Tautala mai, ae ‘aua le fefe!

218 Hits

Na valaaulia le tusitala e le Samoa Umbrella o se Faalapotopotoga Tua lea ma o se vaega sooupu e Tete’e Atu i Faiga Pi’opi’o a le Itulagi o le Pasefika a Malo Aufaatasi-lea o le a na tagofia mo ni aso se lua Faiga Pi’opi’o i le Hotel Millenia ananafi. Na talosagaina o ia ina ia talanoaina “La matafaioi a nusipepa e tusa ai ma le taofia o Faiga Pi’opi’o.” O lana faamatalaga la lenei”

 

Tusia- Mata’afa Keni Lesa

Faaliliu e Seagaitumua Tupuola 

 

 

Ou te faa-talofa ma faa-feiloa’i atu. Ou te fia faafetai atu ia te outou na faamaopoopoina lenei mafutaga tau aoaoga mo le lua aso-ona o le valaauina o a’u ou te faia se tautalaga. Ua ‘ou lagona la outou faaeaea ia te a’u.

Tu’u maia o a’u se’i o’u momoli atu le faamalo ia te outou uma mo lenei taumafaiga matagofie.  

E momoli atu le faafetai tele i le Ofisa o Malo Aufaatasi Tau Fualaau Faasaina ma Soligatulafono (U.N.O.D.C), le Polokalame Tau le Atiina A’e a Malo Aufaatasi (U.N.D.P), le Samoa National Youth Council (S.N.Y.C) ma le Samoa Umbrella mo Faalapotopotoga Tua (S.U.N.G.O) mo lona avea ma ta’imua i le tatalaina o talanoaga e uiga i se mataupu lea e manatu tagata e tele le paoa o i ai ma le malosi-e sili pe a ‘aua nei talanoa i ai. 

O le itu ua ‘ou maua e matua tulaga ese o le aofia ai lea o tupulaga talavou i totonu o se talanoaga e taua tele. Ua outou silasila la, i le avea ma ta’ita’i i le lumana’i o lenei atunuu, o se laasaga taua tele lenei mo le fausia o i latou mo mea o loo i luma. 

 I le taimi nei la-a pa’ia loa faiga pi’opi’o ma le afaina ai o tagata, matou te talitonu –na te faatama’ia le atiina a’e ma tupu mai ai faafitauli ma le mativa.  E leai se masalo i lea tulaga. 

I le Samoa Observer, matou te talitonu o loo i ai se sootata e le mafai ona faafitia i le va o faiga pi’opi’o i totonu o le malo ma le vaega o tagata faipisinisi-ia o loo tuufau e le faasalaina ma le faatupula’ia pea o le aofai o tagata matitiva i totonu o Samoa-poo i soo se isi lava atunuu-ona o lea itu. E mafua lena ona o taimi uma lava e faaaoga sese ai tupe a le malo ma lē mautali mai i ai, o le avanoa mo se tamaitiiti poo se teineitiiti na te maua ai le aoaoina, o le maua e se tina poo se tina o le tina o se tausiga lelei tau le soifua maloloina-ua le mafai ona maua. 

O loo mafai ona maua i se tulaga lautele faamatala molimau e lapata’ina ai tatou e faapea o loo tuputupu pea faiga pi’opi’o pe afai e le mafai ona taofia. O lona uiga e faapea o le taimi lava e avea ai se faiga sese a se vaega toatele ma aloa’ia faale-tulafono; e leai se mea e mafai ona toe taofia ai tagata faigaluega pi’opi’o mai le faatinoaina o nisi mea se tele e sili atu ona faigata-ma gaoia ai nisi tupe se tele mai ia te oe ma a’u, ma tagata totogi lafoga e leai so latou leo.  

O le faamalaia lenei a faiga pi’opi’o e pei ona tatou iloa. I le taimi nei la ma lenei aoauli-sa talosagaina a’u ina ia ‘ou talanoaina “Le Matafaioi a Nusipepa i totonu o le Taofia o Faiga Pi’opi’o.”

O faiga pi’opi’o e faigofie lava ona faamaninoina o le faaaoga sese lea o le paoa o le malo mo le manuia o le tagata lava ia poo mo le manuia o se vaega. E mafai foi ona ‘ou fai atu o faiga pi’opi’o e le o se mea fou. Ua leva ona taamilomilo solo ae tatou te lei fananau mai ma ua leva ona tatou mafuta talu mai lena taimi. 

