O le ola usiusita’i o se itu sili le ona taua mo Semurana Nouata o Sala’ilua Falealili.

I le fa’atalatalanoaga ma le Fofoga o Samoa i le aso ananafi na ia fa;ailoa le tulaga e ao lava ona fa’atinoina aua le lelei alu i luma o aiga ameaise o vaega uam e tatau ona o’o i ai.

“Ia o lea  lava le tulaga e tatau ona fa’atinoina muamua lava i totonu o aiga, o le usiusita’i lava.

“O le uiga o la’u tala e leai lava se mea e faigata  nai lo le taumafai lea e ola usita’i ai pea i taimi uma, aua i a te a’u lava ia e faigofie lava le fai mai e usita’i ia ae matua’i leai lava se agaga e mafai ona fai ai.

“Ia masalo o si o matou aiga, e i ai lava nai tulafono e ola mai ai, o le uiga o la’u tala afai lava e te usita’i ae leai se tulaga fo’i lea e mafai ai ona fa’atinoina le fa’atonuga a matua i le tulaga e tatau ona o’o i ai.

“Ia ua iloa uma lava le tali tatou te o’o ai.

O Semurana o ia o le lona valu o le fanau e 12 a ona matua.

“Ia o lea lava le tulaga o lo’o ua i ai le taimi lenei, e pei ona fa’ailoa atu i le taimi muamua ia o le usita’i lava e mafai ai ona maua fa’amanuiaga.

“E ui lava o le tele o taimi e le usita’i ai ae ao lava i fanau ona fa’ataua lea tulaga i totonu o aiga.

O Semurana o se tasi o tama fanau o le atunu’u lea o le a sauna atu e malaga i atunu’u i fafo mo galuega fa’aseila.

“Ia e pei o lea lava le tulaga o lo’o ua i ai le taimi lenei, e leai lava se mea e faigata pe a o tatou fa’atuatuana’i i ai.

“O le uiga o la’u tala, ia o le taumafai lava ma tatalo i le Atua e fesoasoani ma i i galuega o le a o atu ai, e le faigofie e tele lu’itau.

“Ia afai ae manuia mai ia e leai lava se isi ema o titilo i ai nai lo le atia’e o le aiga ia ma fai se fale lelei aua matua ma nai isi o uso ma tuafafine.