaepa se lu’itau tau agavaa e faasaga ia Tu’ula Kilifi Tuitui i totonu o le Faamasinoga Sili, ona o se taumafaiga ina ia mafai ai e le Faamasinoga ona faalauiloa le le agavaa o lona fili. 

O le talosaga a Tuilaepa o se tasi lea o lu’itau e iva tau le agavaa na faamaonia e le Faamasinoga Sili i le afiafi ananafi.

E tusa ai ma faamaumauga na maua mai e le Samoa Observer, o le lu’i a Tuilaepa’s e faavae i luga o le tautua e tolu tausaga a Tu’ula i le nuu e ala i se monotaga.  O le taimi lona lua lenei ua lu’i ai Tu’ula e le Palemia e tusa ai ma lea lava mataupu. I le Faiga-Palota Lautele talu ai-na faia’ina ai Tu’ula i lea finauga ma sa le mafai ai ona tauva. O le fofogaina o lea lu’itau ua toe tolo i le taimi nei se’ia aulia le Aso Faraile 19 o Fepuari 2016.

O lea mataupu o le a fofogaina i luma o le Faamasino Sili, Lana Afioga Patu Tiavaasu’e Falefatu Sapolu. O Ananafi na faatonuina ai e le Faamasinoga e faapea e ao i tagata talosaga uma ona faaulu a latou tagi taeao ae ua tuuina atu i itu tete’e le avanoa se’ia o’o i le Aso Faraile e tuuina atu ai a latou tali. 

O le lu’itau muamua na faailoa i totonu o le Faamasinoga i le Aso Gafua.

O lea tagi na faaulu e le Faipule o Lotofaga o Fiame Naomi Mataafa e faasaga i lona fili o Fiaola Iosua Lole, ma na ta’ua ai sona faasalaga tau feoaiga i ala tetele. 

O loo filo i lu’itau e valu na ta’ua ananafi se lu’itau e tasi na tuuina atu e le Faipule mo Palauli Le Falefa o Faumuina Tiatia Liuga, e faasaga i lona fili o Le Tagaloa Pita. Fai mai Faumuina o lona fili e le agavaa talu ai- na te lei faia se monotaga e tatau ai i totonu o le nuu. 

O loo lu’i foi e Faumuina Tiatia Mapesone Malo ma lona agavaa tau le nofomau. I Vaimauga Sisifo, ua faaulu e le Faipule o. Tuisugaletaua Sofara Aveaua se lu’i tau palota e faasaga ia Fuatimau Maumea Leniu, ma na ta’ua ai se mana’oga tau le nofo mau mo le tolu tausaga. 

O loo i ai foi se taua a tamaitai i le Gaga’emauga Nu. 2 lea ua faaulu ai e Seuoti Sheryl Muagututia se lu’itau e faasaga ia Semau Faamau Levi e tusa ai ma lona agavaa tau le nofomau. I le Gagaifomauga Nou 3, ua faaulu e le Fofoga Fetalai o La’auli Polataivao Leuatea se lu’itau e faasaga i lona fili e toatasi o Faaulusau Rosa Duffy Stowers.  Fai mai Laauli o lona fili tamaitai na te lei faia se monotaga e tatau ai e pei ona manaomia e le tulafono. 

I Aleipata Itupa i Luga, o le avea ma sui faatu o Leo’o Dr. John Adams ua matua iloiloina i le taimi nei. O le Faipule o loo i ai nei o Amituanai Fagaivalu Kenrick Samu ma i latou e lagolagoina o ia o loo finau mai e faapea e le’i faamalieina e Leo’o le mana’oga tau monotaga mo le tolu tausaga e tusa ai ma le tulafono. 

Ua uma foi ona faaulu e Amituana’i se lu’itau lona lua e faasaga i le isi fili. Taula Faulaau Sini, e ala i lona ta’ua o sona faasalaga talu ai. 

I le Anoama’a Sisifo, o loo feagai Leota Leulua’ialii Itu’au Ale ma se lu’itau tau lona agavaa mai Alii ma Faipule o Solosolo, e pei o Leota Seilu Visesio Seufata ma isi.