Lauga - “O le onosai e iloa ai le mamalu o le Atua”

By Rev. Petaia Setu 18 February 2018, 12:00AM

E leai lava se mea e tumau i se mea e tasi. E oso a’e le la ma toe goto atu. E tua foi le po i le ao. O le tai fana’e ma le tai gau. E le sologa lelei pea foi taimi uma. Fai mai Paulo, o le aso e taugalemū ai, ma le aso foi e le taugalemū ai. O le taimi ua fiafia, o le aso foi ua faasiasia. O le tele ia o faamanuiaga e aumai e le Atua ia i tatou.

A o na foi faamanuiaga, o loo iai faatasi ma faafitauli e tofotofoina ai tatou. E pei ona lu’iina ai Iopu. Ua avea mea uma lava. Toe lava o le ola o Iopu. E oo lava i le fafine sa fai ma toomaga, oka! ua fai ma faasalaga! Ua faaosoosoina Iopu e faifai i le Atua ma oti atu ai. O le tali a Iopu, “Ua tatou talia mea lelei mai le Atua, ae tatou te le talia ea ma mea leaga?”

O le onosa’i, o se lagona o le soifuaga faale tagata e faigata ona ausia e le tagata. E mauagatā. Ua le o se uiga e faigofie ona tausia e se tagata, pe tumau ai foi i lona olaga atoa. Auā e mafai ona ou faamatalaina faapea, o le onosai, o le ioe e tali i tiga ma faigata o le olaga e fetaia’i ma oe.

O le inu i puapuaga ma faafitauli uma e osofa’ia oe. O le malosi na te lavātia tauave ma amo le mamafa o sauaga a le alii o lenei lalolagi. Ia pe faapea foi, o le ola ua tuu oti. A o le onosai, fai mai Iesu, “e maua ai lo outou ola.” E tua lelei. Auā e tali i manū. Ae fai mai foi Paulo, o le onosai, e tupu ai le mautinoa. O lona uiga, o le onosai, e te malamalama lelei ai; e te ola ai; e pupula ai ou  mata ma e iloa atu le mamalu o le Atua silisili.

Malamalama lelei le tala ia Iopu. Na matua ogaoga tiga ma puapuaga sa faataugaina lenei auauna. A o tiga  ia o loo tā’ua e Iopu, o mea leaga. O mea leaga ia o le soifuaga e tatau ona tatou tapenapena iai, E le mafai ona alofia. Ae tatau ona tatou talia. Auā o lu’i ia o le ola e maninoa ai le silasila mamao i le faamoemoe mautinoa. Afai tatou te le onosa’ia, tatou te le mafai ona iloa le matagofie o le Atua. E le mafai ona tatou vaaia le mamalu o le Atua pe afai tatou te pala’aai ma fiugofie. Ua iloa e Iopu e mai le Atua mea uma. E i’u foi i le Atua mea uma. Auā e ā le Atua mea uma.

E faalogo i le Atua mea uma. O le ala foi lea o le le mafai e Satani ona faatoilalo le faamoemoe o le Atua. A o le faamoemoe na faaalia i le mautinoa. O le mautinoa o le tagata e telē e fatu. E toa le loto. E onosa’i. Ua tautala le onosai e molimau i le mamalu o le Atua. A o le mamalu fai mai Paulo, o luga o le satauro. La lea ua gagana ai Iopu, “Ieova e, ua ou iloa e te mafaia mea uma; e le mafai ona vaoia se mea e te finagalo iai.” 

Toe toe lava a tuu i le pu lenei tamā e le i faia’ina i le elo o lona tino i luga o le fogaeleele. Ua malo lona onosai i tiga ma leaga uma sa fai ma taufaafefe. 

E le o tā’ua e Luka se onosai o le tagata na tauaso (Lk.18:35-43)! Ae ua lava ia le tele o aso ma tausaga o le olaga tauaso o lenei tagata tatou te iloa ai, sa oono, sa talotalo ma moomoo, e fia pupula i galuega a le silisili ese. O le lē mafai ona taofia o lona tuu ‘alaga atu ia Iesu ua tatou iloa ai, sa iai le faamoemoe ola i lenei tagata.

O lona faamoemoe sa fausia mai i lona mautinoa, e ola i le mamalu o Iesu Keriso. Ua talitonu e sa’oloto i le mana o le Atua toe tu. Ua ia iloa lava, o lona itū aso lea (Lk18:41). Ae manatua foi fai mai Paulo, o le mautinoa e tupu mai i le onosai. E le i faia ma le masalosalo le tatalo a le tauaso. Ae ua fana sa’o le malama; ua vili tonu le ifi a Māina, “Le Alii e, ia vaai o’u nei mata.” Ua fai ma le mautinoa, e faaeaina le onosai. E le tali tuālimaina faiva o onosai.

