Tatala Galuega 3miliona i Faleolo

Tusia Ilia L Likou ,

69 Hits

O le Aso Faraile na tatalaina ai se tasi  o ofisa tutotonu mo  vaega tau i le saogalemu i le malaeva’alele fa’avaomalo i Faleolo.

E 3miliona le tau aofa’i o lea galuega tele ma e  12 masina na  fa’agaioia ai e le kamuapani Konekarate a le Shanghai.

O le afioga i le Ali’i Palemia ma le Amapasa a Saina i Samoa nei na auai i lea fa’amoemoe taua.

I se toe tepa ai i tua i le suaina o le ele’ele i Faleolo i le 2015 mo lea galuega tele na saunoa ai le Ali’i Palemia i le taua ai o lea fa’amoemoe tele mo le atunu’u.

“O le a taatia ia upu o le taeao ma le aso, i o outou paia le popo ma outou pa le solo,” Tuilaepa Sa’ilele Malielegaoi.

“Oute talitonu foi e le toe tau faafuluina ou mamalu aua o oe Samoa o le atunuu tofi, o le laau ponapona, o le vao filifili gata. 

“O lea ua tu le faila i ama ma ua sili fo’i le ofe a le tautai, ua lalafo taula i matau aua ua taunuu le faamoemoe sa fau ao fau po. 

“Le Atua alofa ma le Atua o punavai o mea lelei uma, ua taunuu le miti ma o le laau o le soifua lea.

“O lea ua o tatou fesilafa’i nei i Faleolo o le malu o Ma’auga i le si’u o le Alofi o Aana.

“Susu lau susuga i le Taitai o le Sauniga, afio le Tama’itai Amupasa ole Malo o Saina, afifio Minisita o le Kapeneta, afio le Fofoga o le Fono faapea Sui mamalu uma o le Palmene, alalatai Minisita Lagolago, Sui o Malo mai fafo faapea Faauluuluga o Ofisa o le Malo, Pisinisi ma Pa’aga.

“O le sauniga i lenei taeao mo le suaina o le eleele aua le amatalia o le fausiaina o Fale fou faaee/faatali pasese i Faleolo nei, o le a taunuu ai se tasi o fuafuaga-fai tāua a le Malo o loo faataoto i totonu o le Fuafuaga o Atina’e a Samoa 2012 – 2016, o le faaleleia ma le faatumauina o fale faaee/faatali pasese mo uafu ma taulaga, faapea ma malae vaalele e aofia ai ma isi auaunaga fesoasoani.

 

 

“Mo le faataunuuina o lea fuafuaga fai, sa sainia ai i le aso 22 o Novema 2014, i le va o le Malo o Samoa ma Saina, se Feagaiga mo le faatupeina o le Galuega Toe Faaleleia o Fale faaee/faatali pasese o le Malae Vaalele i Faleolo.  

“O lea galuega tele o le a faatautaia e le Kamupani o le Shanghai Construction, o se Kamupani ua tele sona sao i le fausiaina o ni fale tetele i totonu o le tatou Atunuu.

“O le toe faaleleia o Fale o le Malae Vaalele faava-o-malo i Faleolo e aofia ai le toe faateleina ma le faafouina o Fale o loo iai i le taimi nei, o le fausiaina o ni auala savali faapitoa mo vaalele e taunuu mai faapea ai ma se nofoaga faapitoa mo le malosiaga o le eletise mo ia Fale.  

“O Fale o le a faateleina mai i le 5,580 sq meters i le 11,800 sq meters, ma e mafai ona faaoga e tagata femalagaa’i e 600,000 i le tausaga poo le 300 tagata malaga i le itula.

“O le ata ole Fale (architectural design) ua faaaogaina ai foliga o le Fale Samoa, faaopopo iai ma fausaga faaona-po-nei ma o le a atili matagofie ai i le silasila a tagata faimalaga atu ma le malaga mai i le atunuu.  

