Tapena i taimi uma
E le’o toe faigofie nei aso i le talitonuga o Ieti Siniua.
Na ia fa’ailoa i le Fofoga o Samoa le faigata o le tulaga ua i ai nei le tele o le soifuaga i Savai’i.
“Ia e pei o le tulaga lava ua o’o mai ai i’inei ona o le tauamafai lava lea ia maua se fesoasoani i aiga, aemaise o le taumafai i se itu fa’amama avega.
O Ieti na ola ma soifua ane i Gataivai, Savai’i.
“O lea le tulaga na mafua ona tu’ua ai ga e pei ona ua fa’ailoa muamua atu ia lelei aiga aemaise o nei aso ua taugata lava le soifuaga.
“Ia e moni lava o lo’o tele le mau faleoloa i Savai’i aemaise o le tele o le mau auaunaga fa’apea ua o’o atu i Savai’i.
“Ae pei o lea lava le tulaga o lo’o ua i ai, o le le fa’aitiitia ai lea o le taugata o le tau o le soifuaga.
Na ia fa’amatalaina o le tele o oloa “ia e o’o atu i Savi’i ua fa’ateteleina le alu i luga o tau.
“O se itu faigata lea i le taimi lenei, ua o tatou iloa uma lava le tulaga o le si’itia ai o totogi aemaise o tau o mea uma o lo’o ua iai lenei talutalu fou ua o tatou i ai.
“E leai lava se tagata aemaise aiga o si o tatou atunu’u e le silafia lea tulaga, o le a lava fo’i le taumafai ia o lena lava le soifuaga.
“O lo’o la’ala’a lava i luma le tulaga o lo’o ua i ai nei, ia ma tele atu ai ma suiga, ia o nisi lava o suiga e lelei o nisi fo’i ua leai.
“E pei ona ou fa’ailoa e pei o lea le tulaga faigata o lo’o ua i ai Savai’i ma o se itu tatau lea i lo’u iloa i ai, ia o tatou tapena i taimi uma.
“Ua le toe faigofie nei aso, e fai o le taugata o le soifuaga tu’u atu ai loa ma le tele o le mau fa’alavelave ia o tatou iloa uma lava lea tulaga.