Fa’atauaina o fa’ato’aga koko Samoa

By Aruna Lolani 19 July 2017, 12:00AM

O le faatalatalanoaga a le Fofoga o Samoa ma Sa’ena Mulitalo Penaia mai Tuana’i sa ia faaali ai lona manatu ile polokalame mo Alamanuia mo le si’itia o le Tamaoaiga e afua mai le koko, lea sa faia i le Hotel Elisa ile aso ananafi.

“O le mea e pito i sili a ona taua e tusa ma le faamoemoe ma le fonotaga o le taeao nei; o lea ua i faitotoa fesoasoani lea a Niu Sila ile vaai atu ai,” o lana tala lea. 

“Pau foi la o le mea lea ua aumai e i latou tulaga o aiaiga. Ia e pau a la o le mea lea matou te vaai ai; poo lea le vave e faatino ai aua o nei fesoasoani uma, e faafetai foi le malo ua aumaia nei fesoasoani mo le manuia lautele, e le gata i tagata tai toatasi, ia a o faapotopotoga foi o le au faifaatoaga.

“O le vaegatupe lea ma Niu Sila, e pei a e faapitoa a ile atia’eina o le koko, pei e pau na o le faamoemoe lea e iai ae toatele foi nai faifaatoaga lea e omai i isi itu o le tatou atunuu e ola le koko ae le fua lelei le koko pei a la o le maitau lea e iai le faagaioiga ia fai se komiti foi lea e taua o le komiti o le faalapotopotoga o le koko a le atunuu atoa. 

“Ia o lea foi la ua maitau atu ai, o lea na ou fesili ai; e le’o omai e talepe faalapotopotoga tumaoti lea e iai nei ae lea e omai e fa’ifa’i mai sui taito’atasi o faalapotopotoga nei e fausia ai le mea le e tau o le National Committee.

“O a lava la manaoga o le faalapotopotoga latou, e aumai e latou ia na faatupe atu lea.

“Pau a lea mea matou te lagolagoina aua o lea ua omai ma le vaegatupe e fesoasoani mai, e le gata ona fai ai faamiliga, e tufa fua ai koko ile au faifaatoaga ae pau foi le faamoemoe, ia faamaoni le au faifaatoaga o koko ma ia faamaoni foi e tausi koko aua e leai foi se aoga na o le omai e lau ae a na uma ona toto ona tiai. Uma foi a le poloketi, uma foi ma le fiafia iai. 

“Ae a loto mau a e faaaoga, pei o le naunauga atoa a lea e iai, ina ia toe foi le koko Samoa pei ona iai ile 1960 mea lea sa iai. 

“Lae aooga tamaiti ae la ua fai aitalafu o pili o tamaiti, a na fua a o le tau koko, totogi loa pei la o le faalagolagona na lea e iai le polokalame nei. 

“O le itu lelei a, o lea mafai ai ona toe o’o uma a aiga ile mea foi lea o le galulue ma le mautinoa lae e iai le tupe e faamoemoe e fai ai faalavelave aua a tatou toe foi a i mea ia sa tatou iai i aso la, o lae e faapala koko ae la ua fai le aitalafu.

“O lona uiga la o loua galue ma le mautinoa; e iai tupe i koko ia. Pei foi la o le taimi nei, ia a o lea measili a ona ou faafetai ai, o lea faatoa o isi e amata ae ua leva ona ou selesele ile tupe o koko.

“Ia o lona uiga la a fai foi o lea faateteleina, ia o lea tau fai tutusa uma tagata o le atunuu pea fai faamaoni ma tausi faamama.

“O le masani a faapea e lelei le faatoaga mai le eka e tasi koko mago ile tausaga ae e fua la iai, o le tau loua faatau ai le koko mago e $20 le kilo. 

“O le fautuaga i le au faifaatoaga, ia toaaga e o e fai le koko ao le tagata paie a ia e masani a ia ile paie. 

“A o le tagata ua inu ma selesele ile suamalie mo le faifaatoaga, e fiafia a aua o la ua alu ma le mautinoa. 

“Le isi a mea ia tatou, se o le o ma le le mautinoa ile faifaatoaga. E leai ma sesi e alu e ola faapalapala ile faiga ole faatoaga ae ou te faiatu o le tele ia o le avanoa e maua ai au meaai maua fua; e tea i le ufi, e te ai le fai palagi ma soo se mea.

“Ia a o le tupe foi ia, ia o lea foi ua tatou vaai atu ile tele o maketi lea ua omai, ua outou silasila i le tau o le niu lea ua iai, ua $4, pe o’ona pe suamalie e $4.

“Ia o le tele o vaega tupe e maua mai le faifaatoaga, o lau a la ia fautuaga, ia toe foi i le laueleele ma o le mea foi na ou te tetee ai ile aumaiga o sesi koko i totonu aua o na e sui ai foi le tofo ole koko ao le mea lea le lauiloa ai Samoa atoa, ona o le manogi o le koko.”

By Aruna Lolani 19 July 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>