“Tapuai i le Atua i le agaga ma le faamaoni” - (Ioane.4:24)

By Rev. Petaia Setu 19 February 2017, 12:00AM

Ua lata i le 200 tausaga talu ona liliu tapuaiga a aiga ma nuu o Samoa i le Atua Soifua. Ua faavae ai foi le faamoemoe ola o le tofa saili, ma le moe manatunatu o nai o tatou tua’ā ua lagomau mai tiasā. O lo latou talitonuga ma lo latou faatuatuaga, e mai le Atua lea e toatasi, le lelei ma le manuia saoloto o Samoa i ona augā tupulaga uma. O le naunauta’iga, ia tumau ai le talitonuga tapuai o ona tagata, i le agaga ma le faamaoni. O le isi lea vaega tāūa o le fesilafa’iga a Iesu ma le fafine Samaria. Ia faailoa i le fafine le moni. O le malamalama o le mea sili lea ona tāūa i soo se tagata. O ’e malamalama i le mea o loo e agai iai? O ’e malamalama i mea o loo e faalogo iai? Sa ou tā’ua muamua i se isi a’u lauga, e ese lava le lotu, ese le faaolaina. Ia malamalama lelei lenā mea. E lē o le mapo lotu, a o le agaga lotu. O le ‘mapo’ lotu, o le faa-faresaio lenā. E faatulaga mea uma o le lotu i manaoga o le faresaio. E faatulafono faiga uma o le lotu mo le mamalu ma le viia o pulega faa faresaio. E mātuā misi atoa se faaleagaga! O gafea la o lo tatou faatuatuaga tapuai e tali atu ai i le miti i nai tua’a ua mavae,mo ni manuia o ō tatou aiga ma a tatou fanau, pe afai ua le o le agaga e tapuai atu ai i le Atua? Vaai pe lē o oe le isi lenā ua leva ona taomia lou ola tapuai i pulega faa faresaio?

E tautū lava le fafine i masani a o latou tamā, ma tapuaiga faa Isaraelu i Samaria, o le mauga o Keresema. A lē o le mauga, e le aogā. Fai mai Iesu, Funa e, tou te tapuai ma le lē iloa. O manatu ia e taofiofi mamau iai le toatele. O matou tua’a; o matou tama. Fai mai Iesu, Funa e, tou te tapuai ma le lē iloa. O manatu ia e taofiofi mamau iai le toatele. O matou tua’a; o matou tamā; o matou mātua; o la e ō Pai ma Lafai i le galuega. Tatou te le ta’ufaaleaogaina le lotu. E pei lava foi o le loto o le fafine Samaria lea. Ae vaai lelei ma tatalo. Ia pupula ou mata Samoa. O nai o tatou tuaa ma matua sa mata’u I le Atua. Sa faamaoni ma alolofa I le Atua. Sa malamalama lelei ma iloa le Atua, ma ala paia e tapuai ai ma maua ai mafutaga mafanafana ma le Atua. O faapefea la nei aso? Vaai iai! Ua sala ona fausaga. Ua ’apo e le alii o le lalolagi ana pulega. Ua fiu e tau faamasani i le Atua, ae pei le Atua ua mamao ese lava se mea o iai. E fa’i foi o le le malamalama o tagata, a ua ‘alo le faamalamalamaga o le Upu Moni. Ua lē o le finagalo alofa ma le finagalo faaola o Le ana le talalelei, a ua faauiga mo le faamalieina o mana’o ma pulega a le au tala’i o le talalelei.

O le faigofie ia o le auala a Iesu na maua ai le fafine. Faamalamalama ia malamalama. Ta’u iai le moni. O le moni, o le agaga lava le Atua. E leai sona amataga, e leai foi sona gataaga. A ’e tapuai la I le Agaga, ia mama lou agaga; ia fiafia lou agaga ia saoloto lou agaga, ia le pisia lou agaga I le mau faama’i lele o loo faalavelaveina ai tapuaiga I le Atua I Aso Sa. O iinā, o loo taoto ai le ‘faamaoni’ o lau tapuaiga I lou Atua. Fai mai Iesu, ‘e tatau ona e tapuai i le Atua i le agaga ma le faamaoni. 