O le upu moni ma le faamaoni ia te outou, ou te le o mautinoa pe mafai ona matua taofia pe a fua i le faananau o tagata ina ia malaga faatasi ma le lalolagi fesuisuia’i lea e aofia ai le tamaoaiga fai tino, tulaga-tofi ma tupe-le anoano o tupe. I totonu o nusipepa, o la matou galuega o le tuuina atu lea o se avanoa mo le fefaaaliaiga lautele o manatu, o lana matafaioi o le faailoa atu, a’oa’o, ma faafiafia, Ae peitai, o la matou matafaioi e aupito i sili ona taua, ma o se matafaioi lea ou te lagona e faapito lona taua i lenei potopotoga i le asō-o la matou matafaioi lea o le avea ma ta’ifau leoleo o le malo. 

I totonu o li’o o le temokalasi, e faaigoa i matou o le esetete Lona Fa. Matou te auai e avea ma taliga ma mata o sui o tagata lautele e lipoti atu ma le sa’o, ma fai fesili faigata ma ia ‘aua ne’i faatosinaina i totonu o se taumafaiga e fuafua ai pe o tausia e o tatou ta’ita’i a latou folafolaga ina ia faimea tonu, mautali atu ma ia pulea le atunuu e tusa ai ma faiga ua faataoto tau faigamalo lelei. O le mea moni, matou te talitonu o loo faatino e nusipepa se matafaioi taua tele tau le siitia o faigamalo lelei ma le pulea o faiga pi’opi’o.  O tala a Nusipepa, faamaumauga ma le faatulagaina e le gata ina siitia ai le silafia o tagata lautele e uiga i faiga pi’opi’o, ae ua faailoa atu ai foi i alii ofisa faimea pi’opi’o e faapea o loo mata’ituina i latou. 

I nisi mataupu, o ia tala ua taunuu ai i ni faaiuga taua tele- e aofia ai mataupu tau Faamasinoga, faamavaega ma suiga i tulafono –mo le mea lelei e sili atu. 

Ae peitai, o le mamafatu o le avega a nusipepa e faaauau pea. O le Lipotia o tala fou mo se faataitaiga, e ono una’ia ai faalapotopotoga a le malo ina ia faatinoina ni suesuega aloa’ia i tuuaiga tau faiga pi’opi’o. 

E le gata i lea, o faamaumauga o tala fou e faailoa mai ai mea na maua i sailiga a faalapotopotoga e tete’e atu i faiga pi’opi’o –e pei o le Ofisa o le Pule ma Su’etusi Sili, Komiti a Alii Ofisa o le Palemene, ma le Komesina o Sulufaiga ma isi-ua faapea foi ona latou faamalosia le tulaga talafeagai faale-tulafono o nei faalapotopotoga ma faaitiitia ai le tulaga  faigofie lea o loo umia ai e vaega e aafia ai ia e umia le pule e mafai ai ona fai taaloga i totonu o a latou galuega.    

I le isi itu, a faailoa atu e tusitala o nusipepa ni faiga leaga  e o’o lava i faiga pi’opi’o i totonu o le tele o faalapotopotoga a le malo (o faamasinoga, leoleo ma le ‘au-galulue e tete’e atu i faiga pi’opi’o- e taofi. O le taunuuga e tulai mai ona o le una’i a tagata lautele e taunuu ai i se tulaga toe fuata’ina o ia faalapotopotoga, le aoga mo se taimi umi ma le tulaga lelei o nusipepa e galulue ai e avea ma mamafa faafeagai ua faamalosia e faasaga tau i faiga pi’opi’o.

O le faafitauli i nisi o ta’ita’i, ua matou maua e faapea o nisi taimi pe a mae’a o latou taimi i o latou tofi –aemaise ai lava pe afai e umi se taimi sa latou umia ai ia tofi- e foliga mai e peiseai e galo ia i latou folagolaga na o latou faia.

O le mea lea-tusa lava pe o nusipepa tua sa taitaina e pei o se talitonuga le moli o ia mataupu i le tele o tausaga, ae o loo tumau pea ona fulitua i ai. Ua outou silasila la, i totonu o Samoa, o le Samoa Observer i le taimi nei ua latalata i le 40 tausaga le matua, ma i lea taimi atoa, sa matou manatu ua uma ona matou faatioina se matafaioi malosi e ala i le tuuina atu i luga o le moli i luga o faiga pi’opi’o, ma le faamoemoe ia mafai ona tafi ese ai ina ia le toe tulai mai. 

Ma e o’o mai lava i le asō, e uiga lava i mea uma, ae o lea lava e iinei faiga pi’opi’o, o loo tumau pea ona faatau pupula mai ia i o tatou foliga. E matua musu lava e alu ese. O nisi taimi- e te lagone e peiseai o loo faatau o tatou ulu i se aupa. E te lagona e peiseai loo e mau toatasi aemaise ai lava i totonu o se atunuu itiiti e pei o Samoa lea e iloa ai e tagata uma tagata uma lava.  

