Ia matagofie Samoa

By Vatapuia Maiava 20 September 2016, 12:00AM

A galulue fa’atasi o le ā faigofie ma māmā le tele o ‘avega.

E afea e le Fofoga o Samoa i le aso ananafi  Faleasi’u o lo’o galulue le malosi o le afio’aga i le fausiaina lea o fata lapisi i le amataga o le afio’aga se’ia pa’ia lona tau fa’asi’usi’uga.

Na fa’ailoa e Lavilavi Peseti o lo’o fa’amatua ai le galuega fitā  o lo’o feagai ma taulele’a,  o le fa’amoemoe lava o le fa’amatagofieina lea o lo latou afio’aga.

“O le taimi lenei, o lenā le agaga maualuga o lo’o i ai i si o matou nu’u, o a mea ua maua e o matou lima ma ua iloa e ono fesoasoani ai mo le atunu’u ia o lena lava.

“Ua leva ona o matou galulue, i le tele o vaega nei mo le fa’amatagofieina o lo matou nu’u, matou te le’o fa’atali fo’i se’i tau fesoasoani mai le malo.

“O la’au lava o lo’o ta mai ma fau ai fata nei ona o  le manatu lava ina ia  galulue fa’atasi ma le malo i le taumafai lea e fa’amatagofieina le tele o ‘a’ai ma afio’aga.

 “O lea le taumafaiga tele o lo’o feagai ai nei, ina ia aoina mai le tele o lapisi ma tu’uina i luga o fata nei ma fa’afaigofie ona aoina ma lafoa’ina i nofoaga e masani ai ona ave ai le tele o otaota.

 “E le gata o lo’o o matou galulue i vaega ia, ae o le fe’au lava e tasi e ao i tagata uma ona galulue i ai, ia ola e pulupululima  ina ia faigofie mea uma.

O lo’o ua i ai fo’i sala fa’ale-nu’u ua uma ona fa’ata’atitia e le afio’aga mo so’o se tasi e na te fa’aleagaina fata lapisi o lo’o ua amata fauina i totonu o Faleasi’u.

 “O so’o se tagata lava e na te solia ia o le ā fa’asala  e pei ona masani ai so’o se faiga nu’u lava i totonu o le afio’aga. “O le taimi lenei ia e leai lava ni fa’afitauli o feagai ma le nu’u nei, e pau lava le tulaga ia o le felagolagoma’i lava. “E le aoga fo’i le fausia o fata nei, ae leai se fa’asalaga e ave i a’i latou e fa’aleagaina aua o le mea moni lava a leai ni fa’asalaga, ia ua tatou iloa le tulaga e o’o i ai fata lapisi.

“O le i ai la o taulele’a o le afio’aga i lenei taeao, o lo’o fa’amoemoe ia aveavea’i ai pea ona itu lelei nei e le gata mo nei ae o tupulaga mo a taeao.

By Vatapuia Maiava 20 September 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>