Malosi’aga o tinā ma tama’ita’i

By Ilia L. Likou 19 March 2017, 12:00AM

O le silafia lelei o lou tulaga i totonu o se saofaiga o se itu taua tele lea.

O lea le finagalo fa’aalia o le tinā i a Lupe Fuimaono, 38 le matua o le soifua o le afio’aga o Lauli’i i le fa’atalatalanoaga ma le Fofoga o Samoa i le aso ananafi.

“O tiute o tama’ita’i i saofa’iga i totonu o so’o se afio’aga o se itu taua tele lea i le fa’asamoa lava ia  i lo’u iloa i ai,” Lupe i le Fofoga o Samoa.

“E maioio lava tiute tauave o tama’ita’i ia i totonu o afio’aga, aua e pei o latou o pae ma auli i totonu o so’o se faiganu’u lava i la aso, o le uiga o lea tala, e ola ane lava le tama’ita’i Samoa ia i totonu o lona aiga, ua ia iloa lelei le tulaga e tu ai ma le itu e aga’i i ai.

“E pei a ta’u loa tama’ita’i i totonu o afio’aga ta’itasi e pei e tele lava le mau itu e alu i ai le mafaufau, e pei o le tapenaina o so’o se itu aua ni taligamalo e latou te afea le nu’u.

“O le uiga o la’u tala e tele a latou galuega e fa’atinoina, ma e ao lava ona fesoasoani lelei ai fo’i le tulaga ia e pei ona ua i ai le lagolagosua o aiga.

Na ia fa’ailoa e i ai lava fa’afitauli ae o le loto lava ma le manatunatu i manuia o aiga o lo’o una’ia malosi ai lava i latou i so’o se taimi.

“Ia e mo le silafia ai o i matou, ia o lea lava le tulaga o lo’o fa’atinoina i aso uma, ia e tapena uma lava vaega , e le gata i totonu o nu’u, o ekalesia aemaise lava aiga.

“E alualu fo’i nisi taimi lagona le lelava , ae taumafai lava e fa’atino, ia e maua ai fo’i le tino malosi, e ui lava e tau le lava le malologa ae lagona lava le fiafia i taimi uma e fa’atino ai nei vaega uma.

“E o’o fo’i la i totonu o nu’u ma afio’aga ta’itasi ia o lea lava le fa’amoemoe o lo’o ua taumafai i ai, ia mafai lea ona fa’atino vaega uma e fuafua i le malosi o le tino ma le mafaufau e pei ona ua i ai nei.

“E tele nisi o vaega o lo’o ua taumafai ai lava ina ia mafai ona fa’atinoina, ia e aoga tele nei gaioiga, aua e aoga i aiga.

O lona talitonuga ia aua le fiu gofie.

“Ia e pei o lea lava le tulaga o lo’o ua i ai le taimi lenei,” o lana tala mai lea.

“O a fa’afitauli, ia o le to’aga lava e tatalo, ae o le taimi lenei i totonu o si o matou nu’u o lo’o sologa lelei mea uma i le alofa ma le agalelei o le Atua.

“O a lava fa’afitauli, ia e fa’apea ona soalaupule lava i totonu o aiga, ma o lea le tulaga o lo’o taumafai ai lava i le taimi lenei.

“O le galulue fa’atasi lava e mama ai se avega, ma o le a le taumate le tele o ni suiga lelei mo le lelei alu i luma o si o matou afio’aga nei aemaise o le komiti i totonu o si o matou nu’u.

By Ilia L. Likou 19 March 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>