E ui lava la ina ua mae’a ona faailoa mai ia i tatou i le tele o taimi e faapea o loo i ai se lagolago malosi o le loto mo le taumafaiga o loo fai, ae i ai lava taimi e te fia vaai tino ai i ona foliga. I le faaiuga o le aso, o i tatou o tagata soifua ma tatou te manaomia ni folafolaga mautinoa ma ni toe faamaoniga e uiga i sea lagolago talu ai-o le leai o se leo o le mea moni e faatiga taliga. O le itu tatou te fefefe ai e faapea a tatou maua loa i tatou i le fetaulaiga o ala, pe a masalomi e o tatou mafaufau i tatou, tatou te faapea pe o lea leai o se leo  e mafai ona faaliliuina ina ia uiga e faapea atonu ua lolo tagata i le manatu o se lalolagi faimea pi’opi’o lenei ma e leai lava se isi ala. O lea faaupuga o le mea moni e auina atu ai le gatete lalo o le tuasivi. 

Ia, o le a la la tatou mea a fai nei? O fea a tatou o atu i ai mai iinei? Faamata o i ai se faamoemoe?

Tama’ita’i e ma alii, e tumau pea ona i ai le faamoemoe. I Samoa nei lea tatou te talitonu ai i se Atua Silisili Ese, lea e soifua ma na silafia mea uma lava, ua tatou iloa e faapea o lana amiotonu o se ituaiga lea o amiotonu e sili ona lelei. Atonu e le tupu mai pe a tatou mananao ina ia tupu mai, atonu e le o le ala foi lea sa tatou mafaufauina poo le taimi lea tatou te manaomia ai, ae e faamaoni o Ia ma o le a na lavea’ina i tatou e tusa ai ma lana lava ala. 

Ou te fia faamanatu atu ia te outou i le asō e faapea o taimi uma lava e tumau ai le Samoa Observer, ua noatia i matou ina ia faataunuu la matou matafaioi e ala i taumafaiga ina ia taofia faiga pi’opi’o mai le afaina ai o tatou tagata.  O se galuega faigata, e le fiafia i ai le toatele ma e faigata ae peitai- o la matou ta’utinoga lea ia matou tagata faitau nusipepa. O le pogai lea matou te le fiu ai e finau ina ia taofia o tatou taitai ina ia mautali atu mo a latou faaiuga-aemaise ai lava mataupuia o loo manino mai ai faiga pi’opi’o, taupulepulega leaga ma le faaaoga sese o le paoa. 

Ona o lena ua faailoa atu ia mataupu, ou te fia faaaogaina lenei avanoa e valaau atu ai i tagata uma lava –vaega e galulue faatasi i totonu o le malo, vaega o pisinisi, le itu agai, faalapotopotoga e maua mai ai fesoasoani tau tupe, ekalesia, nuu, faalapotopotoga lautele ma pisinisi ta’ito’atasi –ina ia tulai mai ma fai se sao masani  i le taumafaiga e taofi ai faiga pi’opi’o. E tofu i tatou uma ma lana e fai. 

I le talanoaina o matafaioi, e ao ona faailoa atu e faapea o le tulaga lelei o nusipepa  e faalagolago i avanoa  i tulaga lelei ma faamatalaga sa’o ia o loo faavae ai la matou galuega. A tatou talanoa loa i le faafeagai ai ma faiga pi’opi’o, o puna o faamatalaga o lo matou ola lena. A aunoa ma puna o faamatalaga ma i latou e tuuina mai faamatalaga, o le a tauivi tusitala ma le nusipepa. 

Afai e te vaaia se faiga sese ma se faiga pi’opi’o i soo se mea lava o e i ai, aua e te fefe. Tautala mai ma faatino lau pitolaau.Ua na o i matou lava o se imeli, o se telefoni poo se kofea i se isi nofoaga.

Tamaitai e ma alii, e ao ona ‘ou fai atu e faapea o le lagona tau polokiki i totonu o Samoa i aso nei o loo talanoa i se tau o le fefe. Ua fefefe o tatou tagata, ua le mautonu ma o le toatele o i latou ua latou iloa le mea moni ae o loo fefefe. 

I taimi faapenei, e o’o mai ai i le mafaufau upu a Matini Luteru King ma o le a tatou tau mavae i upu nei:  “O tatou ola e amata e faauma ai le aso na tatou le gagana ai e uiga i mea e taua.” Soifua ma ia faamanuia atu le Atua!

 

© Samoa Observer 2016

Developed by Samoa Observer in Apia