Fia fa’ataunu’uina miti a le tina mo lona aiga

Tusia Fetalai Tuilulu’u ma Aruna Lolani ,

45 Hits

Le fale o Merita i Falefa.

Le fale o Merita i Falefa.

E le taunu’u ni miti pe’a fai e te le galue.

O Merita Fa’ivalu, o ia lea o se tina e tele ana miti mo lona aiga ma o le mafua’aga lea ua sa’ili galuega ai o ia.

O Merita, e 28 le matua o lona soifua mai le nu’u o Falefa ma sa ia ta’ua i le Fofoga o Samoa i le aso ananafi, i le faigata o le olaga pea leai se galuega.

“O lo’u to’alua e faifaiva. E iai a taimi e lelei ai le tupe maua mai ai, e iai fo’i taimi e leaga ai. O isi a taimi, e leai se matou tupe maua.

“O le matou aiga o se aiga atia’e ma ou te mana’o a a’u ia ou te galue ina ia maua faigofie ai mea e fai ma fa’ataunu’uina ai le tele o a’u miti e faia mo latou.

“Ae peita’i, ua o’o a i le su’ega o le galuega ua le toe faigofie.

O Merita o se tina e to’afa lana fanau ma o le tasi o ona alo o lo’o a’oga nei.

Sa ta’ua fo’i e Merita e leai se latou ia vai, e leai fo’i se latou eletise ma o le taimi nei, o lo’o fa’aola mai le latou eletise mai nisi o ona aiga e latalata ane, ma e totogi fo’i.

“O le vai a le nu’u e aumai ai a matou vai, e mamao atu ma le matou fale.

“Ia o se va’aiga fo’i i le matou fale nei, lea e tau atia’e atu i se tulaga lelei.

“O lo’u mana’oga o le maua a o tupe mai sa’u ia galuega e fa’atino ai mea uma ia aua ou te le mana’o e fa’alagolago atu i isi tagata.

“O le mafua’aga lena o lo’o ou sa’ili galuega ai, e lelei fo’i lenei taimi aua o loua iai le tama o le aiga e va’aia tamaiti.

“O lea a la e sa’illi ma e le’i maua a se laki.

“E mana’omia a le galuega i lenei vaitaimi aua ua tele mea e tatau ona fa’atupe e pei o mana’oga o le fanau, o le fa’aolaina o le vai fa’apea fo’i le eletise, ia aemaise fo’i le tau atina’e ina o le matou fale ina ia maua se va’aiga matagofie aua o le taimi lenei e le fa’asimaina, e fola i ma’a.

“O vaitaimi nei, o le tupe e tautala. Ae e le galue, e te tumau a i le nofoaga o lo’o e iai.

“O a’u o se tina e tele miti e fia fa’ataunu’uina mo lona aiga ma e leai se mea iai pea ou afu i lo’u galue ina ia taunu’u ia miti.

Sa fa’apea mai Merita o ia e lelei i so’o se galuega, pe iai fo’i ni ona itu e vaivai ai, o ia o se tagata e le fa’avaivai.

“Ua tele a o mea e fa’atupe ina ma o le mafua’aga na e tatau na e galue ai.

Samoa, a e fia fesoasoani ia Merita, o le numera e maua ai o ia o le 7729598 po’o le 7748732.

© Samoa Observer 2016

Developed by Samoa Observer in Apia