“O le fausaga fo’i ua aofia ai ma manaoga o le siosiomaga  mo le faaogaina lelei o le malosiaga ma le faaogaina i totonu o le fale o le mālū o le savili ma le susulu malamalama o le la. 

 

“I lona aoao tetele, o le vaega o le Fale e taunuu mai iai pasese, o le vaega e malaga ese ai faapea ai ma vaega e fa’aaoga e le mamalu o le atunuu, o le a fa’aopopoina ma faateleina.  

“E aofia ai fo’i ma vaega o le fale e faaogaina e Ofisa o le Malo, kamupani, pisinisi ma ofisa eseese i mea tau femalagaiga, o le a lelei ma lava avanoa i totonu o latou ofisa e galulue ma fai ai a latou galuega.  

“Mo le Pulega o Malae Vaalele, o le a faaopopoina le tele o avanoa mo ana pa’aga faapisinisi e faaogaina le fale, o avanoa mo auaunaga e tautuaina i latou e tafafao mai fafo, ma ia avea nei suiga matagofie e manaia i le silasila a i latou e autova’a mai e pei ona momo’o iai i malae vaalele faava-o-malo i atunuu tetele i fafo.

“O le fausiaina ma le iai o auala-savali faapitoa mo vaalele, o le faaopopoina fo’i lea o le lagona manaia ma le fiafia mo le au matutua faatasi ai ma i latou e iai manaoga faapitoa.  

“O le a avea foi nei auala savali o le a faafaigofieina ai le fetafeaa’i o pasese ma tagata faimalaga i totonu o nei Fale ma le sologa lelei o galuega uma o le a faatino ai.

“O isi vaega o le a fausiaina ma fa’aogaina, o le iai lea o Faailoilo faaona-po-nei e faalauiloa mai ai i Pasese taimi malaga o vaalele (flight information display system), o faasalalauga mo pasese (automatic passenger address system), o le faamauina ma le vavaeina o faamatalaga o mea tau femalagaina (information integration system), ua avea ia masini ma totoga mo le atoatoa ai o auaunaga i Faleolo ma agavaa ai o se Malae Vaalele pito silisili ona manaia ma le fou.

“Ia agalelei mai Le Atua i le amatalia o lenei galuega tele o le a alo atu iai, aua le tautuaina ole atunuu ma e uma e toai taunuu i o tatoulaufanua.

E pei ona silafia ai , o le ogatotonu o le 2015 na amata ai ona galulue le konekarate faufale mai Saina e fausia le galuega tele o maota mo le malae vaalele faavaomalo i Faleolo. 

O lea galuega ua faatupe ele Malo o Saina faatasi ai ma le lagolago ale Malo o Samoa ma o lo’o ua i ai le fuafuaga e tatala aloa’ia lea galuega tele i se taimi lata mai.

O le Malo o Iapani na fausiaina fale ole malaevaalele ise fesoasoani a lea paaga tāua a Samoa, peitai o fuafuaga alualu mamao ale Malo ile lima tausaga ua mavae na saili fesoasoani ai I le Malo o Saina mo se nonogatupe e māmā le tului mo le fausia loa o nisi fale e tetele atu ma fausia ai auala e taunuu iai vaalele ma agai ane ai pasese ile vaega e siaki ai pepa malaga ma uta faapea foi i pasese e tuua Samoa.

Ose maota e ese foi lona fausaga ua fausia ai e tusa ole ata ma ua suia ai vaaiga ole malaevaalele faavaomalo i Faleolo. E lē ‘asa se galuega ma lagona faaalia o tagata auā e lē o tagata uma e lagolago ma tetee ini fuafuaga ale Malo.

Peitai e lilifa lagona faaalia o tagata na fesiligia ile faafetai ile Malo ona ole fausia o nisi maota sili atu ona lelei mo pasese e tuua le atunuu ma pasese e afea Samoa. Ole suiga fou e lē gata o fale ae o totonu ile vaega e faatino ai tapenaga uma mo faigamalaga a vaalele.

