Faatamala le ofisa o va'a i Salelologa

18 December 2015, 12:00AM

Susuga ile Faatonu,

 Sa faamoemoe matou te malaga atu ma lo’u tina ma ou tuafafine e toalua mai Savaii mo Apia i le vaa o le 2pm i le Aso Gafua, 14 Tesema, 2015. Mo le faafaigofieina o le aauaunaga a le Ofisa o Vaa, sa fautuaina ai pasese uma ina ia tuu i fafo umu ma atopau ma isi meatotino e pei ona masani ai (I le vaega tonu lea e  gasolo ane ai le pasese taunuu ma uia e pasese o loo sauni e malaga ese).

O le tulaga faanoanoa “ona o le toesea ai o le matou atopau, o loo iai ni meatotino taua ma ni suvania mai fafo”  i le va o le taimi na taunuu mai ai le vaa o le 12 mai Apia e oo atu i le 2pm.

E le’i maua le ato ina ua sailia le vaa atoa ae lei malaga ese atu i le itula e 2 mo Apia. O la’u faitioga e faasino tonu lea i le (1) tagata sa gaoia lea atopau ma le lona (2) o le Ofisa o Vaa (ona o le taimi tonu lava lea ua i lima ai o le latou aufaigaluega le vaaia lelei o meatotino a le lautele a le atunuu).

O le mea moni, e le tatau i se tagata o malaga mai i le vaa o le 12 (mo se faataitaiga) ona piki se ato, poo se umu, poo soo se isi lava vaega e le patino ia te ia o loo i luga o le uafu, se’ia vagana ai lana ia lava meatotino na sau ma ia mai luga o le vaa. E le tatau foi i se tagata sa faamoemoe e malaga mo Apia i le vaa o le 2 ona ave se meatotino e le patino ia te ia.

Mo le silafia lelei e le Ofisa o Vaa, ua tuu atu le faamoemoega o pasese uma i le aufaigaluega o vaa i luga o le uafu; e le o le talatalanoa, faatamala ma faatalale i taimi o galuega ae o le mata-‘alia, tiotio ma le vaaia lelei o meatotino a tagata. O le mea moni, sa matuai faatamala lava le Ofisa o Vaa i Salelologa i o latou  tiute i lea aso. O meatotino a tagata taitoatasi o loo malupuipuia lea e i latou ma o vaega na o loo aafia i le lisi o latou tiute faatino i aso uma. 

E fautuaina ai e faapea (1) afai o faitau le tagata sa gaoia lea atopau- e sili ona toe faafoi mai lea meatotino ma tuuina atu i le Ofisa o Leoleo i Tuasivi, (2) afai e le maua e le Ofisa o Vaa le tagata sa gaoia lea meatotino, e matua tatau ona faatupe ma toe totogi mai e i latou vaega uma o loo i totonu o lea ato (faapei o atopau ma meatotino leiloa a tagata feoai i vaalele, lea e toe totogi mai e le kamupani vaalelei i le tinoitupe) ona o le taimi tonu lea o le latou galuega lea sa toesea mai ai lea atopau.

Ae mo le agai i luma, e sili ona faaauau le toe faia o toleniga mo le augalulue uma a le Ofisa o Vaa ia iloa e le tagata le mea e tu ai i taimi pisi ma taimi uma. E tatau foi ona ese se ala e uia e pasese taunuu ma pasese o le a malaga ese atu ina ia mautinoa le malupuipuia o meatotino a tagata uma.

 

Ma le faaaloalo tele. S.M.S.

18 December 2015, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>