Ia manatua foi , e le eseese le agaga ma le faamoemoe o tapuaiga a Samoa anamua, ma tapuaiga o aso nei o le talalelei. O le “Tapuaiga” i aga faa Samoa, o tapu poo sa a aiga Samoa anamua i o latou atua. E faaeteete i tapu o le atua o loo tapuai iai. E taofiofi i sa aua e tuā. A soli tapu o le atua, e tua i mala ma ma’i, e le ’asa ma puapuaga ma le toilalo. A fai foi tapui o talitonuga faa-tapuaiga a le atunuu, e tapui i le igoa o atua a lea aiga ma lea nuu. O iina foi e osofia ai e le palaai poo le fefe le soifua tapuai faa Samoa. Auā foi e iai le tapui tuia, le tapui mamala, tapui oti, ma isi mau tapui. Ua le gata la ina tālia mănu mai atua ia, ae faatupu mala foi pe a soli ona tapu. Samoa, ua tatou manatu o le ‘fefe’, e a’oa’o ma faatonu ai a tatou fanau ia ‘alo ese ai i le amio leaga. Lea ua maitauina pea i pulega a nisi alaalafaga, e tuli faamalosi ai le tagata i le falesa i Aso Sa, e ui a, e moe ai le isi. Ua lotu ona o le fefe! E alu i le falesa ne i mea ane ua sala! Samoa e, o le tapuaiga lea o loo a’oa’oina ai e Iesu le tina lea ma tatou uma, e le o le ‘fefe’, a o le agaga ma le faamaoni e talitonu ai ma faatuatua i le Alofa Tunoa o le Atua.

O le “agaga ma le faamaoni” o sa tausi ia o tapuaiga kerisiano. O tapu ia, ‘o loo saili iai le tama i e o loo tapuai faapena ia te ia (f.23) O tapu (Eso.20:1-17),e pei ona toe faamanino atili mai e Iesu Keriso (Mat.22:37-39), o le auaunaga lea e faatinoina sa ma tapu o le tapuaiga i le Atua. I le, ua le atoatoa faatino la tatou pito laau lea i lo tatou Atua, ona ua faoa tapu ma sa o tapuaiga, sa mamalu ai aiga i taimi o toeaiina; sa pa’ia ai le ekalesia o le tino lava lea o Keriso, a o fai Iesu Keriso ma Ulu. 

Ua leai se saolotoga tapuai o le fanau a le Atua. E foliga mai ua fai le lotu ma taufaamata’u i le au fia tapuai. O le Agaga ma le Faamaoni, o le faamamafa lea a lo tatou Alii o Iesu Keriso. Pau a lena. O le faigofie ia. Silasila i nei ona po, ua fesulufai solo le lafu mamoe. Ua tele le mau faamamafa. E le gata ina sola ai le agaga tapuai i taimi o tapuaiga, a ua fai ma faafitauli mamafa i le galuega. O mea na le faatagaina e le Atua, ae nainai e le auaunaga faafoliga i le Atua. (II Tupu.5:20-24).

O lo tatou olaga ma le talitonuga e ala i a tatou tapuaiga i le Atua, e tatou te faanono iai i manū. O manū ia e fai ma tini o miti a tua’a. E olioli ai fanau ma aiga; e pati lima ai tapuaiga. Ae a soli tapu ia, ona le gata lea ina sisio ma pepelo solo, ae ua le sao mai le tapui mageso, tapui papala, tapui oti tuu faasolo (II Tupu.5:25-27).

Le ekalesia e, ua papanu a tatou tapuaiga i pulega faa faresaio. Ua leai se Agaga o le Atua. Ua tele le mau ’Aua. Ua le masino le mau Sa. E amata mai lava i le tumua’i e oo i matiutiuvae o tagata lotu ua pipii ai le ’Aua ma le Sa. E oo lava i meatotino a le tagata lotu, ua aiāina e le pulega faa faresaio.

Lo’u atunuu e, e pele le tapuaiga faa Kerisiano i soo se tagata Samoa. A o la’u lenei e fai atu, ia e tapuai ma le mautinoa. Ia e iloa le faamaoni o loo e vivii ai i le Atua i lou ola tapuai. ’Aua le faia toa’i. Ia e malamalama i ala ma faiga ua finagalo le Atua e saili mai ai ia te oe. O le Agaga ma le faamaoni, e sa’o ai le gutu, sa’o ai le loto. E maua iai le saolotoga ma le olioli. E ute iai le tapuaiga i le Atua. 

’Aua le vaoia lou gutu e vivii atu ai i le Alii – Aleluia! Tatala lou loto ina ia e iloa le faamaoni o le Atua – Amene! Auā afai e te tautino i lou gutu i le Alii o Iesu Keriso, ma talitonu i lou loto ua toe faatuina o ia e le Atua nai e ua oti, e faaolaina ai oe. Ioe, o le loto talitonu ai, e oo mai ai le amiotonu; a o le gutu e ta’itino ai, e oo mai ai le ola Rom.10:9-10). O le malosi, i le ma le mana lava lea o le talitonuga faa Kerisiano i le soifua tapuai o tagata uma i le Atua o Tapuaiga.

Samoa e, soia le faamamafa o le mauga ma le fale; a o lou loto ia sa’o ma lou loto ia mama. ’Aua e te maitauina le tino ma mea ua pipii i le tino; o mea na a le eleele. O mea a le Atua, o le agaga ma le faamaoni. E saili mai lava Ia, i e tapuai faapena ia te ia.

O le Atua, o le agaga lava ia; o e tapuai ia te ia, e tatau ona tapuai atu ai i le agaga ma le faamaoni.

 

                                Amene

 

7737063/7783782

By Rev. Petaia Setu 19 February 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>