Faigata le Olaga i Samoa

By Ulimasao Fata 18 October 2017, 12:00AM

Na feiloa’i atu le Fofoga o Samoa ma le Tama o Pelesasa Mano mai le afioaga o Utuali’i a’o aga’i atu o ia i le gataifale mo ana fa’agotaga.

Na taua ai e le Tama ia Pelesasa Mano o lana lava le masani i aso uma o le momoli ina lea o lana fanau aoga i le taeao ona aga’i atu lea aua e tapena le meaai o le afiafi mo lona aiga.

“Ia pei foi ona tau mai le savaliga o lea fa’atoa foi mai aua le momoli ina lea o le fanau aoga i le aoga ona fa’atoa sau lea iinei le sami aua se i’a mo le taumafataga mo le afiafi."

Na taua ai e le Tama ia Pelesasa Mano o ia lava o lo’o faapena ona gafa lea ma le tapena ina lea o meaai aua le aiga aua o lona atali’i matua lava o lo’o faigaluega aua le totogiina lea o pili a le latou fale.

“O lo’u atali’i matua lava na’o ia lea e faigaluega i le matou aiga atoa ma gafa lea ma le totogiina o matou pili o le vai ma le eletise ae o a’u lava ia o le tapenaina lea o le matou meaai moa so uma”.

Talitonu foi le Tama ia Pelesasa ua matua faigata lava le olaga ua iai nei ma Samoa.

“Tele lava le faigata ua feagai nei ma le matou aiga ona o le toatasi o le tagata o lo’o faigaluega ia o le mea ua fai o le toe fo’i lava i tua i fa’atoaga aemaise mea fafaga ia ma le gataifale aua le tausiaina lea o le aiga”.

“O le numera o i’a ua tele ina maua mai i matou upega ua matua le tutusa lava ma le numera masani ai i aso ua tuana’i, ua le toe tele lava se i’a maua i lenei vaitau fa’atusa atu i aso ua mavae, ai ona o le fesuiaiga o vaaiga o le tau i lenei vaitau”.

Na ia taua foi o isi o taimi e n ate faataua ai i’a o lana faiva.

“O le tele a o taimi e lelei ai le faiva ma tele i’a o se faiva ia ona mafia lea ona tuu ese nisi i’a aua se isi tupe fa’asili mo le tausiaina o le aiga, ae a le lava le numera ia ona tu’u lea na’o le meaai a le aiga e fai ai."

Molimau foi le Tama ia Pelesasa o le isi lea mafuaaga ua fa’atupulaia ai le faigata o le olaga I Samoa nei ona o le laiti o avanoa faigaluega mo le lautele aemaise foi  o le taugata o le soifuaga.

“O le leai ma le maualalo o avanoa faigaluega i Samoa nei ma le taugata o le soifuaga ua mafua ai foi le tele o solitulafono i totonu o nu’u."

“O a’u e leai se galuega i Apia ae na’o le pau lava lea o la’u galuega lea e fai nei aua le tausiaina lea o lata aiga."

“Pau le tatalo ia ia lelei mai le aoga a si a’u fanau ina ia mafia ona latou talitali atu le faigata lea ua iai nei le olga i Samoa i taimi e fai ai a latou aiga."

By Ulimasao Fata 18 October 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>