E tua i ola le onosai. Le onosai, sa na sii Iopu i le maa salafa. Le faamoemoe ua tini. Fai mai Iopu, “A o lenei, ua vaai atu o’u mata ia te oe.” Ua tau ai le faamoemoe. Ua atoa tino o le tama. U fesāga’i ma le Atua!! Se ā se isi mana’o? Le tioa a oso i luga le tagata sa pipili! Ua vivii! (Galu.3:8) Ua iloa tino le faamaoni o le Atua.  Ua manogi i le mamalu o le Atua. O la le Tusi Sa, o le faamoemoe ua taunuu o le laau o le ola lea!

Samoa e, o le faamoemoe ola lea. O le faamoemoe sa āsa mai i ala faigata ma le tiga. Tasi o le mea ua a’oa’o mai Iesu e tiga foi outou, ae liua lo outou tiga ma olioli (Ioa.16:20). E le itiiti le iva masina e oono ai tina i ona ma’itaga. O taimi ma’ale’ale lea a tinā. E ita, e faalii, e faiaso, e matanana, e tagisā, e fuā. O lagona uma ia e amo.

E oi; e oono; e mapuea; e sela. A oo ina luluti ona tiga fanau, e tagi; e ’e’ē; e tuu feula. Samoa, e tiga; e le faigofie. A o le sekone lava e faalogoina ai e le tinā le leo o le tagata fou, e galo uma ai ona tiga. E le toe manatua le iva masina. Ua liua le tiga i le olioli. Ua tali le oono! Malo onosai. Ua iloa tino le mamalu o le Atua.

E faaalia i le faamoemoe fou. O le faamoemoe ola. O le faaeaina. O faamanuiaga mai le Atua e ona faamanuiaga. O le mautinoa lea sa tulimata’i. Sa talitalia e le olioli.

Le au faatuatua e, ’aua tou te tulemoe. Inā mataala ia auā o loo lamalama mai le au a le alii o le lalolagi. E le tuuaunoaina oe ma a’u e faafitauli. E faafitauli lava taimi uma. E sa’o si toeaina o Paulo. E le filemu ai pea aso uma. ’Aua le fefe; ’aua le palaai i luitau o le olaga. Tatou te talia mea lelei e vivii ai i le Atua. E tatau foi ona tatou talia mea leaga e finauina ai lo tatou faamaoni i luma o lo tatou Atua. O lona uiga, o le onosai le ki. O le onosai tatou te iloa tino ai le alofa ma le faamaoni tele mai o le Atua ia te i tatou.

’Aua le manumanu, ’aua le papano. E ā le Atua mea uma. Silasila la ia Iopu. Fai mai ua sili foi ona faamanuia e Ieova o le gataaga o Iopu i lona amataga. Ua faateleina mea ua ia te ia nai lo le amataga. Ua foaiina foi e Ieova le Atua ia Iopu o atalii ma afafine e sili lo latou lalelei i tagata uma. (Iopu.42:12-15).

Samoa pele e, o lē fea taimi o lou soifua e mafai ai ona e vaai atu i le Atua? A o ai o tatou ua faaali iai e le Atua lona mamalu? E le i faigofie le taua a Iopu. E le itiiti foi se taimi na oono ai le tauaso. A o le tala ua tatou iloa, na malo le onosai. A o le onosai foi, e le maua i luga, a o lalo. Ioe o lalo e mautinoa ai le faamoemoe ola; le faamoemoe tumau.

I le ma lenei; o mamalu o le Atua, o ona vavega. O lona mana faaola. O lona silisili ese. O lona faamaoni; e lautua i lona alofa. O mamalu na o le Atua e faaalia i le tagata e faamaoni lona onosai i lona Alii. E le natia i le tagata e mata’u i le Atua. E faaeaina ai le tagata ua tumau ia Iesu Keriso. E faaolioliina ai le tagata ua alofa moni i le Atua. E faapupula iai le tagta onosai.

O’u uso e, ia Keriso, o la Paulo, tatou te le tau ma tagata, a o alii o lenei lalolagi. E le faaolaina oe ma a’u i o tatou mamalu o loo tauave. A o le oono faatasi ma le mautinoa. Tiga faatasi ma le mălie. Ioe, e talia ea na o mea lelei ae faapefea mea leaga? Faapefea mea mamafa ma mea faigatā? O la Paulo, “Ia outou lototetele i le Alii ma le malosi o lona mana” (Efe.6:10)

Ae fai mai Iesu, “E maua foi outou e puapuaga; a ia outou lototetele, auā ua ou manumalo a’ia’i i le lalolagi.”(Ioa.16:33)

 

Amene

 

7737063/7783782

By Rev. Petaia Setu 18 February 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>