Tuai pea galuega ona o tulaga tau-tupe

By Ilia L Likou 20 April 2016, 12:00AM

Tumau pea ma tuai galuega mo le tau-fa’amae’aina o le Malumalu o le Iupeli i Malua. 

Le galuega sa ulua’i fuafua e fitu-miliona tala ($7 miliona tala) lona tau ma amataina i le 2014.  

I le amataga, sa fuafua e mae’a le galuega lea ma tatala aloa’ia le Malumalu, i le tausaga ua mavae, le 2015.

Peita’i, e le’i fa’apena. 

O le taimi nei, ua o’o i le sefulutolu miliona tala ($13 miliona tala) le tau o lea poloketi a le Ekalesia – toetoe a fa’aluaina le tupe sa ulua’i fuafuaina. 

Na fa’amaonia mai e le Ali’i Pule o le Konekarate a le Shanghai, o Jerry Shi, o lo’o latou feagai nei ma le fa’amautuina o le tau o mea-fau-fale.

“Makou pau lea fai galuega fa’api’i mea uma, leai fe’au makou mo laupapa ma isi mea … ae sa’o suga…galue makou faikau fia kupe mo laupapa ma mea uma mo Fale-Upeli, fai kogu le loku,” o lana tau-fa’amatalatala mai lea o le tulaga o iai le galuega ma matafaioi e patino i le latou kamupani.

“Akogu le koe umi maua kogu.

“Aumai Ekalesia kogokalake makou fai kigo falesa, pau lea … uma fai, lelei uma. Pau lea soso’o luga…’apa kaualuga uma loa. 

Na ta’ua fo’i e si ali’i-Saina, na fa’ailoa atu e le vaega tusiata, o lo’o iai nai fa’afitauli i le fa’atinoga o le galuega.

“Kele kele luga fale …i i i …ga, fai mai umi luga falesa,” o lana toe fa’aopoopo mai lea. 

“Kokiki uma galuega muamua makou, uma loa alu loga lua.

I le sauniga o le fa’apa’iaina o le fanua i le 2014, na tu’uina aloa’ia ai le konekarate i le kamupani fai-fale o le Shanghai, mo le fausia o le fa’avae ma le tanu o totonu, o le tele o le fale-aluga sa fa’atino e le kamupani a le Fletcher Construction a’o fafo atoa, o le a fausia e le kamupani o le South Pacific Cladding. 

I se ripoti talu ai mai le Failautusi Aoao a le Ekalesia, le Susuga a Afereti Uili, sa ia fa’amautuina ai, e tatau ona mae’a le Malumalu o le Iupeli i se taimi o lenei tausaga. 

Sa ia te’ena fo’i tala-sala-tua fa’apea ua tuai le galuega ona o fa’afitauli tau-seleni. 

Ae na saunoa, o lo’o fa’aauau pea galuega e le’i mae’a.

“O lo’o matou fa’atali pea i le tau-aofa’i o mea-fau-fale ma isi vaega mai le kamupani,” o lana fa’aaliga lea. 

“O vaega ia e aofia ai ‘apa, le faiga o totonu o le fogafale-a-lalo, o fa’amalama, o sitepu ma isi vaega … ma o lo’o fuafua e fa’atino mua uma ia i nai aso o muamua.” 

Ae na ta’ua fo’i e Afereti, o lo’o galulue nei inisinia fa’apitoa e fa’amautu tulaga mo’omia uma o le fale ae maise mana’oga mo le saogalemu. 

Na māua e le Samoa Observer, na muta galuega i Malua i le fa’ai’uga o le tausaga talu ai.

By Ilia L Likou 20 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>