E tele ni atina’e o lo’o ua silasila ai pea le malo mo le fa’aleleia ai o vaega nei e pei ona o I ai le malae va’alele.

 O lo’o ua  silasila pea le malo o Samoa i le fa’amautuina lea  o se miti ua leva na fa’ananau i ai i faigamalaga tau va’alele mai le atunu’u o Saina i Samoa nei i se taimi vave lava.

O lea le saunoga a le Ali’i Palemia, Tuilaepa Sa’ilele  Malielegaoi i le fa’atalatalanoaga ma le Samoa Observer i ripoti talu ai.

O se manaoga po’o se atinae o loo taulai iai le silasila a le malo e ala lea i le faia mai lea o ia faigamala tuusao mai Saina mo Samoa, aua lava le siitia o le tamaoaiga o Samoa e ala lea i le itu tau le turisi.

 “ O lea atinae ua leva ona fuafua mamao e Samoa,” Tuilaepa.

“O le tino mai ai o lea fuafuaga o se vaaiga maoaé lea ona o le a faapena ona fesoasoani tele I le atinaeina o le turisi I totonu o le atunuu”.

“O le taimi nei e leo iai se mea ua faamautu pe ua aloaia foi”.

“O le faanaunautaiga maualuga lava ia iai se kamupani vaalele mai Saina e mafai ona faatinoina lea miti ua leva ona silasila iai le malo”.

Sa taua foi e Tuilaepa o loo tagatagai le malo i se tasi o kamupani nau Saina lea sa o latou faatauina le faletalimalo o le Sheraton Samoa Aggie Greys i Vaisigano.

O lea avanoa o le a matua faamanuiaina ai Samoa ae e ao foi ona tatou manatua o nei tagata e iai lo latou fiafia tele e tuuina mai se latou lagolagosua i se atinae e silafia lelei e talafeagai ma toe faamanuiaina ai le tulaga tau le tupe maua.

“O se faataitaiga afai ae faimalaga muamua mai le vaalele ma le pasese e 400 ona toe faimalaga lea i Saina e aumai le isi faigamalaga e 400 le aofaiga ona toe taliu lea ma le pasese muamua”.

“O le taunuu ai o lea manulauti o le a mautinoa ai le siitia o le atinae tau le turisi i totonu o le atunuu”.

“O le a mautinoa ai foi le foia ai o le faafitauli lea o loo tele na agiga pea mai le au fai pisinisi o faletalimalo o le lēlava o turisi tafafao mai totonu o le atunuu”.

Sa fesiligia foi le Palemia poo afea o loo fuafua ai e taunuu mo lea faamoemoe ae sa faailoa mai e le afioga i le palemia soó se taimi lava.

Sa ia taua foi e tatau foi ona iai ni au faipisinisi e lava tapena e tali i ni faafitauli o le tutupu mai ona e leai lava se mea e asa ma se faafitauli o le tatalo lava ia mafai ona foia nei faafitauli.

“O le isi vaega o loo fesoasoani tele ona o tatou tagata e lau fofoga fiafia ma loto alolofa aemaise e talimalo mai malo mai fafo pe afea si o tatou atunuu i soo se taimi”.

O le masina o Oketopa 2016 sa sainia ai e Saina ma Samoa se maliega tau le femalagaiga (Air Service Agreement) lea o le a tatala ai le itu tau le femalagaiga mai Saina agai sao mai lava I Samoa nei. O lea malaga e mai Beijing ona taunuu lea I le malae vaalele faavaomalo I faleolo.

O lea maliega sa sainia lea ele afioga ia Papaliitele Niko Lee Hang ma le amapasa o le malo o Saina I Samoa nei ia Wang Xuefeng I le fale o le Tuiatua Tupua Tamasese Efi (T.A.T.T.E Building)

Sa taua ai foi ele afioga I le minisita o Galuaega ia Papalii o loo iai nisi o kamupani vaalele o loo ua faailoa atu lo latou fiafia tele I le faatinoina o lea foi auaunaga.

© Samoa Observer 2016

Developed by Samoa Observer in Apia