Fa’asese e se polofesa-o-taufa’avalea se Aiga Samoa

19 February 2016, 12:00AM

Ripotia e Sarafina Sanerivi

Fa’aliliu e Maiava

 

E le o nofonofo lelei se aiga na fa’alata e se tagata tau-fa’avalea ma i’u ai ina o’o i totonu o le fale, fai ai isi tala-pepelo ma fa’asese lea aiga ae mulimuli ane sola ma gaoi se tupe tele a le aiga.

O le tagata tonu lea o lo’o fa’atutu iai le le-fiafia o Theresa Masoe-Taimalelagi ma lona aiga.  Talu ai, ua gaoia le $1,400 tala ma ua matua fa’anoanoa ai sia aiga ma ua avea fo’i o se a’oa’oga taua e ao ona fa’aeteete iai, i tagata e le masani ai. 

 “Na sau le tagata lea i le matou fale ma fa’afeiloa’i e Leti lea o lo’o va’aia o’u matua,” o le fa’aaliga lea a Theresa. “Na fai ia Leti, o lo’o su’e sana galuega ma e mana’o e fia va’ai i lo’u tama.

“Na alu lea o Leti ‘ave i lo’u tama ma amata talanoa ai loa. Fai mai o lona igoa o Fuataiga, o ia o le atali’i o Fuataiga Tufuga mai Asau.” 

O le tua’a o Theresa e mai Asau ma e to’atele ona aiga o lo’o nonofo ai. 

Na umi se taimi o fai pea le talanoaga, aua ua sasao le talanoa a le ali’i-gaoi lea ma ta’uta’u igoa o tagata e aiga iai le tama o Theresa.

Having believed his story, Mrs.Taimalelagi’s father hired him and offered to pay 

“Na fai i lo’u tama, o lo’o tau sa’ili sana galuega.” 

Fai mai o ia sa kamuta muamua ma e iai uma ana meafaigaluega mo ana galuega.

“Na fai fo’i i lo’u tama o ia sa a’oga i le A’oga a Don Bosco i Savaii ma na mana’o lava e fa’aali i lo’u tama ana meafaigaluega.”

Na talitonu lea iai o le tama o Theresa ma ofa loa iai le totogi e $6.00 i le itula e faigaluega ai.

Ona ua leva le afiafi, ma ua alofa fo’i iai le toea’ina, na fa’ataga ai loa e moe i le latou fale i le po lea e tasi.

 “Na moe i le potu-malolo e fa’afesaga’i ma le potu o lo’u tama.”

O Leti na moe i le isi potu fa’atasi ma le tina o Theresa.

“Fai mai Leti, o se mea o le 2 – 3 i le vaveao, ae te’i i luga le ali’i lea ma fesili po’o fea e iai le faleta’ele,” o lana talatala lea.

“Na toe fesili fo’i ia Leti pe i totonu o le potu o lo’u tama le faleta’ele.

“Ae fai iai Leti e alu e fa’aaoga le faleta’ele i fafo ma toe ta’oto e moe.”

E feala ane le aiga i le taeao, ua leai se tagata lea, ua leiloa po’o fea ua o’o iai.

“E ta le ono i le taeao ua leai se si, ua leai fo’i ma se ‘ato-tupe a lo’u tama.” 

O le ‘ato-tupe sa i lalo o le aluga o le toea’ina ma o lo’o iai ana pepa-aoga ma le tupe.  

 “E $1400.00 le tupe sa i le ‘ato a lo’u tama ua gaoi e le ali’i lea. Ua na fa’avalea matou ae sola.”

Na ta’ua e Theresa, na fa’atoa iloa mulimuli ane, e pepelo uma tala sa faia e le ali’i-gaoi lea.

Amata mai i le aso lea, ona sa’ili’ili ma fa’alogologo solo sia aiga, i ni tala e uiga i lenei tagata taufa’avale le-alofa. Ua mae’a ona logo o le Ofisa o Leoleo, ua o’o fo’i i le falepuipui e siaki iai pe o se pagota ma ua tu’uina atu fo’i fe’au ma lapata’iga i luga o vaega fa’asalalau, e talosagaina ai se fesoasoani mai le mamalu o le atunu’u. 

Ua maua fo’i e le aiga o Theresa, o Fuataiga Tufuga - lea na ta’ua e le gaoi lea fa’apea o lona tama – e leai sona atali’i.

  “’Ou te iloa o se tagata e matua malamalama lelei i le aiga o lo’u tama i Savaii ma fa’aaoga e le ali’i lea e fai ma ‘auala e maua ai mea e mana’o ai. ‘Ou te mate lava o se tagata mai Savaii ona e foliga na te iloa lelei le matou aiga i Savai’i.”

O lo’o fa’agasolo pea sa’iliga a Leoleo.

 “E matua faigata tele ona matou te le-iloa lona igoa mo’i ma e leai fo’i se ata o le ponaua (se’i tulou).” 

O le taimi nei, na ta’ua e Theresa, e le o ita lona tama ona ua sola ma gaoi le tupe.

‘Ae fia fautuaina le mamalu o le atunu’u, ona e iai tagata fa’apea, e matua pepelo lava ma fai tala-sese e uiga i aiga ma so’otaga fa’apea, o se ‘auala e maua ai ma fa’atino mea o lo’o manana’o iai.

“O se lesona aoga tele mo tatou uma,” o le fautuaga lea a Theresa.

“O le mea lea na tupu i le matou aiga ae maise lo’u tama e ono tupu fo’i i so’o se isi lava o tatou. 

“A o le mea sili lea ua iloa nei, e iai lava tagata le-alolofa nei e tau-fa’avalea ma faitala-fa’atupu e  fa’alata ai ‘Oe ma lou aiga ma matua olopala ai lou alofa ma le talitonuga ua tu’u atu iai.

 “E ao lava ona mataala i taimi uma aua e o-lua lava le lelei ma le le-lelei ma e tatau ona nofouta iai.

“O nisi tagata e matua fuli lava e fai so’o se mea ina ia maua ai mea o manana’o iai ae ia a’oa’ia o tatou mafaufau i le mea ua tupu i le matou aiga, e puipuia ai fo’i ‘outou mai ia faiga le-alofa fa’apea,: 

O lo’o tatalo mai Theresa Masoe-Taimalelagi, mo so’o se tasi lava e silafia le ali’i lea na faia le mea-leaga i lona aiga, ina ia fa’afeso’ota’i atu lana Tusifoliga po’o le telefoni numera 7204581.

 

19 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>