O le loto alofa e tausia ai aiga ma matua

Tusia Aruna Lolani ma Fetalai Tuilulu’u ,

29 Hits

Lotoalofa e tausia ai matua: Eseta Noaliu o lana masani i aso uma o le tausiga o ona matua.

Lotoalofa e tausia ai matua: Eseta Noaliu o lana masani i aso uma o le tausiga o ona matua.

E eseese lava tagata ma o latou iloa i auala o faamanuiaga i lenei olaga ma lona soifuaga.

O nisi o mau ua faapea mai e faia galuega mo nisi o tagata ao nisi ua auauana mo nisi ina ia toe maua mai ai ni faamanuiaga aua le manuia mi le lumanai.

Mo le tina ia Eseta Noaliu mai Saoluafata, o lona talitonuga i auala e maua mai ai lona faamanuiaga e afua ma maua mai i matua- aemaise ai lona tina matua o lo’o tausi nei.

Na maua atu e le Fofoga o Samoa le tina ia Eseta, 30-tausaga le matua o lo’o toli-popo aua le faalifu mo le taumafataga a lona tina matua.

“A leai se loto e te faia ai se galuega alofa mo lou aiga e le mafia ona e agai i se iuga lelei i lou olaga atoa” o lana mau lea.

“O la’u galuega ma la’u masani lea i aso uma o le tausia lea o lo’u tina matua”

“Ou te fiafia i la’u galuega lea o lo’o faiaina ia o’u mautino a o lo’o ia maloloina ma maua le malosi. O la’u galuega o le kukaina o lana meaai ma vaaia lona soifua i aso uma.

O lana mau, tusa lava po o le a lona matua ua iai nei e na te tausia lava ona matua tusa lava po o le a.

“E ao’oga ma faigaluega nisi. Ae o la’u faamuamua e mo lo’u tina ina ia maua le malosi aemaise o le tausiga i aso uma e ala i meaai. E pei o lea foi e maua mai a’u o lea saili atu ni popo mo se faalifu o le aoauli.

E le’o na’o le pau ai lea o le galuega a le tina ia Eseta o lo’o faia, o lo’o ia fesoasoani foi i le tausiga ma le vaaia o fanau a ona uso ma tuagane.

“O le matou aiga e le’o na’o lo’u tina o lo’o matou nonofo. O leisi measili lea o lo’o malolo le fanau mai aoga o lo’o faamuli ma le tina ae o lo’o o’u saili meaai aua le tausiga o le tina manisi o le fanau.

O le tina ia Eseta e lei fai aiga, ae o lana galuega lava lea o lo’o faia pea o le tausiga o ona matua.

“I lenei vaitau o le olaga o le alofa le mea e sili ona taua e tatau ona maua i so’o se tagata” o lana tala mai lea.

“O le tala moni lava ia po o le a le faigata o le olaga ma lona aluga o lo’o iai nei e faa-faigofie mea uma pe a maua e le tagata le loto alofa e alofa ai i lona aiga.

© Samoa Observer 2016

Developed by Samoa Observer in Apia